تەلەارنا ارقىلى ميلليون كورەرمەندى ءجىپسىز بايلاعان «سۋپەرستاردان» بەلەڭ العان ەسترادا مانيا «X-فاكتور», «جۇلدىزدى ساتپەن» جالعاسىپ, كوزگە تۇسكىسى كەلەتىندەردىڭ كوسەگەسىن كوگەرتىپ-اق ءجۇر. قۇددى, گرەك ميفولوگياسىنداعى پەگاس تۇياعىنىڭ تەبىنگەنىنەن پايدا بولا قالعان يپوكرەنا دەرسىڭ… تالانت تاڭداۋ ناۋقانىنان تابىستى شىققاندار ايتەۋىر كۇندەردىڭ كۇنىندە شوۋ بيزنەستىڭ شىلاۋىندا كەتە بارادى.
وسى دا جەتە مە دەسەك, جاقىندا تاعى سونداي ءبىر مۋزىكالىق بايقاۋ باستالادى ەكەن. «زاجگي زۆەزدۋ» دەپ اتالادى. رەسەيدە وتەتىن «زاجگي سۆويۋ زۆەزدۋ!» تەلەۆيزيالىق بايقاۋىنا جولداما بەرەتىن قازاقستاندىق پسەۆدوجوبانى ۇيىمداستىرۋشى قانداسىمىز, رەسەيدىڭ ەڭبەك سىڭىرگەن ءارتىسى, سانكت-پەتەربۋرگ مەملەكەتتىك «زازەركالە» تەاترىنىڭ ءانشىسى ساۋلە ىسقاقوۆانىڭ سوزىنە قاراعاندا, بۇل دا سول شارتى بىرىنەن-ءبىرى اۋمايتىن شاراعا ۇقسايدى. ياعني, تاعى دا ءاۋ دەگەنىن انشىلىك دەپ تۇسىنەتىندەر اۋزى-باسىن قيسايتىپ, وندىرشەگىن سوزىپ الدارىنداعى ءۇش-ءتورت ادىلقازىنىڭ كەكەتىپ كۇلگەنىنە, ميىقتان مىسقىلداعانىنا (اسىرەسە, بەس بيەنىڭ ساباسىنداي بولىپ, ءومىرى سونداي رولدەن تۇسپەيتىن ناعيما ەسقاليەۆا حانىمنىڭ وعاش قىلىقتارى سونداي جاعىمسىز – ءا.ج) قاراماستان, داڭق مارەسىنە دەيىن دامبالشاڭ جۇگىرىپ بارۋعا دايىن دەسەك ارتىق ايتقاندىق ەمەس. «ۇيالماعان ءانشى بولادى» دەگەن وسى. كەيدە يۋتۋب (www.youtube.com) سايتىن قاراپ وتىرىپ, سول «سۋپەرستار», «X-فاكتورلاردىڭ» ىرىكتەۋ كەزەڭدەرىنەن تۇتىلىپ, كوپشىلىكتىڭ اقاقۋ-ۋاقاقۋ كۇلكىسىنە, كەلەمەجىنە نىسان بولعانداردىڭ ۆيدەولارىن ۇشىراستىرا قالساق, «ە, بايعۇستار-اي, دوسقا كۇلكى, دۇشپانعا تابا بوپ نەسى بار ەدى؟» دەپ مۇسىركەيمىز.
«جۇلدىز» بولعىسى كەلەتىندەر سۇمدىق كوپ بىزدە. تۇندە جامىرايتىن جۇلدىزعا تەلەديدار-راديودان كۇندە جامىرايتىن «جۇلدىز» جەتەقابىل قازىر. ال, وسى تەكتەس تەلەۆيزيالىق بايقاۋلار جەلىگى باسىلماعان جاستاردىڭ ءانشى-ءارتىستى يدەال كورۋىنە كادىمگىدەي دەم بەرەدى. ولار سول شەتەلدە, رەسەيدە ابدەن جالىقتىرعان جوبالاردىڭ پاتەنتىن ساتىپ الىپ, وڭاي رەيتينگ جيناعىسى كەلەتىن تەلەارنالاردىڭ اشەيىن قولبالاسى بولعانىن سەزىنە مە ەكەن؟
وتكەندە «ۇيرەك. ينفو» سايتىنان «اقتوبەدە 11 جاسار بالا توي-تومالاققا تاسىپ, اقشا تاپقىزۋعا ماجبۇرلەگەن اتا-اناسىنان سوت ارقىلى الپىس بەس ميلليون تابىسىن داۋلاپتى» دەگەن اقپاراتتى وقىعاندا جاعامىزدى ۇستاي جازداپ, ادەيى ۇيىمداستىرىلعان قاۋەسەت ەكەنىن ەستىپ «ەەەە» دەسكەنبىز. بىراق وسى ءازىلدىڭ استارىنان ءبىر شىندىقتى شىرامىتامىز عوي. قازىر اتا-انالاردىڭ ونەرگە دەن قويعان بالاسىن انا بايقاۋعا ءبىر, مىنا بايقاۋعا ءبىر سۇيرەلەپ, «جۇلدىز» قىلۋعا قۇمارتاتىنى وتىرىك ەمەس. سوسىن ءاپ-اجەپتاۋىر اتىن شىعارىپ العاننان كەيىن توي جاعالاپ, ءوز بالاسىنا ءوزى پايداكۇنەم پروديۋسسەر بولاتىندار دا بارشىلىق. پسيحولوگيادا ۇنەمى كىشكەنتايىنان جەڭىسكە, جەتىستىككە كەنەلگەن جانداردىڭ ءومىردىڭ بۇرالاڭ سوقپاعىندا قيىندىققا تاپ بولعاندا, جانىپ كەتەتىنىن جازادى. «كومپلەكس وتليچنيكا» دەيدى مۇنى. ەگەر ارنايىلاپ تەرسەڭ, وندايعا مىڭداپ مىسال تابىلار ەدى. بۇرناعى جىلى نتۆ ارناسىنان كورگەن «مالەنكيە زۆەزدى: پوسلەدستۆيا» دەگەن باعدارلاما ماعان كادىمگىدەي وي سالدى. ىزدەپ تاۋىپ كورسەڭىزدەر بولادى. سوندىقتان «جۇلدىز» بولۋدىڭ دا جاۋاپكەرشىلىگى بار ەكەنىن ەسكەرەيىكشى.
ادىلبەك جاپاق,
adikezh87@gmail.com
