استانا قالاسىندا حالىقتىق IPO باعدارلاماسى بويىنشا اقپاراتتىق-ءتۇسىندىرۋ ناۋقانى باستالدى. سونىڭ اياسىندا حالىقپەن جۇمىس ىستەيتىن دارىسكەرلەردى وقىتۋ ۇيىمداستىرىلىپ, ول بويىنشا 43 ادام ءبىلىمىن جەتىلدىردى.
پرەزيدەنت «نۇر وتان» حدپ-نىڭ 13-ءشى سەزىندە حالىقتىق IPO باستاماسىن كوتەرگەن ەدى. IPO (Initial Public Offering) – ايتۋلى كومپانيانىڭ اكتسيالارىن قور بيرجاسى ارقىلى شەكتەلمەگەن ادامدار سانىنا ساتۋ, سول ارقىلى كومپانيانىڭ الەۋەتىن كوتەرىپ, قوسىمشا تابىس تابۋدى كوزدەيدى.
قارجىلىق سەكتوردىڭ دامۋىن قامتاماسىز ەتىپ, جەرگىلىكتى حالىقتى ەل ىشىندەگى ينۆەستيتسيالىق مادەنيەتكە تارتۋدى ماقسات ەتكەن باعدارلاما شەڭبەرىندە اعىمداعى جىلدىڭ 11 مامىرىنا دەيىن رەسپۋبليكانىڭ بارلىق ايماعىندا 660 دارىسكەردى وقىتۋ قولعا الىنعان.
ەلوردادا «سامۇرىق-قازىنا» ۇلتتىق ءال-اۋقات قورى ۇيىمداستىرعان ترەنينگ بارىسىندا 43 ادام باعدارلاما بويىنشا ءبىلىمىن جەتىلدىردى. ەكى كۇن بويى جالعاسقان شارادا حالىققا جوبانىڭ بارلىق اسپەكتىلەرى تولىقتاي ءتۇسىندىرىلدى.
جالپى حالىقتىق IPO باعدارلاماسىنا «سامۇرىق-قازىنا» قورىنان 400-دەن اسا پوتەنتسيالدى كانديداتتار قاراستىرىلعان ەكەن.
ايتا كەتكەن ءجون, 2015 جىلعا دەيىن باعالى قاعازدار نارىعىندا كومپانيالاردىڭ اكتسيالارىن شىعارۋ كەزەڭ-كەزەڭىمەن جۇزەگە اسپاقشى. بيىلعى جىلى ەڭ ءبىرىنشى بولىپ اكتسيالاردى «قازترانسويل» كومپانياسى شىعارادى. كەلەسى جىلى «KEGOس», «Air Astana», «قازترانسگاز», «كازتەڭىزكولىكفلوت» جانە «سامۇرىق-ەنەرگو» كومپانيالارىنىڭ مىندەتىنە جۇكتەلگەن. ال 2014-2015 جىلدارى «قازاقستانتەمىرجولى», قازتەمىرترانس», «كازاتومونەركاسىپ», قازمۇنايگاز» كومپانيالارى باعدارلامانىڭ سوڭعى كەزەڭىن اياقتايتىن بولادى.
حالىقپەن بايلانىس جاسايتىن دارىسكەرلەردى وقىتۋ جيىنىندا, اتالمىش كومپانيالاردىڭ نورماتيۆتىك-قۇقىقتىق بازاسى, تۇرعىندار اراسىنداعى قارجىلىق ساۋاتتىلىق دەڭگەيى, قور نارىعىنىڭ ەرەكشەلىكتەرى, ينۆەستيتسيالاۋدىڭ ستراتەگيالارى, سونداي-اق باعدارلاماعا قالاي قاتىسۋ كەرەكتىگى جونىندە اڭگىمە ءوربىدى.
حالىقتىق IPO باعدارلاماسى تۋرالى 8 800 080 50 70 «جەدەل جەلى» ىسكە قوسىلدى. ول بويىنشا ءار وڭىرلەردە ءدارىس وتكىزىلەتىن شارالار تۋرالى اقپارات قاراستىرىلعان.
گۇلميرا شارحانقىزى
