استانا قالاسى ءماسليحاتىنىڭ كەزەكتى سەسسياسىنا دايىندالۋ اياسىندا حالىق قالاۋلىلارى ەلوردامىزداعى «LED Solution» جاۋاپكەرشىلىگى شەكتەۋلى سەرىكتەستىگى مەن «تاكەنوۆ» جەكەمەنشىك كاسىپورنىندا بولىپ, ولاردىڭ تىنىس-تىرشىلىگىمەن تانىستى.
ءماسليحاتتىڭ الداعى سەسسياسىندا «ەلورداداعى شاعىن جانە ورتا بيزنەستى قولداۋ جانە دامىتۋدىڭ جاي-كۇيى مەن بارىسى تۋرالى» ماسەلە قاراستىرىلماقشى. وسىعان وراي, استانا قالاسى كاسىپكەرلىك جانە ونەركاسىپ باسقارماسى باسشىسىنىڭ ورىنباسارى رىسكۇل قاۋعاباەۆا باس شاھارداعى كاسىپكەرلىك نىساندارىن دەپۋتاتتارمەن بىرگە ارالادى.
ونىڭ ايتۋىنشا, بۇگىنگى تاڭدا باس قالادا 165 مىڭ ادام شاعىن جانە ورتا كاسىپكەرلىك سالاسىندا جۇمىس ىستەپ ءجۇر. ياعني, ەكونوميكالىق بەلسەندى حالىقتىڭ شامامەن 40 پايىزى شاعىن جانە ورتا بيزنەس-پەن اينالىسۋدا. ولار 1 ترلن 52 ملرد تەڭگەنىڭ ءونىمىن شىعاردى جانە قىزمەتتەرىن كورسەتكەن. بۇل وتكەن جىلدىڭ سايكەس كەزەڭىمەن سالىستىرعاندا 18,6 پايىزعا ارتىق.
جالپى, شاعىن جانە ورتا كاسىپكەرلىكتى دامىتۋ كەز كەلگەن ەل ەكونوميكاسىنىڭ نەگىزى ەكەنى بەلگىلى. بۇل رەتتە دامىعان ەلدەردىڭ ءتاجىريبەلەرى كورسەتىپ وتىرعانداي, شاعىن جانە ورتا بيزنەستى قالىپتاستىرۋ مەن دامىتۋ ەكونوميكانى نىعايتۋ ءۇشىن قولايلى العىشارتتار جاسايدى.
پرەزيدەنت ن.نازارباەۆ قازاقستان حالقىنا جولداۋىندا: «جاپونيا, گەرمانيا, بەلگيا, يتاليا سياقتى ەلدەردە شاعىن جانە ورتا بيزنەس ولاردىڭ بارلىق كاسىپورىندارى سانىنىڭ 90 پايىزدان استامىن قۇرايدى, كوپتەگەن دامىعان ەلدەردە ولار جالپى ىشكى ءونىمنىڭ 50 پايىزدان استامىن بەرەدى. سوندىقتان دا ءبىزدىڭ شاعىن ءجانە ورتا كاسىپكەرلىكتى دامىتۋدىڭ ءتۇبىرىنەن جاڭا يدەولوگياسىن ءتۇزۋىمىز قاجەت. بۇل كاسىپكەرلىك ورتانىڭ باستاماشىلىعىن ىسكە اسىرۋ ءۇشىن قولايلى جاعداي تۋعىزۋىمىز كەرەك» دەپ ايتقان بولاتىن. راسىندا دا, بۇگىنگى تاڭدا ءاربىر ىسكەر قازاقستاندىق وسى ورتاعا كىرىگىپ, يننوۆاتسيالىق ەكونوميكاداعى ءوز ورنىن تابۋعا ءتيىس. وسىعان وراي, وتانداستارىمىزدىڭ باستاماشىلىعىنا كەڭ ءورىس اشۋ ءۇشىن ەلىمىزدە بارلىق جاعداي جاسالدى, كاسىپكەرلەر ەندىگى جەردە وسى مۇمكىندىكتەردى ۇتىمدى پايدالانىپ ءجۇر.
قالامىزدا «بيزنەستىڭ جول كارتاسى – 2020» باعدارلاماسى جۇزەگە اسىرىلۋدا. سول بويىنشا 6 مىڭنان استام كاسىپكەر قامتىلعان. ەلوردا اكىمدىگى جانىنداعى استانا قالاسىن جەدەلدەتىلگەن يندۋستريالدى-يننوۆاتسيالىق دامىتۋ جونىندەگى ۇيلەستىرۋ كەڭەسى باعدارلامانى ىسكە اسىرۋ بارىسىندا جالپى سوماسى 38 911,5 ملن تەڭگەنى قۇرايتىن 195 جوبانى ماقۇلدادى. ونىڭ ىشىندە جوعارىدا اتالعان كاسىپورىنداردىڭ دا جوبالارى بار.
