قالا اكىمدىگىنىڭ سايتىنداعى «حالىقتىق باقىلاۋ» جانە «ۆيرتۋالدى قابىلداۋ بولمەسى» ايدارلارى – اكىمدىك پەن حالىق اراسىنداعى كەرى بايلانىستىڭ ءتيىمدى قۇرالى. مۇندا جولدانعان وتىنىشتەر اۋداندىق اكىمدىكتەردىڭ, قالالىق باسقارمالار مەن ەلوردالىق دەپارتامەنتتەردىڭ قاراۋىنا ۇسىنىلادى.
جىل باسىنان بەرى سايتقا 3,5 مىڭنان استام ادامنان ءوتىنىش كەلىپ تۇسكەن. ونىڭ باسىم بولىگى تكش قىزمەتى, اۋلاىشىلىك اۋماقتاردى اباتتاندىرۋ, كولىك قويۋ ەرەجەلەرىن بۇزۋ جانە جولاۋشىلار تاسىمالداۋ ماسەلەلەرىنە قاتىستى. سونداي-اق, ۇستىمىزدەگى جىلدىڭ قاڭتار ايىنان باستاپ بىرىڭعاي بايلانىس ورتالىعى «109» قىزمەتىنە 122 مىڭداي ءوتىنىش جىبەرىلگەن, بۇلاردىڭ كوبىسى تۇرمىستىق ماسەلەلەردى قوزعايدا.
كەشە استانا قالاسىنىڭ اكىمى ادىلبەك جاقسىبەكوۆ ەلوردا اكىمدىگىندە وتكەن اپپارات وتىرىسىندا وتىنىشتەردى قاراۋ مەرزىمىنە جانە بەرىلگەن جاۋاپتاردىڭ ساپاسىنا باسا نازار اۋداردى.
«كوتەرىلگەن ماسەلەلەردىڭ بارلىعىن مۇمكىندىگىنشە تەز شەشۋ كەرەك. تۇرعىندار ءوز ماسەلەلەرىنىڭ شەشىلەتىنىنە سەنىمدى بولۋى قاجەت. ەگەر وبەكتيۆتى سەبەپتەرمەن ءبىز ول پروبلەمانى شەشە المايتىن بولساق, وندا تۇرعىنعا جاعدايدى ءتۇسىندىرىپ, ۋاقىتىلى جاۋاپ قايتارۋ كەرەك» دەدى شاھار باسشىسى.
وسى تۇستا ءا.جاقسىبەكوۆ كوپتەگەن وتىنىشتەرگە مەرزىمىندە جاۋاپ بەرمەگەن باسقارمالاردىڭ باسشىلارىنا ەسكەرتۋ جاسادى. ونىڭ ايتۋىنشا, مەملەكەتتىك ورگاندار جاۋاپكەرشىلىكتى ءبىر-بىرىنە جۇكتەپ, تۋىنداعان ماسەلەنى شەشۋدى سوزىپ جىبەرەتىن جاعدايلار بولادى. اكىم ەلوردا تۇرعىنىنىڭ شۇبار شاعىن اۋدانىندا جاعالاۋداعى اباتتاندىرۋدىڭ بۇلىنۋىنە قاتىستى ارىزىن مىسال رەتىندە كەلتىرىپ, وسى تۇيتكىلدى جاقىن ارادا جويۋدى تاپسىردى.
