حالىقارالىق بەيبىتشىلىك كۇنىنە وراي م.وتەمىسۇلى اتىنداعى وقۋشىلار سارايىندا قامقورشىلار سلەتى ءوتتى. شارا بارىسىندا ەلورداداعى ۇزدىك قامقورشى وتباسىلارى ارنايى العىس حاتتارمەن ماراپاتتالدى. «ءبىز بىرگە بولعاندا» تاقىرىبىمەن سۋرەت كورمەسى قويىلدى. وندا وزگە جانۇيادان جان جىلۋىن تاپقان جەتكىنشەكتەردىڭ تۋىندىلارى ۇسىنىلعان. سالتاناتتى كەشتەن سوڭ, استانا قالاسى بالالار قۇقىعىن قورعاۋ دەپارتامەنتىنىڭ ديرەكتورى رىستى جۇمابەكوۆامەن از-كەم تىلدەسىپ قالعانبىز…
– رىستى ماعاۋياقىزى, شارانىڭ ماڭىزىنا توقتالىڭىزشى.
– اتا-انانىڭ قامقورلىعىنسىز قالعان بالانى باعىپ-قاعۋ – ءارى قيىن, ءارى جاۋاپتى ءىس. سلەت اياسىندا استاناداعى وسىنداي جانۇيالاردىڭ جاعدايىمەن تانىسىپ, بالالار قانداي ءتالىم-تاربيە الۋدا, قالاي ءومىر سۇرۋدە, قانداي قيىندىقتارى بار دەگەن ماسەلەلەردى كوتەرۋدى ماقسات تۇتتىق. سونىمەن قاتار, مەكتەپتەگى جاي-كۇيى قانداي؟.. سوندىقتان بۇل باسقوسۋعا ءبىلىم باسقارماسى دا اتسالىسۋدا.
– قامقورشى وتباسىلاردىڭ كوبى قانشا بالادان تاربيەسىنە العان؟
– وسىندا ءىز سالعان ءار وتباسىندا كەمى ەكى-ءۇش بالادان تاربيەلەنۋدە. جەتىمىن ەجەلدەن جىلاتپاعان ەلمىز. وسى قاعيدانى بۇگىن دە ساناسىنان شىعارماي تۋ ەتكەندەر جەتەرلىك. بىلتىرلارى ەلوردادا 456 وتباسى بالا اسىراپ السا, بۇل كورسەتكىش بيىل 470-تەن اسىپ جىعىلادى.
– «وگەي» اتا-انالار تاراپىنان بالانى ۇرىپ-سوعىپ, كەرى قاباق تانىتۋشىلار بولا ما؟
– ءبىزدىڭ مەكەمەنىڭ اشىلعانىنا, قامكوڭىل بۇلدىرشىندەردى قاناتىنىڭ استىنا العانىنا بەس جىلدىڭ ءجۇزى بولدى. وسى ۋاقىتتا ءسىز ايتقان كەلەڭسىز جايتتار كەزدەسكەن ەمەس.
– مامانداردىڭ اۋزىنان بالالار ءۇيىنىڭ سانى قىسقارۋدا دەگەندى ەستيمىز…
– بالالار ۇيىندە تاربيەلەنۋشىلەر سانى ازايىپ جاتقانى راس. ءتىپتى, ونداي مەكەمەنىڭ بولماعانى جاقسى عوي, ەگەر جەتىمدەرىمىز بولماسا… ال ونداعى جاسوسپىرىمدەردىڭ سەكسەن پايىزى – الەۋمەتتىك جەتىمدەر. سوڭعى ءبىر جىلدىڭ وزىندە ءبىز ون ءبىر بالانى تۋعان اتا-انالارىنا قايتاردىق. ويتكەنى, ولاردىڭ ءوز بالالارىن باۋىرلارىنا باسۋعا قابىلەتتى ەكەندەرى راستالدى, انىقتالدى. ون سەگىز بالانى باسقا وتباسىلار قامقورلىعىنا الدى.
