جاڭالىقتار

ينتەگراتسيا يگىلىگى تالقىلاندى

Logotip-Nur-Otana1

«نۇر وتان» پارتياسى استانا قالالىق فيليالىنىڭ «كوزقاراس» پارتياارالىق جانە قوعامدىق ديالوگ كلۋبىنىڭ كەزەكتى وتىرىسىندا مەملەكەتتىك رامىزدەردىڭ ماڭىزى جانە ەۋرازيالىق ەكونوميكالىق ينتەگراتسيا ماسەلەلەرى تالقىلاندى.

قالالىق فيليال توراعا­سى­نىڭ ءبىرىنشى ورىنباسارى ساپار احمەتوۆ الدىمەن كلۋب مۇشەلەرىن قازاق­ستان رەسپۋبليكاسىنىڭ مەملە­كەتتىك رامىزدەر مەرەكەسىمەن قۇتتىق­تادى. وسىعان وراي, كۇن ءتارتىبىن­دەگى العاشقى ماسەلە بويىن­شا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ دوتسەنتى ج.يبراگيموۆ بايانداما جاساپ, ازامات­تىق پەن ءپاتريوتيزمدى نىعايتۋ­داعى مەملەكەتتىك رامىزدەردىڭ ماڭىزىنا توقتالدى. ەلباسى ن.نازارباەۆ ءوزىنىڭ قازاقستان حالقىنا ارناعان بيىلعى جولداۋىندا جاڭا قازاقستاندىق ءپاتريوتيزمنىڭ يدەيالىق نەگىزى وسى مەملەكەت قۇراۋشى, جالپىۇلتتىق قۇندىلىقتاردا جاتقانىن اتاپ ءوتتى. وسىنى ەسكەرە كەلە, ج.يبراگيموۆ:

«راسىندا دا مەملەكەتتىك ءرامىزىمىز – ءبىزدىڭ تاۋەلسىزدىگىمىزدى, جاسامپازدىعىمىزدى كورسەتەتىن ەڭ باستى قۇندىلىقتارىمىزدىڭ ءبىرى. سوندىقتان دا ءبىزدىڭ قوعامى­مىزداعى ادامداردىڭ مىندەتى – وسى مەملەكەتتىك رامىزدەرگە دەگەن قۇرمەتپەن قاراۋ, ونى ساقتاپ, قاستەرلەۋ. وتاندى ءسۇيۋ, وتانعا دەگەن قۇرمەت وتباسىنان باستالادى. وسى ورايدا مەن بالالاردىڭ بويى­نا وتانعا دەگەن سۇيىسپەنشىلىكتى دامىتۋدىڭ بىردەن ءبىر قۇرالى وسى سۇيىسپەنشىلىكتىڭ اكەلەردىڭ بويىندا بولۋى دەر ەدىم» دەي كەلە, تاۋەلسىزدىك العان العاشقى كۇندەردەن-اق مەملەكەت باسشىسى ۇلتارالىق كەلىسىمدى, بىرلىك پەن ىشكى ساياسي تۇراقتىلىقتى قازاقستاننىڭ نەگىزگى باسىمدىقتارى ەتىپ بەلگىلەگەنىن, بۇل رەتتە جاستاردى پاتريوتتىققا تاربيەلەۋ جانە وسكەلەڭ ۇرپاقتىڭ بويىندا مەملەكەتتىك رامىزدەردىڭ ماڭىزدىلىعىن ناسيحاتتاۋ ماسەلەلەرىنە دە كوڭىل اۋدارۋ كەرەكتىگىن باسا ايتتى.

جالپى, 2009 جىلى قۇرىلعان «كوزقاراس» كلۋبى ساياسي پارتيالار مەن قوعامدىق ۇيىم وكىلدەرىنىڭ ەرىكتى بىرلەستىگى بولىپ تابىلادى. ونىڭ مۇشەلەرى باس قالا مەن قوعام دامۋىنداعى قوعامدىق-ساياسي جانە الەۋمەتتىك-ەكونوميكالىق ماسەلەلەر بويىنشا ءوزارا پىكىر الماسادى. جاقىندا عانا قازاقستان, رەسەي جانە بەلارۋس مەملەكەتتەرىنىڭ اراسىندا ەۋرازيالىق ەكونوميكالىق وداق قۇرۋ جونىندەگى شارتقا قول قويىلۋىنا بايلانىستى كلۋبتىڭ كەزەكتى وتىرىسىندا ەۋرازيالىق ەكونوميكالىق ينتەگراتسيانىڭ ماڭىزى مەن كەلەشەگى تۋرالى دا كەڭىنەن ءسوز بولدى.
شارا سوڭىندا قاتىسۋشىلار ءبىزدىڭ مەملەكەتىمىزدى مەكەندەگەن ءاربىر ادام ەگەمەندىگىمىز بەن تاۋەلسىزدىگىمىزدىڭ جارقىن بەلگىسى ىسپەتتەس مەملەكەتتىك رامىزدەردى – اسپان ءتۇستى كوك تۋىمىزدى, ايبىندى ەلتاڭبامىز بەن اسقاق ءانۇرانىمىزدى قۇرمەتتەۋى ءتيىس دەگەن ورتاق وي ءتۇيدى.

گۇلبارشىن وكەشقىزى

تاعىدا

admin

«استانا اقشامى» گازەتى

ۇقساس جاڭالىقتار

پىكىر ۇستەۋ

Back to top button