7 مامىردا مومىشۇلى مەن جۇماباەۆ داڭعىلدارىنىڭ قيىلىسىنداعى «جەرۇيىق» ساياباعىندا گەنەرال پانفيلوۆ اتىنداعى اللەيا اشىلادى.
ەر پانفيلوۆقا ەسكەرتكىش تۇرعىزىلىپ, الدىنا گۇل شوقتارىن قويۋعا ارنالعان تاقتا ورناتىلادى. ەسكەرتكىشتىڭ ۇزىندىعى – 2,5 مەتر. مونۋمەنت قولادان قۇيىلعان. بۇدان بولەك, سوۆەت وداعىنىڭ باتىرىنىڭ التىن جۇلدىزى بار 28 ستەللا جاسالدى. ەسكەرتكىشتىڭ شىعىس بولىگىندە مايداندا ەرلىك كورسەتكەن 28 جاۋىنگەرگە ارناپ تابيعي گرانيتتەن ەستەلىك تاقتايشالار قويىلادى.
استانا قالاسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ حابارلاۋىنشا, اللەياعا قاراستى اۋماقتى اباتتاندىرۋ ءۇشىن كوگالداندىرۋ, شاعىن ارحيتەكتۋرالىق پىشىندەر قويۋ, ەكى ۇلكەن پروجەكتور مەن 16 شام ورناتۋ كوزدەلگەن.
