باستى اقپاراتساياسات

ىركىلىسسiز ىلگەرiلەۋ ىزىمەن

05(7)

بەيسەنبى كۇنى ەلباسى نۇرسۇلتان نازارباەۆ ەلىمىزگە مەملەكەتتىك ساپارمەن كەلگەن كورەيا رەسپۋبليكاسىنىڭ پرەزيدەنتى پاك كىن حەمەن كەزدەستى.

كورەيا – الەمگە «ازيا جولبارىسى» رەتىندە تانىلعان مەملەكەت. قاراپايىم اگرارلىق ەلدەن ەكونوميكاسى قارقىندى دامىعان الپاۋىتقا اينالعان كورەيانىڭ بۇگىندە جىلدىق ساۋدا اينالىمى 1 تريلليون دوللاردان اسادى. قىسقا مەرزىم ىشىندە ەكپىندى وركەندەگەن ەل قازىر دۇنيەجۇزىندەگى ەكونوميكاسى ەڭ وزىق جيىرما ەلدىڭ بىرىنە اينالىپ وتىر.

قازاقستان مەن كورەيا اراسىنداعى قارىم-قاتىناس 90-جىلداردىڭ باسىنان باستالىپ, بۇگىندە بارلىق سالا بويىنشا جاراسىمدى بايلانىس ورنىقتى.

ەلىمىزگە العاش رەت مەملەكەتتىك ساپارمەن كەلىپ وتىرعان پاك كىن حە – كورەيا رەسپۋبليكاسىنىڭ 11-ءىنشى پرەزيدەنتى. بيلىك تىزگىنىن بىلتىردان بەرى قولعا العان.

قازاقستان پرەزيدەنتى پاك كىن حەنىڭ ەلىمىزگە ساپارى ەلەۋلى وقيعا ەكەندىگىن اتاپ ءوتتى.

– ءبىز تاۋەلسىزدىگىمىزدىڭ العاشقى كۇندەرىنەن باستاپ-اق ءسىزدىڭ ەلدەگى رەفورمالاردى قالت جىبەرمەي, زەردەلەپ كەلەمىز. مەن رو دە ۋدان باستاپ, وڭتۇستىك كورەيانىڭ بارلىق پرەزيدەنتتەرىمەن كەزدەستىم. سول جىلدارى باستالعان ەكى ەل قارىم-قاتىناسى قازىر جوعارى قارقىنمەن دامۋ ۇستىندە. ءسىزدىڭ ساپارىڭىز ءوزارا ىنتىماقتاستىعىمىزدى ارتتىرا تۇسەدى دەگەن ۇمىتتەمىن. ءبىز كورەيامەن ساياسي جانە ەكونوميكالىق تىعىز قارىم-قاتىناس ورناتۋعا مۇددەلىمىز, – دەدى ەلباسى.

ءوز كەزەگىندە كورەيا رەسپۋبليكاسىنىڭ پرەزيدەنتى پاك كىن حە بۇل ساپارى قازاق-كورەي ستراتەگيالىق سەرىكتەستىگى تاريحىنداعى جاڭا كەزەڭنىڭ باسى بولاتىنىنا سەنىم ءبىلدىرىپ, بىلتىر ەكى ەل اراسىنداعى تاۋار اينالىمى بۇرىن-سوڭدى بولماعان رەكوردتىق كورسەتكىشكە جەتكەنىن اتاپ ءوتتى.

ايتالىق, بىلتىر ەكى ەل اراسىنداعى الىس-بەرىس 1,5 ميلليارد دوللاردى قۇراعان. ال بيىلعى العاشقى ءۇش ايدىڭ وزىندە 400 ميلليوننان اسقان. بۇعان ەلىمىزدە جۇمىس ىستەپ جاتقان بىرنەشە جۇزدەگەن بىرلەسكەن كاسىپورىننىڭ ۇلەسى ۇلكەن.

قازاقستان وڭتۇستىك كورەياعا ۋران, مىس, التىن, تەمىر جىبەرسە, ول جاقتان ەلەكترونيكا قۇرىلعىلارى, ماشيناعا قاجەتتى قۇرال-جابدىقتار, بولشەكتەر تاسىمالدانادى.

