ساراتوۆ وبلىسىنىڭ استاناداعى كۇندەرى «پەكين پالاس» قوناق ۇيىندە وتكەن سالتاناتتى جيىنمەن جالعاستى. ساراتوۆ وبلىسى مەن قازاقستان رەسپۋبليكاسى اراسىنداعى ساۋدا-ەكونوميكالىق بايلانىستاردى دامىتۋدى كوزدەگەن بيزنەس-ميسسياسىنا رەسەي فەدەراتسياسىنىڭ قازاقستانداعى توتەنشە جانە وكىلەتتى ەلشىسى ميحايل بوچارنيكوۆ, رف قازاقستان رەسپۋبليكاسىنداعى ساۋدا وكىلى الەكساندر ياكوۆلەۆ قاتىستى.
ەلشى مىرزا رەسەي مەن قازاقستاننىڭ ايماقتار جەلىسى بويىنشا قول جەتكىزگەن ىنتىماقتاستىعى ەكى ەل اراسىنداعى ارىپتەستىكتىڭ ماڭىزدى قۇرىلىمى ەكەنىن اتاپ ءوتتى. ول بۇكىل ەدىل جاعالاۋىنىڭ ەكونوميكالىق ءبازيسى مەن مادەنيەتىنىڭ, تاريحىنىڭ مول بايلىعىنىڭ بەينەسى بولىپ تابىلاتىن ساراتوۆ وبلىسىنىڭ استاناداعى بيزنەس قادامىن جىلى قابىلداعانىن ءبىلدىردى. ساراتوۆ وبلىسىنىڭ دەلەگاتسياسى – ەۋرازيالىق ەكونوميكالىق وداق تۋرالى تاريحي كەلىسىمگە قول قويعاننان كەيىن رەسەي جاعىنان العاش رەت ات باسىن تىرەگەن وبلىس ەكەنىن ايتتى. «ءبىز بۇگىندە وسى وقيعانىڭ ماڭىزدىلىعىن سەزىنۋدەمىز. ەندى ءبىز كەلىسىمشارتتارىن بىرلەسە جۇزەگە اسىرىپ, ۇيلەستىرۋ جۇيەسىن قۇرىپ, ونى ناقتى مازمۇنىمەن تولتىرۋىمىز كەرەك» دەيدى ميحايل بوچارنيكوۆ.
ودان كەيىن ءسوز العان استانا قالاسى اكىمىنىڭ ورىنباسارى ۆاسيلي كرىلوۆ ايماقتار دەڭگەيىندەگى ءاربىر بايلانىستىڭ ماڭىزدى ەكەنىن, ەۋرازيالىق ەكونوميكالىق وداق تۋرالى كەلىسىم – وسىنداي كەزدەسۋلەرگە جول اشاتىنىن ايتتى. «ساراتوۆ وبلىسى دەلەگاتسياسىنىڭ استانا قالاسىنا ساپارى – ءبىزدىڭ ايماقتار ءۇشىن جاڭا مۇمكىندىكتەر مەن ايماقارالىق ءوزارا سەرىكتەستىكتىڭ باتىل جوبالارىن جۇزەگە اسىرۋدا ۇلكەن سەرپىن بەرەدى» دەدى اكىم ورىنباسارى. ول سونداي-اق, اكىمشىلىك الەۋەتى تۇرعىسىنان باسقارۋ تەتىكتەرى جولعا قويىلعان كەزدە بيزنەستىڭ كەدەرگىسىز وركەندەۋىنە مۇمكىندىك تۋدىراتىنىن اتاپ ءوتتى. «ءبىزدىڭ ءوزارا بايلانىستارىمىز ەكونوميكالىق كەلىسىمنىڭ شارتتىلىقتارىمەن بەكىتىلسە, ونىڭ ناتيجەسى ءبىزدىڭ ايماقتاردىڭ وركەندەۋىنە الىپ كەلەدى» دەدى ول ويىن تۇجىرىمداپ.
رەسەيدىڭ ەۋروپالىق بولىگىنىڭ وڭتۇستىك-شىعىسىندا ورنالاسقان, ءبىر شەتى ءبىزدىڭ ەلىمىزبەن شەكتەسىپ جاتقان ساراتوۆ وڭىرىنەن كەلگەن رەسمي دەلەگاتسيانىڭ سانى دا, ساناتى دا جوعارى ەكەن. وبلىس گۋبەرناتورى ۆالەري راداەۆ باستاپ كەلگەن قوناقتاردىڭ قاتارىندا وبلىس ۇكىمەتى توراعاسىنىڭ ورىنباسارلارى پاۆەل بولشەدانوۆ, ميحايل گورەمىكو, وبلىستىڭ مادەنيەت ءمينيسترى سۆەتلانا كراسنوششەكوۆا, وبلىستىڭ ينۆەستيتسيالىق ساياسات جانە ەكونوميكالىق دامۋ ءمينيسترى ۆلاديمير پوجاروۆ, تاعى باسقا دا ءوڭىردىڭ بيزنەس وكىلدەرى بولدى.
سالتاناتتى راسىمدە ءسوز العان وبلىس گۋبەرناتورى ۆالەري راداەۆ: «ەۋرازيالىق ەكونوميكالىق وداق قۇرۋ تۋرالى كەلىسىمگە قول قويىلعاننان كەيىن رەسەي فەدەراتسياسىنىڭ سۋبەكتىلەرىنىڭ ىشىندە العاش بولىپ استاناعا كەلىپ جاتقانىمىزدى ۇلكەن قۇرمەت دەپ قابىلدايمىن» دەپ, ساراتوۆ وبلىسى مەن قازاقستان رەسپۋبليكاسى اراسىنداعى ەكونوميكا, عىلىم يننوۆاتسيالىق تەحنولوگيالار مەن نانوتەحنولوگيا, مادەنيەت جانە ساۋدا بايلانىستارىن نىعايتۋداعى كوپ جىلدىق تاجىريبەگە توقتالدى.
اتالمىش شارا شەڭبەرىندە رەسەي فەدەراتسياسىنىڭ قازاقستان رەسپۋبليكاسىنداعى ساۋدا وكىلدىگى مەن ساراتوۆ وبلىسى ۇكىمەتى اراسىنداعى ىنتىماقتاستىق تۋرالى كەلىسىمگە قول قويىلدى.
استانالىق جانە ساراتوۆتىق بيزنەس وكىلدەرى ءوزارا ارىپتەستىك تۋرالى بىرقاتار كەلىسىمدەرگە قول جەتكىزدى. ونىڭ ىشىندە رف روسسەلحوز اكادەمياسىنىڭ وڭتۇستىك-شىعىس اۋىل شارۋاشىلىعى عىلىمي-زەرتتەۋ ينستيتۋتى, «گازپرومماش» زاۋىتى, «رۋبەج» ساۋدا ءۇيى, «ترايتەك» كاسىپورىندارى بار. بۇل كەلىسىمدەر ەكى ەلدىڭ ىسكەرلىك قاۋىمداستىعى اراسىنداعى بايلانىس پەن سەنىمنىڭ نىعايۋىنا اسەر ەتپەك.
قالا جۇرتشىلىعى ساراتوۆ وبلىسىنىڭ استاناداعى كۇندەرى اياسىندا وتكەن ءوڭىردىڭ مادەني قايراتكەرلەرى مەن ونەر ۇجىمدارىنىڭ كۇشىمەن قويىلعان كونتسەرتتى تاماشالادى.
ايگۇل ۋايسوۆا
