تۇرعىن ۇيدەگى جىلىتۋدى كومىردەن كوگىلدىر وتىنعا اۋىستىرۋ كەزىندە حالىقتىڭ الەۋمەتتىك وسال توپتارى ءۇشىن ماتەريالدىق كومەك قاراستىرىلعان. الماتى اۋدانىنداعى 250 وتباسىنىڭ 230-عا جۋىعى وسىنداي جەڭىلدىكتى پايدالانىپ وتىر. قالالىق ءماسليحاتتىڭ شەشىمى بويىنشا قالا بيۋدجەتىنەن وسى ماقساتتا 103 ملن تەڭگە بولىنگەن بولاتىن.
نۇر-سۇلتان قالاسى ءماسليحاتىنىڭ حاتشىسى ەرلان كاناليموۆتىڭ ايتۋىنشا جىل باسىنان بەرى ەلوردانىڭ 16 الەۋمەتتىك نىسانى گازعا قوسىلعان. دەپۋتاتتار بەكىتكەن اقشالاي وتەماقى مولشەرى 163 مىڭ تەڭگە ەمەس, 430 مىڭ تەڭگەگە تەڭەلدى. سونىمەن قاتار, تۇرعىنداردىڭ گازعا قوسىلۋ ءۇشىن جينايتىن ءتيىستى قۇجاتتارىنىڭ ءتىزىمى قىسقارتىلدى.
الماتى اۋدانىنا قاراستى ەلدى مەكەندەردە تۇراتىن الەۋمەتتىك وسال توپتاعى ءدال وسىنداي كومەككە ءزارۋ ءالى 700-گە جۋىق تۇرعىن بار. نۇر-سۇلتان قالاسىنىڭ جۇمىسپەن قامتۋ جانە حالىقتى الەۋمەتتىك قورعاۋ باسقارماسىنا اۋدان اكىمدىكتەرىمەن بىرلەسە وتىرىپ, الداعى بيۋدجەتتى ناقتىلاۋ كەزىندە قاجەتتى سومانى قاراستىرىپ, ءبولۋ ءۇشىن جەڭىلدىكپەن قوسىلۋدى قاجەت ەتەتىندەرگە تولىق تالداۋ جاساۋ تاپسىرىلدى. سونداي-اق قالا تۇرعىندارى اراسىندا اقپاراتتىق جۇمىستى كۇشەيتۋ كەرەك-اق.
شىنتۋايتىنا كەلگەندە, جىلىتۋدى گازعا كوشىرۋ قورشاعان ورتا ءۇشىن عانا ەمەس, قالا بيۋدجەتىنە دە الدەقايدا ءتيىمدى. قالا باسشىسىنىڭ ايتۋىنشا گازداندىرۋ ەلوردا بيۋدجەتىن 3,5 ەسە ۇنەمدەۋگە مۇمكىندىك بەرەدى ەكەن. ەگەر بۇرىن جىلۋ بەرۋ ماۋسىمىندا بۇل نىساندار 1 ميلليارد 420 ميلليونعا ديزەلدىك وتىندى تۇتىنسا, ەندى شىعىن 440 ميلليوننان اسپايتىنىن ايتادى سالا ماماندارى.
بۇگىندە الماتى جانە سارىارقا اۋداندارىندا جەلىلەردى سالۋ تولىعىمەن اياقتالدى. بۇل – 10 تۇرعىن الابى. ناتيجەسىندە ەلوردانىڭ 14 مىڭنان استام ابونەنتى گازبەن جابدىقتاۋ جۇيەسىنە قول جەتكىزدى. سونىڭ ىشىندە 5 مىڭنان استام ابونەنت قازىرگى ۋاقىتتا تولىق گازعا قوسىلدى.
بيىل بايقوڭىر جانە ەسىل اۋداندارىندا گازداندىرۋ جۇمىستارى جۇرگىزىلۋدە. سونىمەن بىرگە 1-جەو مەن 2-جەو-دا بارلىق 13 سۋ جىلىتۋ قازاندىقتارى گازعا اۋىستىرىلدى.