دەپۋتاتتار وسىدان كەيىن «LED Solution» جشس-نە ات باسىن تىرەدى. مەكەمە باسشىسى قانىبەك ايتاقوۆ مۇندا قالاداعى ونەركاسىپتىك كاسىپورىنداردا, سپورت ورتالىقتارىندا, مەديتسينالىق مەكەمەلەردە, كوشەنى جارىقتاندىرۋدا جانە باسقا سالالاردا قولدانىلاتىن ساپالى سۆەتوديودتى ونىممەن قازاقستاندىق نارىقتى قامتاماسىز ەتۋ بويىنشا جوبا ەنگىزىلگەنىن ايتتى. سونىڭ ءناتيجەسىندە وسى مەكەمەدە 20-دان استام جۇمىس ورىنى اشىلعان. كاسىپورىن جىلىنا 60 مىڭ دانا سۆەتوديود شىعارادى ەكەن.
بۇدان كەيىن قالالىق ءماسليحاتتىڭ دەپۋتاتتارى ەلورداداعى «استاناەكوستاندارت» جانە «ستالتسينك» جاۋاپكەرشىلىگى شەكتەۋلى سەرىكتەستىكتەرىندە بولدى. بۇل كاسىپورىندار دا اۋقىمدى جۇمىستار اتقارۋدا. 2011 جىلى قولجەتىمدى باعامەن ساپالى ازىق-تۇلىك ءونىمدەرىن ءوسىرۋ ءۇشىن «استاناەكوستاندارت» جشس جەمىس-كوكونىس ءونىمىن ءوندىرۋ جانە وڭدەۋ» جوباسى ىسكە قوسىلعان بولاتىن. مىنە, سودان بەرى اتالمىش كاسىپورىن قالا تۇرعىندارىن جىلدىڭ ءتورت مەزگىلىندە دە كوكونىسپەن قامتاماسىز ەتۋ ماقساتىندا ايانباي ەڭبەك ەتىپ كەلەدى. ەلوردانىڭ ازىق-تۇلىك قاۋىپسىزدىگىن قامتاماسىز ەتۋگە باعىتتالعان بۇل جوبا ىسكە قوسىلعالى بەرى جاڭا جۇمىس ورىندارى كوپتەپ اشىلۋدا. سونىڭ ناتيجەسىندە قالاداعى جۇمىسسىز ازاماتتاردىڭ ەڭبەككە ورنالاسىپ, «ەكى قولعا – ءبىر جۇمىس» تابۋلارىنا مۇمكىندىك تۋدى.
ال, «ستالتسينك» جشس شىعاراتىن مەتالدىق ءونىم قۇرىلىستا, ونەركاسىپتە, ماشينا جانە ۆاگون قۇراستىرۋدا, جيھاز قۇرىلىسىندا كەڭىنەن قولدانىلادى. اتالعان جوبا 2011 جىلى ىسكە اسىرىلعان بولاتىن. سودان بەرى مۇندا 46 جۇمىس ورنى اشىلىپتى. بۇگىنگى كۇنى جوبالىق قۋاتتىلىققا شىعۋ كەستەسىنە سايكەس, كاسىپورىنداعىلار تەگىس جۇمىسپەن قامتىلعان. وسىلايشا, ءبىز قالا اكىمدىگىنىڭ ەلوردادا كاسىپكەرلىكتى تۇراقتى جانە سەرپىندى دامىتۋ ءۇشىن قولايلى جاعدايلار جاساپ جاتقاندىعىنا كۋا بولدىق.
نىسانداردى ارالاۋعا استانا قالاسى ءماسليحاتىنىڭ حاتشىسى س.ەسىلوۆ, ءماسليحات دەپۋتاتتارىمەن بىرگە ەلوردالىق بۇقارالىق اقپارات قۇرالدارىنىڭ وكىلدەرى قاتىستى.
كەزدەسۋ بارىسىندا ۇجىمداردا كەلەلى ماسەلەلەر كەڭىنەن ءسوز بولدى. ولار الداعى ۋاقىتتا وتەتىن دوڭگەلەك ۇستەلدە جانە قالالىق ءماسليحاتتىڭ سەسسياسىندا تالقىلاناتىن بولادى.
