جاڭالىقتار

يمانىمىز بەن بىرلىگىمىزگە بەكەم بولايىق!

قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ەرجان قاجى مالعاجىۇلى حازرەتتىڭ قاسيەتتى رامازان ايىنا بايلانىستى حالىققا ۇندەۋى

مەيىرىمدى, راقىمدى اللانىڭ اتىمەن باستايمىن!

486094_1380649719

قۇرمەتتى باۋىرلار! مۇسىلمان قاۋىمى ءۇشىن اسا ۇلىق قاسيەتتى رامازان ايى مۇباراك بولعاي! ورازاعا امان-ەسەن جەتكىزگەن اللا تاعالاعا سانسىز شۇكىرلەر مەن ماداقتار بولسىن!
جاراتۋشى يەمىزدىڭ جەر بەتىندەگى بارشا ادام بالاسىن ءارتۇرلى ۇلتتارعا ءبولىپ جاراتۋى – ونىڭ شەكسىز دانالىعى. قاسيەتتى قۇراندا: «ء…بىر-بىرلەرىڭدى تانىپ-بىلۋلەرىڭ ءۇشىن سەندەردى ۇلتتار مەن ۇلىستار ەتىپ جاراتتىق» («حۇجۋرات» سۇرەسى, 13-ايات) دەپ باياندالعان.
بارىمىزگە جەر, مەكەن, عالامشار, وتان ورتاق. ءبىزدى بىرىكتىرەتىن ورتاق ماقساتتار كوپ. بارشامىز جاراتقاننان دەنىمىزدىڭ ساۋلىعىن, بولاشاعىمىزدىڭ جارقىن, ءومىرىمىزدىڭ تىنىش بولعانىن تىلەيمىز. وسىناۋ يگىلىكتەردىڭ ورىندالۋى بىرلىككە بايلانىستى ەكەنى بەلگىلى. ىنتىماعى ىدىراپ, بىرلىگىنەن بەرەكە كەتكەن ەلدىڭ بولاشاعى دا بۇلىڭعىر بولماق. قانشاما جۇرتتىڭ جەر بەتىنەن جوعالىپ, تەگى مەن تۇتاستىعىنان ايىرىلۋىنىڭ نەگىزگى سەبەبى – باۋىرمالدىقتىڭ بولماۋى. مەككە مەن ءمادينا حالقىن تاتۋلاس­تىرىپ, ءبىر-بىرىنە باۋىرمال ەتكەن اللا ەلشىسى (س.ع.س.) مۇسىلماندىقتىڭ ىرگەسىن بىرلىكپەن بەكەمدەگەن.

حالقىمىزدا: «بايلىق – بايلىق ەمەس, بىرلىك – بايلىق» دەگەن ناقىل بار. قۇدايعا شۇكىر, سايىن دالانى مەكەندەگەن سان الۋان ۇلت پەن ۇلىستىڭ تاتۋ-ءتاتتى عۇمىر كەشۋى – بۇل حالقىمىزعا اللانىڭ بەرگەن سىيى, ولشەۋسىز راقىمى. ۇلت وكىلدەرىن بىرلىككە باستاعان ەلباسى نۇرسۇلتان نازارباەۆ ءدىن قايراتكەرلەرىن دە ىنتىماق پەن ىمىراعا ۇندەپ, تاتۋلىق پەن تۇراقتىلىققا شاقىردى. استانا بەيبىتشىلىكتىڭ التىن بەسىگىنە اينالدى. بۇل – بەيبىت جولدى باستى باعدار ەتكەن وتانداستارىمىزدىڭ دوستىعى مەن تاتۋلىعىنىڭ ارقاسىندا ءناسىپ بولعان باستى بايلىعىمىز. حالقىمىزدىڭ كەڭ پەيىلى, قوناقجاي, باۋىرمال, دارحان مىنەزى كەڭ-بايتاق دالامىزدا دوستىق پەن بىرلىكتىڭ ۇرپاقتان ۇرپاققا جالعاسۋىنا نەگىز بولدى.

قادىرلى اعايىن! ءدىننىڭ ماقساتى – ىزگىلىك, بەرەكە مەن بىرلىك. يسلام ءدىنى مەملەكەتتە, قوعامدا تىنىشتىق, ادىلدىك بولۋىن كوزدەيدى. ادامدى سوعان تاربيەلەيدى.
اللا تاعالا ادامزات بالاسىن: «بولىنبەڭدەر» دەپ باۋىرمال بولۋعا بۇيىرعان. پايعامبارىمىز مۇحاممەدتىڭ (س.ع.س.) باسشىعا باعىنىپ, بۇلىك شىعارماۋدى ۇگىتتەۋىندە ۇلكەن ءمان بار.

اللا ەلشىسى (س.ع.س.) ءوز وسيەتىندە قامشىنىڭ سابىنداي قىسقا ءومىردى رۋحاني قۇندىلىقتاردى بايىتۋعا ارناۋ قاجەتتىگىن وسيەت ەتكەن. ول (س.ع.س.) قوشتاسۋ قۇتباسىندا: «مەن ورتالارىڭنان كەتكەننەن كەيىن باياعى بىتپەيتىن ۇرىس-كەرىسكە, داۋ-دامايعا قايتا بوي الدىرماڭدار» دەگەن.

