بۇگىن تۇندە استانانىڭ ميلليونىنشى تۇرعىنى دۇنيە ەسىگىن اشتى. ساعات 01:00 №1 پەريناتالدى ورتالىقتا قىز تۋدى. ول اتا-اناسىنىڭ تۇڭعىشى. اناسى – №9 «نۇرشاشۋ» بالاباقشاسىنىڭ تاربيەشىسى ارايلىم مۇحامەديار (1994 ج.ت.), اكەسى – «استانا-رەك» مامانى ولجاس مۇحامەديار (1992 ج.ت.).
قالا اكىمى اسەت يسەكەشەۆ ەرلى-زايىپتىلاردى قۇتتىقتاپ, پاتەر كىلتىن تابىستادى. جاس وتباسى اتا-اناسىمەن تۇرادى, سوندىقتان بۇل ولار ءۇشىن ناعىز توسىن سىي بولدى.
«بۇگىن مەن ءۇشىن قوس مەرەكە – اكەمنىڭ تۋعان كۇنى جانە قىزىم دۇنيە ەسىگىن اشىپ وتىر. ونىڭ ۇستىنە, پاتەر كىلتىن تابىستادى. مەملەكەت باسشىسىنا العىس ايتامىن, جاسالعان جاعدايلاردىڭ ارقاسىندا ساپ-ساۋ قىز تۋدىق. اي سايىن, جىل سايىن حالقىمىزدىڭ سانى ارتا بەرسىن دەپ تىلەيمىن. اكە مەن انا بولۋ باقىتىن اركىمنىڭ باسىنا بەرسىن», – دەيدى قىزىنىڭ ەسىمىن سايدا دەپ قويعان باقىتتى اكە.
18 جىلدا ەرلوردادا بالا تۋ كورسەتكىشى ەكى ەسەگە ءوستى, انا مەن ءسابي ءولىمى 5 ەسەدەن ارتىق تومەندەگەن. بۇعان قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆتىڭ مەملەكەتتىك دەنساۋلىق جۇيەسىنە باسا نازار اۋدارۋىنىڭ ارقاسىندا قولجەتكىزىلدى. كۇن سايىن ەلوردادا 75-80 بالا تۋادى. وتكەن جىلى استانادا 26110 نارەستە, ال ۇستىمىزدەگى جىلدىڭ ءبىرىنشى جارتىجىلدىعىندا 13740 ءسابي دۇنيەگە كەلگەن. قالاداعى پەريناتالدى ورتالىقتاردىڭ بارلىعى دۇنيەجۇزىلىك دەنساۋلىق ساقتاۋ ۇيىمىنىڭ باعدارلاماسى بويىنشا قاۋىپسىز انا قاعيداتى بويىنشا جۇمىس ىستەيدى.
