سەيىلبەك ۋسين, ۇلى وتان سوعىسىنىڭ ارداگەرى:
– وتكەن 2014 جىلعا بەك ريزامىن! جەرىمىز امان, ەلىمىز تىنىش, تۇرمىسىمىز جاقسى بولدى. پرەزيدەنتىمىز نۇرسۇلتان نازارباەۆتىڭ دانا باسشىلىعىنىڭ ارقاسىندا تاۋەلسىزدىگىمىز نىعايىپ, ەكونوميكامىز تۇراقتى دامىدى. الەمدىك ەكونوميكالىق داعدارىسقا قاراماي مەملەكەتتىك قىزمەتكەرلەر ايلىقتارىن, ال ءبىز زەينەتاقىلارىمىزدى بۇرىنعىداي تولىق كولەمدە الىپ كەلەمىز. حالىقارالىق جاعدايىمىز دا جامان ەمەس. ءبىر كەزدە ەۋروپانىڭ تەرەزەسىنەن سىعالايتىن ەدىك. ال قازىر ەۋروپانىڭ تورىنە شىعىپ وتىرمىز. بۇل – ۇلكەن جەتىستىك. پرەزيدەنتىمىز بارعان ەلدەرىندە قازاقستاندى, قازاق حالقىن دۇنيە جۇزىنە پاش ەتىپ ءجۇر.
ەلىمىزدىڭ ازاماتى رەتىندە ءوزىم تۋرالى ايتسام, جاسىم – بۇگىندە 94-تە. جەتى بالام, ون توعىز نەمەرەم, توعىز شوبەرەم بار. بۇلاردىڭ كەلەشەكتەرىنە ءتىپتى دە الاڭدامايمىن. سەبەبى, حالىقتىڭ تۇرمىس-تىرشىلىگى جىل سايىن جاقسارا بەرەتىنىنە نىق سەنەمىن. ەلباسىمىزدىڭ سىرتقى جانە ىشكى ساياساتىن تولىق قولدايمىن. ول – ساياسات اڭساعان ارمانىمىزعا, اسىل مۇراتىمىزعا جەتكىزەتىن بىردەن-ءبىر دۇرىس جول. پرەزيدەنت ءوزىنىڭ باسشىلىق مول تاجىريبەسىن, ءبىلىمى مەن كۇش قايراتىن وتانىمىزدىڭ يگىلىگىنە ايانباي جۇمساپ كەلەدى. وعان كوپ راحمەت ايتامىز.
كۇنى كەشە استانا قالاسىنىڭ اكىمى ادىلبەك جاقسىبەكوۆ ۇلى وتان سوعىسىنىڭ ارداگەرلەرىن مەرەكەمەن قۇتتىقتادى. وتە ريزا بولدىق. مەن دە بارشا وتانداستارىما زور دەنساۋلىق, ۇزاق عۇمىر, بايلىق پەن باقىت تىلەيمىن!
دۇكەن ماسىمحانۇلى,اقىن, فيلولوگيا عىلىمىنىڭ دوكتورى, پروفەسسور:
– جالپى, «ەلدە بولسا, ەرىنگە تيەدى» دەيدى اتام قازاق. ەڭ اۋەلى 2014 جىل تۇتاس ەلىمىز ءۇشىن دە بەرەكەلى, تابىستى, شۋاقتى, باقۋاتتى جىل بولدى! سول جاقسىلىقتان وسى ەلدىڭ ءبىر ازاماتى رەتىندە ءبىز دە قۇر قالعان جوقپىز. سونىڭ باستىلارىن اتاپ ايتسام, قىزىم عايني ۇبت-دان 124 بالل جيناپ, استانا قالاسىنداعى №48 مەكتەپ-ليتسەيىن «التىن بەلگىمەن» ءبىتىرىپ, ل.ن.گۋميلەۆ اتىنداعى ەۇۋ حالىقارالىق قاتىناستار ماماندىعىنا قابىلداندى. ۇرپاقتىڭ قۋانىشىنان ارتىق نە بولۋى مۇمكىن؟! 2014 جىلدىڭ بىزگە سىيلاعان ەڭ ۇلكەن سىيى – وسى.
«ناۋبايشىمەن سويلەسسەڭ, تاندىرى مەن قامىرىن ايتادى» دەگەندەي, ءبىز دە قال–قادەرىمىزشە عىلىم-ءبىلىم سالاسىندا, ادەبي شىعارماشىلىق سالاسىندا ەڭبەك ەتىپ جۇرگەندىكتەن, ءاربىر جىلدى وسى سالاداعى اتقارىلعان, ورىندالعان جۇمىستار اۋقىمىمەن باعالايمىز. بۇل تۇرعىسىنان كەلگەندە 2014 جىل تابىسسىز ەمەسپىز. «فوليانت» باسپاسىنان «قازاقستان تاريحشىلارى ۇلتتىق كونگرەسى كىتاپحاناسى» سەرياسىمەن, «قىتاي تۋرالى
قىرىق ءسوز» دەگەن اتپەن عىلىمي-زەرتتەۋ ماقالالارىم, «ءوز اسپانىم وزىمدە» اتتى جىر جيناعىم, «ازاتتىعىم مەن قازاقتىعىم» دەگەن اتپەن كوسەمسوز بەن پالساپالىق تولعامدارىم جارىققا شىقتى. سونداي-اق, وسى جىلى قحر ءۇرىمجى قالاسىنداعى «شىنجاڭ حالىق باسپاسىنان» «مۇحتار اۋەزوۆ جانە لۋ ءشۇن» اتتى مونوگرافيامىز ا.بايتۇرسىنۇلى الىپبيىمەن (توتە جازۋ) جارىققا شىعىپ, ارعى بەتتەگى اعايىنداردىڭ رۋحاني يگىلىگىنە اينالدى. ال وسى جىلدىڭ قازان ايىندا 50 جاسقا تولۋىما وراي ل.ن.گۋميلەۆ اتىنداعى ەۇۋ باسشىلىعىنىڭ ۇيىمداستىرۋىمەن ەلىمىزدە تۇڭعىش رەت قىتايتانۋ عىلىمىنا قاتىستى «قازاقستانداعى قىتايتانۋ عىلىمى: تاريحى, بۇگىنى مەن بولاشاعى» اتتى حالىقارالىق عىلىمي-تاجىريبەلىك كونفەرەنتسيا ءوتتى. عىلىمي جيىنعا تۇركيا, قحر,
رەسەي سەكىلدى شەتەلدەردەن, ەلىمىزدىڭ تۇكپىر-تۇكپىرىنەن بەدەلدى-بەدەلدى قىتايتانۋشى عالىمدار قاتىسىپ, قىتايتانۋدىڭ وزەكتى ماسەلەلەرى مەن ءبىزدىڭ شىعارماشىلىعىمىزعا قاتىستى ماڭىزدى باياندامالار جاسادى. ەلباسىمىز ن.نازارباەۆتان باستاپ ءبىراز ەل اعالارى ارنايى قۇتتىقتاۋ جىبەردى.
قىسقاسى, ەلىمە كەلىپ ەلەۋلى بولسام, وتانعا كەلىپ ولجالى بولسام, اتاجۇرتقا كەلىپ اتاقتى بولسام, وسىنىڭ ءبارى, ارينە, تەك قانا تاۋەلسىزدىكتىڭ ارقاسى. سول ءۇشىن دە مىڭ-مىڭ تاۋبە!
