ەلوردانىڭ كىشكەنتاي بۇلدىرشىندەرى ءۇشىن قالادا بارلىق جاعدايلار جاسالىپ كەلەدى. ولارعا ارنالعان ءتۇرلى دەمالىس ورىندارى, ويىن-ساۋىق ورتالىقتارى, شىعارماشىلىق قابىلەتىن دامىتاتىن ۇيىرمەلەر جەتەرلىك. تەك جەتپەي تۇرعانى – حايۋاناتتار باعى. بۇيىرتسا, ول كۇن دە الىس ەمەس. سەبەبى, كوپتەن كۇتكەن جوبانىڭ تەحنيكالىق-ەكونوميكالىق نەگىزدەمەسى دايىن. سونىمەن, استانالىق زووپارك قانداي بولادى؟
ساۋلەت جوباسى بويىنشا حايۋاناتتار باعىنىڭ توبەسى جابىق جانە ءوزارا جاياۋ وتكەلدەرمەن بايلانىساتىن ءۇش ۇلكەن جارتى سفەرانىڭ استىنا ورنالاسادى. ءبىر بولىگى سافاري-پاركتەرگە ارنالاتىن باق تابيعي ەكوجۇيەنىڭ جاساندى كورىنىسى بولماق.
جالپى, حايۋاناتتار باعىنىڭ قورشاعان ورتانى قورعاۋدا ۇلەسى زور. رەسۋرس جيناقتاۋ ورتالىعى رەتىندە قىزمەت ەتەتىن پارك ەكو-تۋردىڭ زاماناۋي تۋريستىك ۇدەرىسىنە سايكەس داميتىن بولادى.
بارشاعا بەلگىلى, «ەكو-تۋر» تابيعي ەكوجۇيەنىڭ بارىنشا ساقتالۋىن قامتاماسىز ەتەدى. سوندىقتان, بولاشاقتا حايۋاناتتار باعى مەن بوتانيكالىق باق استاناداعى تۋريزم يندۋسترياسىنىڭ الدىڭعى قاتارلى نىساندارىنا اينالارى ءسوزسىز.
سونىمەن, حايۋاناتتار باعىنداعى سفەرالار تۋرالى ايتساق. ءار جارتى سفەرانىڭ ءوز يدەياسى مەن اتاۋى بار. مىسالى: «سولتۇستىك امەريكا», «وڭتۇستىك امەريكا» جانە «افريكا». ءار سفەرانىڭ وزىنە ءتان ەرەكشەلىگىنە سايكەس, ولارعا جانۋارلار مەن وسىمدىكتەر جايعاستىرىلادى. اينالانىڭ ءبارىن تابيعي جاعدايعا بارىنشا ۇقساس ءتۇرلى لاندشافتقا اينالدىرۋ كوزدەلگەن. ال, ونداعى جانۋارلار مەن قۇستارعا ارناپ قورشاۋلار ورناتىلادى. جانۋارلار دەمەكشى, ءار سفەرادا سول ەلدەن اكەلىنگەن اڭ-قۇستار مەن جانۋارلار بولادى. ياعني, امەريكا, افريكا سياقتى ەلدەردەن جانۋارلاردىڭ 49 ءتۇرى جەتكىزىلمەك. حايۋاناتتار باعىندا بۇدان بولەك, كىشكەنتاي وزەن-كولدەر, توعاندار, سارقىرامالار, ورانجەرەيا, كىرەبەرىس كەشەندەر, اكىمشىلىك عيماراتتار, شارۋاشىلىق جانە قىزمەتتىك جايلار سالىنادى.
بۇگىندە جوبانىڭ اۆتورى – «پپك» جوبا-قۇرىلىس كومپانياسى» جشس. باقتىڭ جالپى اۋدانى 50 گەكتارعا سوزىلادى. جوبانىڭ قۇرىلىسى قالانىڭ سول جاعالاۋىندا, ياعني, يپپودروم ماڭىندا جۇرگىزىلەدى.
گۇلميرا ايماعانبەت
