استانا قالاسى مەديتسيناسىنىڭ جەتىستىكتەرى از ەمەس. بۇگىندە مەديتسينانىڭ ەڭ مىقتى زاماناۋي قۇرىلعىلارى ەلوردادا. باس قالادا ەڭبەك ەتىپ جۇرگەن اقحالاتتىلاردىڭ ىشىندە العىسقا بولەنىپ, بىلىكتىلىگىمەن بىرەگەي تابىستارعا جەتكەندەرى جەتەرلىك. ەندەشە, مەديتسينا قىزمەتكەرلەرىنىڭ كۇنى قارساڭىندا ەلوردالىق دەنساۋلىق ساقتاۋ جۇيەسىنىڭ يگى قادامدارى جونىندە ايتۋدى ءجون كوردىك.
ەلوردا مەديتسيناسىنىڭ تابىسى دەگەندە, ەڭ ءبىرىنشى ويعا ورالاتىنى – جاڭادان اشىلىپ جاتقان عيماراتتار. وسى مەكەمەلەردىڭ ءبارىن قوسقاندا, بۇگىندە استانادا 37 مەديتسينالىق ۇيىم بار. ونىڭ 14-ءى – ستاتسيونار. 14-ءى – امبۋلاتورلىق ۇيىمدار جانە 9-ى – باسقا دا مەديتسينالىق مەكەمەلەر. سوڭعىسىنىڭ قاتارىندا جەدەل مەديتسينالىق كومەك ستانساسى مەن مەديتسينالىق كوللەدج, سپيد ورتالىعى, پاتولوگواناتوميالىق بيۋرو بار.
بىلتىر مەديتسينالىق كومەكتى تۇرعىندارعا بارىنشا قولجەتىمدى ەتۋ, دەنساۋلىق سالاسىنىڭ ساپاسىن ارتتىرۋ, ەمحانالاردىڭ جۇكتەمەسىن ازايتۋ باعىتىندا ءبىرتالاي جۇمىستار اتقارىلدى. جاڭا مەديتسينالىق ۇيىمداردىڭ كوپتەپ اشىلعانى دا – وسى تۇس. ايتالىق, دوسمۇحامەدۇلى كوشەسىندە ءبىر مەزگىلدە 150 ادامعا قىزمەت كورسەتەتىن العاشقى مەديتسينالىق-امبۋلاتوريالىق كومەك ورتالىعى پايدالانۋعا بەرىلدى. «گراند استانا» تۇرعىن ءۇي كەشەنىنەن ەلوردا اكىمدىگى 1500 شارشى مەتر عيمارات ءبولىپ الىپ, بۇل №6 قالالىق ەمحاناعا بەرىلدى. №1 پەريناتالدىق ورتالىق پەن №2 بالالار اۋرۋحاناسى بازاسىنداعى «نيەت» پەن «شيپاگەر» وتباسىلىق دەنساۋلىق ورتالىعىنا جەكە مارتەبە بەرىلىپ, ولار بولەك ۇيىم رەتىندە تۇرعىندارعا قىزمەت كورسەتە باستادى.
الداعى ۋاقىتتا اشىلاتىن نىساندار دا بارشىلىق. جاقىندا العاشقى مەديتسينالىق-سانيتارلىق كومەك كورسەتەتىن ەكى نىساننىڭ قۇرىلىسىن اياقتاۋ كوزدەلىپ وتىر. ونىڭ ءبىرى – ۇركەر كەنتىندەگى 150 ورىندىق ەمحانالىق كەشەن بولسا, ەكىنشىسى – ەسىلدىڭ سول جاعالاۋىنداعى ءبىر مەزگىلدە 500 ادام قابىلداي الاتىن ەمحانا. بۇعان قوسا, 250 ورىنعا شاقتالعان بالالار ينفەكتسيالىق اۋرۋحاناسى, ەمحاناسى بار 250 ورىندىق مەديتسينالىق-الەۋمەتتىك بەيىمدەۋ ورتالىعى, ەمدەۋ-وندىرىستىك شەبەرحانالاردى ىسكە قوسۋ جوسپارلانۋدا.
استانالىق مەديتسينا ۇجىمى اۋرۋ مەڭدەگەن جانداردىڭ ءومىر ساپاسىن جاقسارتۋ ءۇشىن دە ءبىرتالاي شارۋالاردىڭ باسىن قايىردى. ايتالىق, گيۋستاۆا رۋسسي اتىنداعى بەلگىلى ونكولوگيا ورتالىعىمەن بىرلەسىپ, ىسىك اۋرۋلارىنا شالدىققان ادامدارعا جاسالاتىن حيمياتەراپيانىڭ قاۋىپسىزدىگىن ارتتىرىپ, تيىمدىلىگىن جاقسارتۋ ءۇشىن ارنايى يننوۆاتسيالىق جوبانىڭ تۇساۋىن كەستى. №1 پەريناتالدىق ورتالىقتا ەندوكرينولوگيالىق سىرقاتتارعا شالدىققان جۇكتى ايەلدەردىڭ امان-ەسەن بوسانۋىنا مۇمكىندىك بەرەتىن ورتالىقتاندىرىلعان تەكسەرۋ كوميسسياسى قۇرىلدى. بۇگىنگە دەيىن وسىندا 819 جۇكتى ايەل تەكسەرىلىپ, 57-سىندە ءارتۇرلى اۋرۋلار انىقتالىپ, جەدەل تۇردە اۋرۋحاناعا جاتقىزىلعان.
جۇرەك اۋرۋلارىنا شالدىققان تۇرعىنداردىڭ دا دەنساۋلىعىن تۇزەۋ ءۇشىن №1 قالالىق اۋرۋحانا بازاسىندا ينسۋلت ورتالىعى جۇمىس ىستەپ كەلەدى. مۇندا 1060 پاتسيەنت ەمدەلىپ شىققان. 223 وپەراتسيا جاسالسا, ونىڭ 120-سى جەدەل جاعدايدا, 99-ى جوسپارلى تۇردە وتكەن.
ەلوردالىق كىشكەنتاي تۇرعىنداردىڭ دەنساۋلىعى دا نازاردان تىس قالماي, بالالارعا ساپالى مەديتسينالىق كومەك كورسەتۋ ءۇشىن 15 شەبەرلىك ءدارىسى وتكىزىلگەن ەكەن. وسى بويىنشا اقش, فرانتسيا, ۇلىبريتانيا, ليتۆا, رەسەي ەلدەرىندە 240-تان اسا مەديتسينالىق ماماندار بىلىكتىلىك كۋرسىنان ءوتىپ, ولار 45 بىرلەسكەن وتا جاساعان. بالالاردىڭ دەنساۋلىعىنا بايلانىستى 400-دەن اسا كەڭەستەر بەرىلگەن.
بۇل ەلوردانىڭ 2014-2015 جىلدارداعى جەتىستىكتەرى عانا. الدا استانالىق اقحالاتتىلار بۇدان دا ۇلكەن جەتىستىكتەرگە جەتەتىنىنە سەنىم مول.
