استانا قالاسىنىڭ تۇرعىنى, سارىارقا داڭعىلىنداعى 33-ۇيدەگى №147 سايلاۋ ۋچاسكەسىندە داۋىس بەرگەن زەينەتكەر يبراگيم زۇلقاروۆ حالىقتىڭ سايلاۋعا ءالى دە ەنجارلىقپەن قارايتىنىن ايتىپ, قىنجىلىس ءبىلدىردى.
– يبراگيم اعا, ءسىز سايلاۋدىڭ ءادىل وتەتىنىنە سەنەسىز بە؟
– ءيا, سەنەمىن. بىزدە «قالتالى پارلامەنت» بولمايدى دەپ ويلايمىن. بيلىك پەن بۇقارا ءبىر-ءبىرىن تۇسىنەتىن, تىڭدايتىن كەزەڭگە وتتىك. ساياساتتا دا ادىلدىك بولادى دەپ ۇمىتتەنەمىن. جالپى العاندا, ەلىمىزدە وزگەرىس, جاڭارۋ, تۇلەۋ بولاتىنىنا سەنەتىن ادامنىڭ ءبىرىمىن.
– حالىقتىڭ سايلاۋ مادەنيەتىنە كوڭىلىڭىز تولا ما؟
– شىنىمدى ايتايىن, حالىقتىڭ كوپشىلىگى ءالى دە ەنجارلىقپەن, سەنىمسىزدىكپەن قارايدى. تاڭەرتەڭ داۋىس بەرۋگە شىققانىمدا كورشىلەرىمدى كەزىكتىردىم. «داۋىس بەرمەيسىڭدەر مە؟» دەسەم: «وي-ي, ءبىزدىڭ داۋىسىمىز ەشتەڭە شەشپەيدى. ءبارىبىر بيلىكتەگىلەر ءوز ادامىن سايلايدى» دەدى كوبى. جاڭا قازاقستاندى ەنجارلىقپەن قۇرا المايمىز. ەل بولاشاعى ءۇشىن تاڭداۋ جاساۋ – ءار ازاماتتىڭ بورىشى. مەن ءوز بورىشىمدى اتقارۋعا كەلدىم.
– ءسىز تۇراتىن اۋداندا كوپتەن بەرى شەشىلمەي كەلە جاتقان قانداي وزەكتى ماسەلەلەر بار؟ سايلاۋعا ءتۇسىپ جاتقان ۇمىتكەرلەر سول ماسەلەنى شەشەتىنىنە سەنەسىز بە؟
– شەشىلمەي كەلە جاتقان ماسەلە كوپ. سونىڭ ىشىندە الەۋمەتتىك ماسەلەلەردى ايتار ەدىم. مىسالى, كوپقاباتتى ۇيدە بالالارىمنىڭ قولىندا تۇرامىن. سوڭعى كەزدەرى پيك دەگەندى جاۋىپ, ميب دەگەندى اشتىق. جۇرت ونىڭ قالاي جۇمىس ىستەيتىنىن, تۇرعىندار وزدەرى تۇراتىن ءۇيدى باسقارۋعا قالاي قاتىساتىنىن تولىق تۇسىنە الماي ءجۇر. سايلاۋعا ءتۇسىپ جاتقان ۇمىتكەرلەر دە وسىنى ەگجەي-تەگجەيلى ءتۇسىندىرىپ, حالىقتىڭ ءسوزىن, تىلەگىن, مۇڭىن تىڭداعان جوق. ءتىپتى تۇرعىنداردىڭ دەنى وسى اۋداننان ماسليحاتقا, ماجىلىسكە كىمدەر سايلاۋعا ءتۇسىپ جاتقانىنا دا نازار اۋدارمادى. ويتكەنى سايلانعان ادامدار دەپۋتاتتىققا ءوتىپ العانشا عانا حالىقپەن كەزدەسەدى, ۇگىت-ناسيحات قاعازىن تاراتادى. ال سايلاۋ وتكەن سوڭ ولاردىڭ اتى-ءجونىن, ءتۇر-كەلبەتىن ۇمىتاتىنى شىندىق. بيلىك پەن بۇقارانىڭ اراسىندا شىنايى قارىم-قاتىناس ورناماي, قوعام دا, ەل دە دامىمايدى.
– جاسىڭىز نەشەدە؟
– 73-تەمىن.
– زەينەتاقىڭىزعا كوڭىلىڭىز تولا ما؟
– اللاعا شۇكىر. كوپ جىلدار وندىرىستە جۇمىس ىستەدىم. بۇيىرعان زەينەتاقىمدى الامىن. ارينە, مىنا قىمباتشىلىق زاماندا كوڭىلىمىز تولادى دەي المايمىن. ۇكىمەت پەن پارلامەنت, جەرگىلىكتى ءماسليحاتتار ەڭ الدىمەن حالىقتىڭ الەۋمەتتىك جاعدايىنا نازار اۋدارىپ, جالاقى مەن زەينەتاقى ءسال وسكەن كەزدە باعالاردىڭ شارىقتاپ كەتپەۋىنە ناقتى ءىس-قيمىلدار جاساسا ەكەن. سوندا حالىقتىڭ بيلىككە, ساياسي پارتيالارعا, سايلانعان دەپۋتاتتارعا دەگەن سەنىمى دە ارتادى. قوعامدا ادىلدىك ورنايدى. ءبارىمىزدىڭ قالاۋىمىز – وسى.
