ەرتەڭ – سوڭعى قوڭىراۋ
ەرتەڭ استانادا التىن ۇيا مەكتەبىنەن ارمان جولىنا اتتانعالى وتىرعان 5 مىڭ ەلوردالىق تۇلەكتەرگە سوڭعى قوڭىراۋ سوعىلماق.
سونداي-اق, ءدال سول كۇنى مەكتەپ بىتىرۋشىلەر ءۇشىن ساعات 13.00-دە «بايتەرەك» مونۋمەنتىنىڭ جانىندا «ءبىز – ەل بولاشاعىمىز» اتتى مەرەكەلىك شەرۋ مەن بي كەشى ۇيىمداستىرىلادى. كونتسەرتتىك باعدارلاماعا قالالىق ۇجىمدار قاتىسپاق.
سونىمەن بىرگە, 25 مامىردا ساعات 17.00-دە وقۋشىلار سارايىندا دارىندى بالالارعا ارنالعان «تريۋمف» بالى وتەدى, وندا رەسپۋبليكالىق, حالىقارالىق كونكۋرستاردىڭ, عىلىمي جوبالاردىڭ جانە وليمپيادالاردىڭ جەڭىمپازدارىنا قۇرمەت كورسەتىلەدى. بيىلعى شارا «استانا دارىنى» وڭىرلىك عىلىمي-پراكتيكالىق ورتالىعىنىڭ 10 جىلدىعىنا ارنالىپ وتىرعان كورىنەدى.
ءسوز اراسىندا ايتىپ وتەيىك, 2015-2016 وقۋ جىلىندا ەلوردالىق وقۋشىلار اقش, برازيليا, گرۋزيا, رەسەي, وڭتۇستىك كورەيا ەلدەرىندە حالىقارالىق وليمپيادالار مەن عىلىمي جارىستاردا 268 مەدال
ەنشىلەگەن. رەسپۋبليكالىق وليمپيادا مەن عىلىمي جوبالار كونكۋرسىندا باس قالادا ءبىلىم الىپ جاتقان وقۋشىلار كومانداسى, جالپى كوماندالىق ەسەپتە 1-ءشى ورىن الىپ, «ۇزدىك كوماندا» اتاندى.
ال 17 ماۋسىمدا تۇلەكتەرگە مەكتەپ ءبىتىرۋ كۋالىگى تابىس ەتىلمەك.
ازامات ەسەنجول