استانا كۇنى مەرەكەسى جاقىنداپ قالدى. ناق سول كۇنى اشىلاتىن ۇلتتىق مۇراجاي – تەك كولەمى جاعىنان ەمەس, مازمۇنى جاعىنان دۇنيەجۇزىندەگى ەڭ ءىرى رۋحاني وردا بولماق.
ورتالىق كوممۋنيكاتسيالار قىزمەتىنىڭ بريفينگى الاڭىندا وسىنداي جاڭالىقتى جەتكىزگەن مادەنيەت ءمينيسترى ارىستانبەك مۇحامەديۇلى ەلوردامىزدىڭ مادەني تىنىسى جايلى باياندادى.
2016 جىلدىڭ ءساۋىر ايىندا ەلوردانىڭ كورىكتى جەرىندە قازاقستاننىڭ ۇلتتىق حورەوگرافيالىق اكادەمياسى بوي كوتەرەدى. سول جىلدىڭ مامىرىندا وقۋشىلاردى قابىلداي باستايتىن وقۋ ورنى قىركۇيەكتە ناقتى جۇمىسقا كىرىسەدى. بۇل – ورتالىق ازياداعى بي ونەرىنە باۋليتىن ەڭ ۇلكەن مادەني وشاق بولماق.
وسىنداي نىسانداردىڭ اشىلۋى مادەنيەت جانە ونەر سالاسىندا جۇرگەن دارىندى جاستاردىڭ شىعارماشىلىق تۇرعىدان وسۋىنە مول مۇمكىندىك بەرەدى. ماسەلەن, بىلتىر عانا اشىلعان «استانا وپەرا» مەملەكەتتىك وپەرا جانە بالەت تەاترى پريما-بالەريناسى ايگەرىم بەكەتاەۆا رەسەيدىڭ اتاقتى حورەوگرافى بوريس ەيفماننىڭ ترۋپپاسىنا قابىلدانىپ, ۆەنگريادا, انگليادا «رودەن» بالەتىندە باستى ءرولدى وينايتىن بولدى. «استانا وپەرانىڭ» تاعى ءبىر ءبيشىسى ءمادينا بەسپاەۆا جاقىندا بوردو تەاترىندا ونەرىن كورسەتىپ قايتتى.
تالانتتى ديريجەر الان بورىباەۆ رەسەيدىڭ ۇلكەن تەاترىنىڭ قويىلىمىنا قاتىستى. «بىلايشا ايتقاندا, ديريجەر بولىپ بارۋعا بولادى. ال, قويىلىم قويىپ, سول تەاترمەن بىرگە لوندونعا, يزرايل مەملەكەتىنە شىعىپ قايتۋ –قازاقستان ونەرى ءۇشىن ۇلكەن جەتىستىك» دەدى ارىستانبەك مۇحامەديۇلى.
تاعى ءبىر سۇراعىمىز – «استانا ەكسپو-2017» حالىقارالىق كورمەسى كەزىندەگى مادەني مەكەمەلەردىڭ قىزمەتى تۋرالى بولدى. ول جونىندە مەملەكەت باسشىسى نۇرسۇلتان نازارباەۆتان ارنايى تاپسىرما العاندارىن تىلىنە تيەك ەتكەن مينيستر كورمەنىڭ مادەني باعدارلاماسىنىڭ تۇجىرىمداماسىن دايىنداپ جاتقاندىقتارىن جەتكىزىپ, مادەني باعدارلاما «قازاقستان – ەۋرازيا جۇرەگىندە» اتاۋىن العانىن ايتتى.
ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ عيماراتى تار ەكەنى بەلگىلى. ارىستانبەك مۇحامەديۇلى بۇل تەاتر تاعدىرىنان دا حابار بەردى. بيىل اتالمىش ۇجىم بوس تۇرعان ك. بايسەيىتوۆا اتىنداعى وپەرا جانە بالەت تەاترى عيماراتىنا كوشىرىلەتىن بولدى.
امانعالي قالجانوۆ
