عالياش ءامرينا, №54 مەكتەپ – ليتسەيدىڭ ديرەكتورى, «ەرەن ەڭبەگى ءۇشىن», ى.التىنسارين اتىنداعى جانە ءتىل جاناشىرى بەلگىسىنىڭ يەگەرى: تامىز كەڭەسى — كەرەمەت تالقى
– عالياش قۋانىشبەكقىزى, تامىز كەڭەسىندە كوتەرىلگەن ماسەلەلەردى قالاي باعالايسىز؟
– تامىز كەڭەسى – جىل سايىنعى پەداگوگ قاۋىمنىڭ باس قوساتىن كەلەلى جيىنى. جاڭا وقۋ جىلى قارساڭىندا قوردالانعان ماسەلەلەر كوتەرىلەدى, جەتكەن جەتىستىكتەر ساراپقا سالىنادى. ولاردىڭ ءار قايسىسى وزدىگىنشە ماڭىزدى. بيىلعى كەڭەستە جەكەمەنشىك بالاباقشالار احۋالى, كاسىپتىك ءبىلىم بەرۋ جۇيەسىن جەتىلدىرۋ, جالپى ءبىلىم ساپاسىن جاڭا كوزقاراستا, جاڭاشىلدىقتا دامىتۋ قاجەتتىلىگى ايتىلدى. وسى باعىتتا ءار ءبىلىم وشاعى لايىقتى دەڭگەيدە ىزدەنىپ, ۇرپاق الدىنداعى بورىشىن وتەۋگە بارىن سالادى دەپ ويلايمىن. ۇستازدار – قوعامنىڭ بولىنبەس بولشەگى, ادامزات الدىندا ۇلاعاتى كوپ جاندار دەپ بىلەم. ءبىزدىڭ قالادا دا ولاردىڭ تۇبەگەيلى ساپالى ءبىلىم بەرۋى جۇيەلى تۇردە قالىپتاسىپ كەلەدى. قانشاما مەكتەپ-ليتسەيلەر, مەكتەپ-گيمنازيالار اشىلىپ جاتىر. ولاردىڭ تۇلەكتەرى ەلىمىزدىڭ ماڭداي الدى جوعارى وقۋ ورىندارىنىڭ گرانتىن جەڭىپ السا, كوپتەگەن بىتىرۋشىلەر شەتەلدىڭ مىقتى وقۋ وردالارىنىڭ ستۋدەنتتەرى اتانۋدا. بۇل ءبىلىم سالاسىنداعى ايتارلىق جەتىستىك. ەندىگى مەجە – نەگىزگى تالاپتاردى ساپالى تۇردە جۇزەگە اسىرۋ.
– استانا قالاسىنىڭ اكىمى يمانعالي تاسماعامبەتوۆ بىرقاتار سىن-ەسكەرتپەلەر ايتتى. كوزقاراسىڭىزدى بىلدىرە كەتسەڭىز…
– يمانعالي نۇرعاليۇلى جىلدا تامىز كەڭەسىنە ۇلكەن دايىندىقپەن كەلەدى. ءوز باسىم ول كىسىنىڭ ايتار ويىن اسىعا كۇتەم. ءوزى دە ءومىر جولىن پەداگوگيكادان باستاعاننان شىعار, ۇستازدار قاۋىمىنا زور ىلتيپاتپەن قارايدى. بىرنەشە اۋىر سىندار ايتىلدى. ورىن العان كەلەڭسىزدىكتەر قايتالانبايدى دەپ سەنەمىن. ونىڭ بارلىعىن كەلەشەكتە بولدىرماۋ كەرەك. ەكىنشى جاعىنان, سىن بولماسا, ورلەۋ دە بولمايتىن شىعار. سىندى كوتەرە وتىرىپ جاقسارۋعا, ورىستەۋگە, الداعى بيىك ماقساتتارعا جاڭا تالپىنىستار جاسايمىز. بۇدان بىلاي ءار مۇعالىم ءوزىنىڭ ىسىنە ەكى ەسە جاۋاپكەرشىلىكپەن قاراپ, وقۋشىلارىن جاقسىلىققا باۋلي وتىرىپ, ۇلگى بولارلىق ۇلاعات كورسەتەتىن اسقاق تۇعىرىن الاسارتپاس دەپ ءۇمىت ۇكىلەيمىز.
– جاڭا وقۋ جىلىنا دايىندىقتارىڭىز قانداي؟
– جازعى دەمالىس بىتەر-بىتپەستەن مەكتەپ ۇجىمى مەملەكەتتىك ستاندارتقا ساي ءبىلىم بەرۋدى ماقسات تۇتىپ, جىلدىق جوسپار قۇردىق. ەڭ نەگىزگى جوسپارىمىز – ءاردايىم وقۋشىلارعا ساپالى ءبىلىم بەرۋ. وقۋ جىلى كونستيتۋتسيا كۇنىمەن ورايلاس باستالادى. وسى مەرەكەلىك ءىس-شارالارىمىز 1 قىركۇيەك – ءبىلىم كۇنىندە ءوز جالعاسىن تاپپاق. ايتا كەتەتىن ءبىر جايت, لوندونداعى XXX وليمپيادا ويىندارىنا ءبىزدىڭ دانيار ەلەۋسىنوۆ اتتى وقۋشىمىز بوكستان ەلىمىزدىڭ نامىسىن قورعادى. ءبىز وقۋشىلارىمىزعا ونى ۇلگى ەتەمىز.
– جالپى وسى جىلعى قورىتىندى بويىنشا وقۋشىلاردىڭ ءبىلىم دارەجەسى قانداي؟
– ءبىزدىڭ پەداگوگيكالىق ۇجىم ءبىلىم مەن تاربيەدە ءوز ىستەرىنىڭ بىلىكتى ماماندارى. ءبىلىم كورسەتكىشىن جىلدان-جىلعا جاقسارتىپ كەلەمىز. وسى جىلى 85 تۇلەگىمىز مەكتەپتەن العان بىلىمدەرىن ودان ءارى جالعاستىرماق. ماسەلەن, ون شاقتى تۇلەگىمىز شەت ەلدىڭ گرانتتارىن ۇتىپ السا, 11 تۇلەك ەلىمىزدەگى گرانت يەگەرلەرى اتانىپ, ءبىزدى قۋانتىپ جاتىر.
– «مەكتەپكە جول» جوباسى بويىنشا ءىس- شارالار قارقىندى جالعاسۋدا, وسى جايلى قىسقاشا توقتالىپ وتسەڭىز؟
– بۇل باعدارلاما وتباسى جاعدايلارى ناشار, از قامتىلعان, جەتىم قالعان بالالارعا كومەك رەتىندە ۇيىمداستىرىلىپ وتىر. 100 بالاعا 160 مىڭنىڭ كولەمىندە كەڭسە تاۋارلارى, 500 مىڭ تەڭگەنىڭ كولەمىندە كيىم-كەشەك الىندى. مەكتەپ وقۋلىقتارىن تەگىن تاراتتىق.
– اڭگىمەڭىزگە راحمەت!
ماريا ايدارباەۆا
