ەشكىم دە, ەشتەڭە دە ۇمىتىلمايدى
مامىردىڭ مەرەيلى مەرەكەلەرى ارتتا قالدى. مەكتەپ وقۋشىلارى مەن ستۋدەنتتەر, ارداگەرلەر مەن جاستار, كاسىپورىندار, مادەني-اعارتۋ مەكەمەلەردىڭ ۇجىمدارى, كاسىپكەرلەر, قوعامدىق ۇيىمدار قازاقستان حالقىنىڭ بىرلىگى كۇنى, وتان قورعاۋشىلار كۇنى جانە ۇلى جەڭىس كۇنى مەرەكەلەرىندە ۇلى وتان سوعىسى قاتىسۋشىلارى مەن تىل ەڭبەككەرلەرىنە جانە قارتتارعا جاۋىنگەرلىك ەرلىكتەرى, سونداي-اق, ەرەن ەڭبەكتەرى ءۇشىن قۇرمەت كورسەتىپ, ءىلتيپات ءبىلدىرىپ, قامقورلىق تانىتتى.
بىلتىر ۇلى جەڭىستىڭ 70 جىلدىعى تويلانعاننان كەيىن جاستاردىڭ بويىنداعى وتانشىلدىق سەزىم ۇلعايا تۇسكەنى قۋانتادى. بيىل دا قالا مەكتەپتەرىندە سوعىس ارداگەرلەرى مەن تىل ەڭبەككەرلەرىمەن ۇيىمداستىرىلعان كەزدەسۋلەردە ءوز مەملەكەتىنە, تۋعان حالقىنا دەگەن شەكسىز
ماحاببات, اعا بۋىنعا دەگەن قۇرمەت پەن العىس ەرەكشە كورىنىس تاپتى. مايدانگەرلەر مەن تىل ەڭبەككەرلەرى ءوز تاراپتارىنان جاستاردى وتاندى سۇيۋگە, ونىڭ دامۋى مەن گۇلدەنۋىنە ۇلەس قوسۋعا شاقىردى.
№1, 22, 28, 63 جانە باسقا دا مەكتەپتەردە وتكەن ۇلى وتان سوعىسى تاريحى مەن حالىقتىڭ تەڭدەسى جوق ەرلىگىن اشا تۇسەتىن ادەبي-سازدى كەزدەسۋلەر ەشكىمدى بەيجاي قالدىرمادى. ۇلى وتان سوعىسى ارداگەرلەرىمەن «جەڭىس ءۇشىن راحمەت!» اتتى كەزدەسۋ تۇڭعىش پرەزيدەنت كىتاپحاناسىندا ءوتتى. وعان گەنەرال س.نۇرماعامبەتوۆ اتىنداعى رەسپۋبليكالىق «جاس ۇلان» مەكتەبىنىڭ تاربيەلەنۋشىلەرى, «كەمەل ەل» مادەني-اعارتۋ جۇمىس پەن جاستاردى ءتاربيەلەۋ ورتالىعى, «جاس ۇلان» بىرىڭعاي بالالار-ءجاسوسپىرىمدەر ۇيىمى» رقب, قالا مەكتەپتەرىنىڭ وقۋشىلارى قاتىستى. استانا قالاسى تاريحي-مادەني مۇرا نىساندارىن جانە ەسكەرتكىشتەردى ساقتاۋدى قامتاماسىز ەتۋ ءجونىندەگى ديرەكتسيا سارىارقا اۋداندىق ارداگەرلەر كەڭەسىمەن بىرىگىپ ۇلى مەرەكە قارساڭىندا رەسەيدىڭ عىلىم جانە مادەنيەت ورتالىعىندا ۇلى جەڭىس كۇنى مەن جىر الىبى جامبىل جاباەۆتىڭ تۋعانىنا 170 جىل تولۋىنا وراي جانە ونىڭ «لەنينگرادتىق ورەنىم» اتتى ءولمەس ولەڭىنىڭ 70 جىلدىعىنا ارناپ «ولار وتان ءۇشىن شايقاستى» اتتى تاقىرىپتىق كەش وتكىزدى. ۇلى وتان سوعىسى جاۋىنگەرلەرى ەسكەرتكىشىنىڭ الدىندا «ۇلى جەڭىسكە مىڭ تاعزىم» اتتى تاقىرىپتىق كەش ۇيىمداستىرىلدى.
قالالىق ارداگەرلەر كەڭەسى ل.گۋميلەۆ اتىنداعى ەۋرازيا ۇلتتىق ۋنيۆەرسيتەتى جانە اۋعانستان سوعىسى ارداگەرلەر ۇيىمى قاۋىمداستىعىمەن بىرىگىپ, ب.مومىشۇلى ەسكەرتكىشىنىڭ الدىندا «ءبىزدى ەستەلىكتەر 1941 جىلعا ورالتتى» اتتى شاراسىن ۇيىمداستىرىپ, 316-اتقىشتار ديۆيزياسىن مايدانعا شىعارىپ سالۋ تاريحي كورىنىسىن جاڭعىرتىپ, اسكەري-پاتريوتتىق اكتسيانى وتكىزدى.
