«حالىق بانكى» قارتتارعا قۇرمەت كورسەتتى
كوكتەمنىڭ جارقىن مەرەكەسى – ناۋرىز مەيرامىن «قازاقستان حالىق بانكى» اق استانا وڭىرلىك فيليالىنىڭ قىزمەتكەرلەرى ەلوردالىقتارمەن بىرگە قارسى الدى.
ۇلىستىڭ ۇلى كۇنىندە «قازاقستان حالىق بانكى» اق استانا ءوڭىرلىك فيليالى دا «قازاق ەلى» مونۋمەنتىنىڭ الدىنا اقشاڭقان كيىز ءۇي تىگىپ, اتا-بابا سالتىمەن باس شاھار تۇرعىندارى مەن قالا قوناقتارىنا ارناپ مەرەكەلىك داستارحان جايدى.
حالقىمىزدىڭ سۇيىكتى مەيرامىنا اينالعان جىل باسى – ناۋرىز تويى كۇنى تاۋەلسىزدىك داڭعىلىنىڭ بويىنا ورنالاسقان «قازاق ەلى» مونۋمەنتى ماڭىنا اعىلعاندار از بولمادى. ولاردىڭ اراسىندا ەڭبەك ارداگەرلەرى مەن قاريالاردىڭ قاراسى كوپ بولدى. ۇلىستىڭ ۇلى كۇنىنە ارنالعان دۋماندا «قازاقستان حالىق بانكى» اق استانا وڭىرلىك فيليالىنىڭ ديرەكتورى نۇرلىبەك ەرجىگىتۇلى سەيداحمەت قازىنا قارتتارىمىز – اقساقالدارىمىز بەن ۇلى وتان سوعىسىنىڭ ارداگەرلەرىن, جالپى مەرەكەنى تاماشالاۋعا جينالعان بارلىق اعايىندى ناۋرىز مەيرامىمەن قۇتتىقتاپ, ولارعا ايرىقشا قۇرمەت كورسەتتى.
ناۋرىز – دوستىقتىڭ, ىنتىماق پەن ىرىستىڭ, بەرەكەنىڭ, جاڭارۋدىڭ مەرەكەسى, حالىقتار بىرلىگى مەن تاتۋلىعىنىڭ باستاۋى. سوندىقتان دا, بۇل مەيرام ءبىر ۇلتقا عانا ەمەس, جالپى جۇرتشىلىققا ورتاق بولىپ, ۇلىستاردىڭ ۇيىتقى بولۋىمەن شىن پەيىلدەگى جالپىحالىقتىڭ مەيرامىنا اينالىپ كەلە جاتقانىن تىلگە تيەك ەتكەن ن.سەيداحمەت داستارحان باسىنا جينالعان جاماعاتقا جاقسىلىق, دەندەرىنە ساۋلىق, وتباستارىنا بەرەكە-بىرلىك, ىنتىماق پەن ىرىس تىلەدى. ۇلكەندەر جاعى بانك ۇجىمىنا شىنايى العىستارىن جەتكىزىپ, باتا بەردى. ءسويتىپ, مەرەيلى مەرەكەدە كيىز ۇيگە باس سۇققان ءار ادام قىمىز بەن ناۋرىز كوجەدەن ءدام تاتىپ, داستارحانعا توگىلگەن باۋىرساقتان, سونداي-اق, جەنت, ىرىمشىك, قۇرت سەكىلدى باسقا دا ۇلتتىق تاعامنىڭ الۋان تۇرىنەن اۋىز ءتيدى.
ۇلتتىق ناقىشتا بەزەندىرىلگەن كيىز ءۇيدىڭ ءىشى حالقىمىزدىڭ كۇندەلىكتى تۇرمىسقا قاجەتتى قۇرال-سايماندارى مەن ويۋلى بۇيىمدارىنا تولعان. قولدان ورىلگەن قامشى مەن ۇكىلى دومبىرا توردەن ورىن العان. ودان ءارى قاتار-قاتار ىلىنگەن ساۋىت, ەرتوقىم, ورنەكتى بەلدىكتەر كوزدىڭ جاۋىن الادى.
كۇن مەن ءتۇننىڭ تەڭەلىپ, جان-دۇنيەنى تىرىلتكەن, شارۋانىڭ ءبىر مالى ەكەۋ بولىپ, ارقا-باسى كەڭىپ, اققا اۋزى تيگەن, قىتىمىر قىستىڭ ىزعارىنان قۇتىلىپ, الداعى شۋاقتى كۇندەردەن ۇمىتتەندىرگەن ناۋرىز مەرەكەسى ەجەلدەن حالىقتىق مەرەكە بولاتىن. بۇل مەرەكە ءار ۋاقىتتا حالقىمىزدا ىرگەسى سوگىلمەگەن ءبىرلىكتىڭ, ەڭسەلى ەرلىكتىڭ, ىرىس پەن باق-بەرەكەنىڭ مەرەكەسى بولىپ سانالاتىن.
جالپى, بيىلعى جىل – «قازاقستان حالىق بانكى» ءۇشىن ەرەكشە جىل. بۇعان دەيىن حابارلاعانىمىزداي, بيىل «قازاقستان حالىق بانكى» اق-نىڭ قۇرىلعانىنا 90 جىل تولىپ وتىر. وسىعان وراي, ۇستىمىزدەگى جىلدىڭ باسىنان بەرى ءار اي سايىن بانكتىڭ مەرەيتويىنا ورايلاستىرىلعان شارالار جالعاسىن تابۋدا. ماسەلەن, قاڭتار ايىندا بانكتىڭ استانا قالالىق فيليالى «الاۋ» مۇز ايدىنىندا «حالىق ستارت» اكتسياسىن ۇيىمداستىرىپ, وعان وسىنداعى مەكتەپ وقۋشىلارى, بالالار ۇيلەرىنىڭ تاربەلەنۋشىلەرى قاتىستى. ءارتۇرلى جارىستاردا جۇلدەگەر دەپ تانىلعان بالالار سىي-سياپاتقا يە بولىپ, مارە-سارە كۇيدە تارقاسسا, وسىنداي يگى شارانىڭ ءبىرى اقپان ايىندا ەلوردامىزداعى «تىلەپ قوبىز» سارايىندا جالعاستى. بۇل جولى «حالىق ونەرى» باعدارلاماسى اياسىندا بانكتىڭ دەمەۋشىلىگىمەن اتالمىش سارايدىڭ «كوك تۇركىلەر» فولكلورلىق انسامبلى كوپشىلىككە ءوز ونەرىن ۇسىندى. كونتسەرتكە ارنايى شاقىرىلعان قوناقتار قاتارىندا بانك كليەنتتەرى: ارداگەرلەر مەن زەينەتكەرلەر, مەكتەپ مۇعالىمدەرى مەن اق حالاتتى ابزال جاندار, ياعني مەديتسينا قىزمەتكەرلەرى بولدى. كوپشىلىكتى مەرەيتويىمەن ورتاقتاسۋعا شاقىرعان «حالىق بانكىنىڭ» باسشىلىعى وسىنداي يگىلىكتى شارالاردى الداعى ۋاقىتتا دا جالعاستىراتىنىن جەتكىزدى.
گۇلبارشىن وكەشقىزى