شاعىن قۇرامداعى كەزدەسۋ بارىسىندا بايلانىستاردى جوعارى دەڭگەيدە نىعايتۋدىڭ, ءارتۇرلى سالا بويىنشا ىنتىماقتاستىقتى ارتتىرۋدىڭ نەگىزگى باعىتتارى جان-جاقتى تالقىلاندى.

بۇدان كەيىن قازاقستان جانە كورەيا رەسپۋبليكاسىنىڭ پرەزيدەنتتەرى ەكىجاقتى مامىلە راسىمىنە قاتىسىپ, بىرقاتار قۇجاتتارعا قول قويدى. اتاپ ايتقاندا, ەكى ەل ۇكىمەتىنىڭ كەلىسىمى بويىنشا ءوزارا ۆيزالىق تالاپتاردى جويۋ ماسەلەسى قاراستىرىلدى. ەندى قازاقستاندىق ازاماتتار ءوز تولقۇجاتىمەن وڭتۇستىك كورەياعا ۆيزاسىز-اق بارا الادى. تەك ساپارلاۋ مەرزىمى ءبىر ايدان اسىپ كەتپەسە بولعانى.

بۇعان قوسا, بولەك ەلىمىزدىڭ ادىلەت, ءبىلىم جانە عىلىم, قورشاعان ورتا جانە سۋ رەسۋرستارى مينيسترلىكتەرى دە ءوزارا ىنتىماقتاستىق تۋرالى مەموراندۋمعا قول قويدى.

قۇجاتتارعا قول قويۋ راسىمىنەن كەيىن ەل كوشباسشىلارى بىرلەسكەن مالىمدەمە جاسادى.

نۇرسۇلتان ءابىشۇلى كورەيا پرەزيدەنتىمەن بىرلەسكەن ءىرى جوبالاردى جۇزەگە اسىرۋ ماسەلەلەرىن تالقىلاعانىن, سونىڭ ىشىندە كورەيلىك بيزنەستىڭ قازاقستاننىڭ ۇدەتىلگەن يندۋستريالىق-يننوۆاتسيالىق دامۋ باعدارلاماسىنا قاتىسۋى جايى كەڭىنەن ءسوز بولعانىن اتاپ ءوتتى. مەملەكەت باسشىسىنىڭ ايتۋىنشا, بيىلعى قىركۇيەك ايىنا «قازاقستان رەسپۋبليكاسى – كورەيا رەسپۋبليكاسى» ىسكەرلىك فورۋمى جوسپارلانىپ وتىر. ەلباسى بيزنەسكە جاقسى مۇمكىندىكتەر ۇسىناتىن «ينۆەستيتسيالار تۋرالى» جاڭا زاڭعا قول قويىلعانىنا دا نازار اۋداردى.

– كومپانيالار كورپوراتيۆتىك جانە تابىس سالىعىنان – 10 جىلعا, مۇلىك سالىعىنان 8 جىلعا بوساتىلادى. ولاردىڭ كۇردەلى شىعىندارىنىڭ 30 پايىزى وتەلەدى. جۇمىس كۇشىن تارتۋ كۆوتاسىز جانە رۇقساتتامالارسىز جۇزەگە اسادى, سونداي-اق ءبىزدىڭ ەلدەرىمىز اراسىندا ۆيزاسىز رەجيم ورناتىلدى. وسىنىڭ ءبارى ەكى مەملەكەت ءۇشىن دە ىڭعايلى جانە ءتيىمدى بيزنەستىك احۋال قالىپتاستىرادى, – دەدى قازاقستان پرەزيدەنتى.

بۇدان كەيىن نۇرسۇلتان نازارباەۆ پەن پاك كىن حە قازاق-كورەي بيزنەس فورۋمىنىڭ اشىلۋ راسىمىنە قاتىستى.

قىمبات نۇرعالي

تاعىدا

admin

«استانا اقشامى» گازەتى

ۇقساس جاڭالىقتار

پىكىر ۇستەۋ

Back to top button