ءالحامدۋليللا, اتا-بابامىز سان عاسىرلاردان بەرى اڭساپ وتكەن تاۋەلسىزدىككە قول جەتكىزۋدىڭ ارقاسىندا اسىل ءدىنىمىزدىڭ قاينار بۇلاقتارىمەن قايتا قاۋىشتىق. حالقىمىز دەربەستىكپەن بىرگە ءداستۇرلى مادەنيەتىنە, ءتىلى مەن دىنىنە تولىققاندى يە بولىپ, ولاردى زامانعا ساي دامىتۋعا مۇمكىندىك الدى. وشكەنىمىز جانىپ, ۇمىتقانىمىز جادىمىزدا جاڭعىردى. مۇنىڭ بارلىعى قازاق ەلىنىڭ بۇگىنگى ۇستانعان باعىت-باعدارىنىڭ دۇرىستىعىن, اتا-بابا جولىنان اينىماعاندىعىن بىلدىرەدى.

ەندى ۇلت جادىنان ۇمىتىلا باستاعان يماني قۇندىلىقتاردى قايتا جانداندىرۋدىڭ رەتى كەلدى. ءبىز قازاقستان مۇسىلماندارى ءدىني باسقارماسىنىڭ اياسىندا 2014 جىلدى «ءدىن مەن ءداستۇر» جىلى دەپ جاريالادىق. ماقساتىمىز – ۇلتتىق تابيعاتىمىزبەن ساباقتاس شاريعاتتاعى ءمازھابىمىز بەن تانىمدىق مەكتەبىمىزدى تۇعىرلاپ, اسىل دۇنيەلەرىمىزدى, جاۋھارلارىمىزدى جارىققا شىعارۋ, ۇزىلگەنىمىزدى جالعاپ, جوعالتقانىمىزدى تۇگەندەۋ, سان عاسىرلىق تاريحى بار ءدىني داستۇرلەرىمىزدى قالپىنا كەلتىرۋ. سول ارقىلى قازاق ەلىنىڭ ىرگەلى ەلگە اينالۋى ءۇشىن قولدان كەلگەنشە ۇلەس قوسۋ. بۇگىندە داستۇرمەن ساباقتاس رۋحاني قۇندىلىقتارىمىزدى جاڭعىرتۋ ماقساتىندا رەسپۋبليكا دەڭگەيىندە يگىلىكتى ءىس-شارالار ۇيىمداستىرىلىپ كەلەدى.

رامازان – ءتالىم مەن تاربيە, جاساعان جاقسىلىقتاردىڭ ساۋابى ەسەلەنىپ جازىلاتىن, جاراتۋشى يەمىزدىڭ جارىلقاۋىنا, راقىمىنا بولەنەتىن اي. ولاي بولسا, اللانىڭ تەڭدەسسىز سىيىنا ىزگى دە, قايىرىمدى ءىس-ارەكەتتەرىمىزبەن قول جەتكىزۋدە ايانىپ قالمايىق! يماندىلىعىمىزدى كۇشەيتە تۇسەيىك!

قاسيەتتى ايدا كۇناعا جەتەلەيتىن, اللانىڭ اشۋىنا شاقىراتىن بارلىق جامان ىستەرگە جول بەرمەسەك ەكەن. قوعامدىق كولىكتەردە جول اقىسى ارزانداتىلسا, كۇندەلىكتى تۇتىناتىن زاتتارعا جەڭىلدىكتەر جاسالسا, اسحانالاردا اۋىزاشار مەزگىلىندە قايىرىمدىلىق اكتسيالار ۇيىمداستىرىلسا, ۇجىمدا, كاسىپورىنداردا, اسىرەسە, قۇرىلىس سالالارىندا اۋىز بەكىتە ءجۇرىپ جۇمىس ىستەيتىن باۋىرلارىمىزعا قۇرمەت كورسەتىلىپ, تۇسىنىستىك تانىتىلىپ جاتسا, نۇر ۇستىنە نۇر دەر ەدىك. رامازان ايىندا بەرىلەتىن قۇدايى تاماقتار اۋىزاشار ۋاقىتىندا ۇيىمداستىرىلسا.

اسىل دىنىمىزدە ءاربىر قايىرلى امال – ساداقا. اداسقانعا جول كورسەتۋ دە – ساداقا, جابىققاندى جۇباتىپ, جىلى ءسوز ايتۋ دا – ساۋاپتى امال. رامازان ايىندا وسىنداي ىزگى ىستەرگە دەن قويعانىمىز ابزال, اعايىن!

قىمباتتى وتانداستار! يمان بۇلاعىنان سۋسىنداعان ادام ارىنا داق تۇسىرمەيدى. ويتكەنى, يسلام ادامگەرشىلىك قۇندىلىقتاردى قاستەرلەۋگە ۇندەيدى. وسى ورايدا بارشاڭىزدى قاسيەتتى رامازان ايىن مۇقتاج جاندارعا كومەكتەسۋمەن, جەتىم مەن جەسىرگە, قارتتار مەن مۇگەدەكتەرگە مەيىرىم كورسەتىپ, ساۋاپتى امالدارمەن, ىزگى ىستەرمەن وتكىزۋگە شاقىرامىن. اللا تاعالا قاسيەتتى قۇراندا: «جاقسىلىقتا, تاقۋالىقتا ءبىر-بىرىڭە كومەكتەسىڭدەر» دەپ بۇيىرعان («ءمايدا» سۇرەسى, 2-ايات).
جارىلقاۋشى ايدا جاساعان امالدارىڭىز بەن ىزگى نيەتتەرىڭىز باسقا دا ايلاردا جالعاسا بەرگەي! اللا تاعالا بارشامىزدىڭ ەكى دۇنيەدە دە ءجۇزىمىزدى جارىق, ءار قادامىمىزدى بەرەكەلى ەتكەي! تىلەگىمىز قابىل, مۇراتىمىز اسىل بولعاي! بايلىعىمىز – يمانىمىز بەن بىرلىگىمىزگە بەكەم بولايىق!

جايىق ناعىماش

 

 

 

تاعىدا

admin

«استانا اقشامى» گازەتى

ۇقساس جاڭالىقتار

پىكىر ۇستەۋ

Back to top button