كەشە قالالىق ءماسليحاتتىڭ كەزەكتى سەسسياسى ءوتتى. وندا قالانىڭ تىنىس-تىرشىلىگىنە قاتىستى تالقىلانعان ءبىرتالاي ماسەلە دەپۋتاتتار تاراپىنان قولداۋ تاپتى. الدىمەن استانا قالاسى اكىمىنىڭ ورىنباسارى ۆاسيلي كرىلوۆ ەلوردانىڭ ەنەرگەتيكا سالاسى مەن كوممۋنالدىق قىزمەتىنىڭ جاي-كۇيى جونىندە بايانداما جاسادى.
بايانداماشى ەنەرگەتيكا سالاسى – قالا ەكونوميكاسىن دامىتاتىن ماڭىزدى سالا ەكەنىن ايتا كەلە, بۇل جۇيەنىڭ جۇمىسىن ءتيىمدى ۇيلەستىرۋ باعىتىنداعى شارۋالار ەكى باعىتتا جۇزەگە اسىپ جاتقانىن جەتكىزدى. ءبىرىنشى باعىتى – ەنەرگيا ءوندىرۋشى جانە تاسىمالداۋشى كاسىپورىندار مەن تۇتىنۋشىلاردىڭ مۇددەسىن ەسكەرە وتىرىپ, ءوزارا ءتيىمدى تاريف قۇرۋ بولسا, ەكىنشىسى – زاماناۋي تەحنولوگيالاردى قولدانا وتىرىپ, قالا تىرشىلىگىن قامتاماسىز ەتەتىن كاسىپورىندار قۇرىلعىلارىن قايتا جاڭعىرتۋعا ينۆەستيتسيا تارتۋ.
ەلورداداعى كوممۋنالدىق قىزمەت تولەمدەرىنىڭ تاريفىنا توقتالعان اكىمنىڭ ورىنباسارى مۇنداعى باعام رەسپۋبليكاداعى وزگە قالالارعا قاراعاندا ارزان ەكەندىگىن جەتكىزدى. مىسالى, استانا جىلۋ ەنەرگياسى تاريفىنىڭ تومەندىگى جاعىنان رەسپۋبليكا بويىنشا ءتورتىنشى ورىندا ەكەن. ايتالىق, تۇرعىن ءۇي قورى بويىنشا, كوممۋنالدىق تولەمدەردىڭ باعاسى جازعى مەزگىلدە ورتا ەسەپپەن 6,5 مىڭ تەڭگەنى قۇرايدى. ەلەكترمەن قامتاماسىز ەتۋ – 824 تەڭگە بولسا, ىستىق سۋ – 805 تەڭگە. ال قىستىڭ كۇنى كوممۋنالدىق قىزمەتتەر تولەمى ورتاشا ەسەپپەن 12 390 تەڭگە. ءار پاتەردىڭ تەك جىلۋ ەنەرگياسىنا تولەيتىن قارجىسى ورتاشا ەسەپپەن 5 مىڭ تەڭگەدەن اسادى.
استانا قالاسى حالقىنىڭ وسۋىنە بايلانىستى كەيدە جارىق, جىلۋ جەلىلەرىنە دە سالماق ءتۇسىپ جاتادى. سوندىقتان قالا بيلىگى جەو– 1, جەو–2 قازاندىقتارىن جوندەۋ, قوسىمشا تۋربينالار ورناتۋ سىندى شارۋالاردى قولعا الىپتى. جاڭادان ىسكە قوسىلاتىن جەو-3-ءتىڭ وزىندە سۋ جىلىتاتىن 4 بىردەي قازاندىق قۇرىلىسىن جۇرگىزۋ جوسپارلانىپ وتىر ەكەن.
استانادا ەنەرگيانى ۇنەمدەۋ ماقساتىندا دا كەشەندى شارالار جوسپارى جاسالعانىنا توقتالعان قالا اكىمىنىڭ ورىنباسارى كاسىپورىندارعا 2020 جىلعا قاراي ەلەكتر قۋاتىن تۇتىنۋدى – 20 پايىزعا, سۋدى – 22 پايىزعا, جانار-جاعار مايدى – 20 پايىزعا ۇنەمدەۋ مىندەتى جۇكتەلگەنىن جەتكىزدى.
ۆاسيلي كرىلوۆتىڭ بايانداماسىنان كەيىن قالا اكىمىنىڭ ورىنباسارى ەرسايىن ناعاسپاەۆ ەلوردانىڭ دامۋىنا ەلەۋلى ۇلەسى بار مەملەكەتتىك سىيلىقتىڭ يەگەرى, «استانا وپەرا» تەاترىنىڭ ديرەكتورى تولەگەن مۇحامەدجانوۆ جانە قازىرگى زامان ونەرى مۇراجايىنىڭ ديرەكتورى نەللي شيۆريناعا «استانا قالاسىنىڭ قۇرمەتتى ازاماتى» اتاعىن بەرۋ جونىندەگى ۇسىنىسىن دەپۋتاتتارعا جەتكىزدى. ولار ءبىراۋىزدان كەلىسىمىن بەردى.
سەسسيادا استانا كوشەلەرىنىڭ بىرىنە گەنەرال-مايور يۆان پانفيلوۆتىڭ ەسىمىن بەرۋ ماسەلەسى دە قوزعالىپ, بۇل دا دەپۋتاتتار تاراپىنان قولداۋعا يە بولدى.
قىمبات نۇرعالي
