قالا مەن سالا

ەنەرگەتيك ماماندىعى – قوعامعا پايدالى ءىس

فوتو لۋكاشەۆ

قاراپايىم ەڭبەگىمەن كۇن سايىن قوعام تىنىسىنا يگىلىك دارىتىپ جۇرەتىن, ونىسى استە كوزگە ءتۇسىپ, كوپشىلىك كوڭىلىنە ەلەنە بەرمەيتىن ماماندىق يەلەرى بولادى. مىنە, وسىنداي قادەلى ماماندىقتىڭ قادىرىن اسىرىپ جۇرگەن جانداردىڭ ءبىرى – «KEGOC» اق «اقمولا جەت» سىناق جانە دياگنوستيكا جاساۋ قىزمەتىنىڭ باستىعى يۆان لۋكاشەۆ.

يۆان يۆانوۆيچ سانالى عۇمىرىنىڭ وتىز جىلعا جۋىق ۋاقىتىن ەنەرگەتيكا سالاسىنا ارناپتى. اتاۋلى ەنەرگەتيك ماماندىق تاڭداعان جىلدارىن ساعىنىشپەن ەسكە الادى. «ەنەرگەتيكا سالاسىنا 1985 جىلى, تسەلينوگراد اۋىل شارۋاشىلىق ينستيتۋتىن ينجەنەر-ەلەكترشى ماماندىعى بويىنشا تامامداعان جىلدارى كەلدىم. بۇل ىسكە جۇرەك قالاۋىمەن كەلگەنىمدى ماقتان ەتەمىن» دەيدى يۆان لۋكاشەۆ.

– وسى سالاداعى العاشقى قىزمەتتىك باسپالداعىم – «تسەلينەنەرگونىڭ» جوعارى ۆولتتى ەلەكتر جەلىلەرىن سىناۋ, اسقىن كەرنەۋدەن قورعاۋ جانە ولشەۋ جونىندەگى جەرگىلىكتى قىزمەت ينجەنەرى ەدى. وسى العاشقى جۇمىسقا دەگەن ادالدىعىم مەن قىزىعۋ­شىلى­عىمنان-اق, عۇمىر بويى وسى سالادا ناپاقامدى تاۋىپ, تۇراقتاپ قالاتى­نىمدى سەزىنەگەن ەدىم. ماماندىق اۋىس­تىرۋ نەمەسە وزگە كاسىپ ىزدەۋ ويى­ما كىرىپ تە شىقپادى, – دەيدى لۋكاشەۆ.

ءوز ءىسىنىڭ كانىگى شەبەرىنە اينال­عان يۆان يۆانوۆيچ العاشقى ءتالىم­گەرلەرىن سىناۋ جانە كەرنەۋدىڭ ۇلعا­يىپ كەتۋىنەن قورعاۋ قىزمەتىنىڭ (سكۇق) باستىعى ەۆگەني تراپەزنيكوۆ پەن سىناق جونىندەگى ەلەكتر مونتەرى يۆان لار­شيندى اسا ىلتيپاتپەن ەسكە الادى. «جوعارىدا ەسىمدەرى اتالعان ادامدار – ەنەرگەتيكا سالاسىنىڭ مايتالمان ماماندارى, ولار ماعان ەلەكتر جاب­دىقتارىن سىناۋدىڭ تەوريالىق جانە پراكتيكالىق نەگىزدەرىن ءتۇسىن­دى­رىپ قانا قويعان جوق, اتالمىش مامان­دىققا قىزىعۋشىلىعىمدى ارتتىرا ءتۇستى, – دەيدى ي.لۋكاشەۆ, – جالپى, قىزمەت بارىسىندا بىلىكتى باسشىلارمەن جۇمىس ىستەۋدە جولى بولعان ادام ەكەنىمدى جاسىرمايمىن.  توقسانىنشى جىلداردىڭ اياعىندا «KEGOC» اق-دا قىزمەت ەتكەن اسا بىلىكتى مامان, مىق­تى تەورەتيك ءارى پراكتيك نيكولاي نيكي­تيننىڭ قاراماعىندا جۇمىس ىستەۋ باقىتى ماڭدايىما بۇيىردى.