ءاليا مولداعۇلوۆا, يۆان پانفيلوۆ, اۋعان جاۋىنگەرلەرى ەسكەرتكىشتەرى الدىندا سوعىس ارداگەرلەرىمەن كەزدەسۋ ءوتتى. ارداگەرلەردىڭ قاتىسۋىمەن اقمولا گوسپيتالىندە جاراقاتتاردان قايتىس بولعان جاۋىنگەرلەر ەسكەرتكىشىنە, وتان قورعاۋشىلار الاڭىنداعى ماڭگىلىك الاۋ مونۋمەنتىنە داڭق گيرلياندالارى قويىلدى.
م.گوركي اتىنداعى مەملەكەتتىك اكادەميالىق تەاترى «ەشتەڭە دە ۇمىتىلمايدى» دەگەن قويىلىممەن سۇراپىل سوعىستىڭ اۋىرتپالىعىن ارقاۋ ەتتى. «استانا وپەرا» تەاترى ارتىستەرىنىڭ قاتىسۋىمەن وتكەن تاقىرىپتىق كونتسەرتتەر «قازاقستان» كونتسەرتتىك زالىندا, بەيبىتشىلىك جانە كەلىسىم سارايىندا ءوتتى.
مىڭداعان قايىرىمدى استانالىقتار جەڭىس كۇنىندە كوشەلەرگە شىعىپ, كەڭ كولەمدى «ماڭگىلىك پولك» اكتسياسىنا قاتىستى. ولار وتان ءۇشىن وت كەشكەن, ۇرپاعى بەيبىت ءومىر ءسۇرۋى ءۇشىن جانىن پيدا ەتكەن جاۋىنگەرلەردى قۇرمەتپەن ەسكە الدى. ارداگەرلەرگە ارنالعان جانە سولاردىڭ قاتىسۋىمەن وتكەن شارالار بۇل عانا ەمەس.
قارتتارعا ماتەريالدىق قولداۋ دا جان-جاقتى كورسەتىلدى. استانا قالاسىنىڭ اكىمدىگى مەن ءماسليحاتى ءاربىر سوعىس قاتىسۋشىسىنا ءبىر ميلليون تەڭگەدەن بەردى. ال ارداگەرلەرگە تەڭەستىرىلگەن ازاماتتارعا – 20 مىڭ تەڭگەدەن, تىل ەڭبەككەرلەرىنە – 10 مىڭ تەڭگەدەن, سوعىس ارداگەرلەرىنىڭ جەسىرلەرىنە – 50 مىڭ تەڭگەدەن, قازا بولعان سوعىسقا قاتىسۋشىلاردىڭ ايەلدەرىنە 10 تەڭگەدەن ءبولىندى.
ەلورداداعى 44 ۇيىم ارداگەرلەر كەڭەسىنىڭ ءوتىنىش-تىلەگىن جەرگە قالدىرماي, ارداگەرلەر مەن تىل ەڭبەككەرلەرىنە كوڭىل اۋدارىپ, قولداۋ كورسەتتى. «تسەسنابانك» اق 171 ارداگەرگە 100 مىڭ تەڭگەدەن بەردى. «قازمۇنايگاز» ۇك» اق 81 ارداگەرگە 100 مىڭ تەڭگە ءبولدى. «سامۇرىق ەنەرگو» جشس مەن «دوبرىە دەلا» اتتى استانا قالاسىنىڭ باستاماشىل توبى مۇقتاج جاندارعا 6 مۇگەدەك ارباسىن الىپ بەردى. «رۋحاني قوعام الەمى» قق 53 قارياعا ازىق-تۇلىك بەردى. مۇنداي مىسالداردى كوبىرەك كەلتىرۋگە بولادى.
قالالىق ارداگەرلەر كەڭەسى جەڭىس ءۇشىن كۇرەسكەن باتىرلارعا, تىل ارداگەرلەرىنە بەيجاي قاراماي, كومەك قولىن سوزعان تۇرعىندارعا شىن جۇرەكتەن العىس بىلدىرەدى. ءبىز ارداگەرلەرىمىزدىڭ وجەتتىگىن, قايسارلىعىن ەشقاشان ۇمىتپايمىز. ولاردىڭ ەرلىگى – بۇگىنگى ۇرپاق ءۇشىن ماقتانىش. ارداگەرلەر قانداي قۇرمەتكە دە لايىق. قارتتارىمىزدىڭ قاتارى كۇننەن كۇنگە ازايىپ بارا جاتىر. ءبىز ولارعا جان-جاقتى قولداۋ كورسەتۋگە مىندەتتىمىز. تەك قانا مەرەكە كۇندەرى عانا ەمەس, كۇن سايىن, اسىرەسە, تاۋەلسىزدىگىمىزدىڭ 25 جىلدىعىندا ارداگەرلەرىمىزدى ارداقتاپ, ولاردىڭ ەرلىگىن جادىمىزدا ساقتاپ, جۇرەگىمىزدە ايالاپ وتۋگە ءتيىسپىز.
سانسىزباي ەسىلوۆ,
استانا قالالىق ارداگەرلەر كەڭەسىنىڭ توراعاسى