قاراماعىنا 25 قۇرىلىمدىق ءبولىم­شەسى جانە ءتورت اۋماقتىق – اقمولا, اتباسار, كوكشەتاۋ جانە پەتروپاۆل ەلەكتر جەلىسى كىرەتىن «KEGOC» اق «اقمولا جەت» فيليالىندا قىز­مەت ىستەيتىن يۆان لۋكاشەۆ قازىرگى كەزدەگى ۇجىمىن ماقتان تۇتادى, ءارى وسى ۇجىمدا قىزمەت ەتىپ جۇرگەنىن مارتەبە سانايدى. فيليال ديرەكتورى جاڭاباي الشىنبەكوۆ تە ۇجىم ىشىندە كاسىبي ىنتىماقتاستىق پەن ناقتى ماقساتقا ۇمتىلۋشىلىق احۋالىن قالىپتاستىرىپ, قىزمەت­كەرلەردى ءوز مىندەتتەرىنە ىنتالاندىرىپ, جاۋاپكەرشىلىك سەزىمدەرىن جەتە سەزىنۋ رۋحىندا تاربيەلەپ جۇرگەن بىلىكتى باسشى.

–  «KEGOC» كومپانياسىندا جۇمىس ىستەۋ مەن ءۇشىن زور ماقتانىش. ءبىزدىڭ كومپانيا نەگىزگى مىندەتىمەن قوسا, قازاقستاننىڭ بىرەگەي ەلەكتر جەلىلەرىنىڭ زاماناۋي تەحنيكالىق, ەكونوميكالىق جانە ەكولوگيالىق تالاپتارعا, كاسىبي قاۋىپسىزدىك پەن دەنساۋلىقتى قورعاۋ ستاندارتتارىنا ساي جۇمىس اتقارىپ, ءتيىمدى دامۋىن قامتاماسىز ەتۋىن نازاردان تىس قالدىرعان ەمەس, – دەيدى يۆان يۆانوۆيچ.

يۆان لۋكاشەۆتىڭ ەڭبەك جولىندا وتباسىنىڭ دا ىقپالى زور بولدى.

– اتا-انامنىڭ جوعارى بىلىمدەرى بولماسا دا, وقىپ-توقىعاننىڭ پايداسى مول ەكەنىن جاقسى ءتۇسىندى, مەنىڭ قالاعان ماماندىعىم بويىنشا جوعارى ءبىلىم الۋىما قامقورلىق جاسادى. سول ءۇشىن ولارعا العىسىم شەكسىز. وتباسى مەن ءۇشىن ومىرلىك ۇستانىمىمنىڭ تىرەگى. مەنى ومىرلىك جارىم دا قولداپ, قوشتاپ وتىرادى, – دەيدى يۆان يۆانوۆيچ.

ەنەرگەتيكا سالاسى قيىندىعى مەن قىزىعى قاتار جۇرەتىن سالا ەكەنى جاسىرىن ەمەس. ەلەكتر ءوندىرىسى – فيزيكالىق ۇدەرىس, ودان قور جيناقتاپ, كەيىنگە پايدالانام دەپ استە ساقتاپ قويا المايسىڭ.  «KEGOC» اق «اقمولا جەت» في­ليا­لىنداعى وندىرىستىك تىزبەكتىڭ نەگىزگى بۋىندارىنىڭ ءبىرى – يۆان لۋكاشەۆ جۇمىس ىستەپ جۇرگەن سىناق جانە دياگ­نوستيكا جاساۋ قىزمەتى. ونىڭ مىندەتى ۋاقتىلى دياگنوستيكا جاساۋ ارقىلى ەلەكتر جابدىقتارىنىڭ ءبۇلىنۋ قاۋپىن ازايتۋ بولىپ سانالادى.

– قازىرگى كەزدە ءوندىرىستىڭ بارلىق سالاسىن قامتىعان تەحنيكالىق پروگرەسس ەنەرگەتيكانى دا اينالىپ ءوت­كەن جوق. كومپانيانىڭ ەنەرگەتيكا شارۋاشىلىعىن جاڭعىرتىپ, تەح­ني­­كالىق جاراقتاندىرۋعا ۇمتىلىپ وتىر­عان قادامى – رەسپۋبليكامىزدىڭ ەنەرگەتيكاسىن دامىتۋداعى جاڭا دا قىزىقتى كەزەڭگە اينالىپ, جاس بۋىن ەنەرگەتيكتەردى قاتارىمىزعا تارتا بەرەرى ءسوزسىز, – دەپ ءسوزىن تۇيىندەيدى يۆان يۆانوۆيچ.

تاعىدا

admin

«استانا اقشامى» گازەتى

ۇقساس جاڭالىقتار

پىكىر ۇستەۋ

Back to top button