باستى اقپاراتءبىلىم

كەيبىر كۋرستاسىم ايىنا جارتى ميلليون تەڭگە تابادى

نۇر-سۇلتانداعى «كورمە» ورتالىعىندا XVIII حالىقارالىق «ءبىلىم جانە عىلىم-2019» كورمەسى ءوتتى. وسى ءىس-شارا قاتىسۋشىلارىنىڭ ءبىرى, بيىل عانا اشىلعان Astana IT ۋنيۆەرسيتەتىنىڭ IT-مەنەدجمەنت ماماندىعى ستۋدەنتى ءاليحان ابدىكەشپەن اڭگىمەلەسىپ, جاڭا ءبىلىم ورداسىنداعى وقۋدىڭ ەرەكشەلىكتەرى, وعان ءتۇسۋدىڭ تالاپتارى جانە بولاشاق مامانداردىڭ بەتالىسى جايلى سۇراعان ەدىك.– ءاليحان, ءوزىڭ قاي وڭىردەن كەلدىڭ؟ ۋنيۆەرسيتەتكە تۇسەردە ساعان قانداي تالاپتار قويىلدى؟
– مەن قاراعاندى قالاسىنىڭ ءبىلىم-يننوۆاتسيا ليتسەيىن ءبىتىردىم. قازىرگى تاڭدا Astana IT ۋنيۆەرسيتەتىندە IT-مەنەدجمەنت ماماندىعى بويىنشا ءبىلىم الىپ جاتىرمىن. وقۋعا ءتۇسۋدىڭ تالاپتارىنا كەلسەك, ەڭ اۋەلى ۇمىتكەردىڭ ۇبت نەمەسە كت سەرتيفيكاتى مەن IELTS (كەمىندە 5,5) سەرتيفيكاتى كەرەك. ويتكەنى ساباق تۇگەلدەي اعىلشىن تىلىندە وتەدى. ەگەر IELTS سەرتيفيكاتى بولماسا, وندا ۋنيۆەرسيتەتتىڭ ءوزى ۇيىمداستىراتىن اعىلشىن تىلىنەن سىناققا قاتىسۋى قاجەت. مەن ونداعى 100 بالدىڭ 90-ىن ەنشىلەدىم. ۇبت-دان 107 بالل جينادىم.
– ەڭ تومەنگى بالل قانشا بولدى؟
– قاتەلەسپەسەم, ءبىزدىڭ ماماندىق بويىنشا – 93 بالل, قالعان ماماندىقتاردا 88-89 بالل بولعان سەكىلدى.
– تالاپكەردىڭ بولاشاق ماماندىعىنا, مىسالى, باعدارلامالاۋعا قاتىستى قانداي دا ءبىر تاجىريبەسى بولۋى مىندەتتى مە؟
– ول مىندەتتى ەمەس. ءبىزدىڭ ارامىزدا IT سالاسىمەن ەندى عانا تانىسىپ جاتقاندار دا, سونداي-اق بىرنەشە جىلدان بەرى وسىمەن اينالىسىپ, وليمپيادالارعا قاتىسىپ, ابدەن يكەمدەلگەندەر دە بار. ارينە, ەگەر ونداي تاجىريبەڭىز بار بولسا, قۇجات تاپسىراردا مىندەتتى تۇردە كورسەتۋىڭىز قاجەت. ەگەر ۇبت بويىنشا ناتيجەلەرى بىردەي بولىپ جاتسا, جەتىستىكتەرى بار بالاعا باسىمدىق بەرىلەدى.
– قازىر ۋنيۆەرسيتەتتە قانشا ستۋدەنت وقيدى؟
– بۇگىندە بىزدە 614 ستۋدەنت بار.
– ونىڭ ءبارى تەگىن وقي ما؟
– ءبارى بولماسا دا, كوپشىلىگى تەگىن وقيدى. ماسەلەن, 600-ءى – مەملەكەتتىك وقۋ گرانتىنىڭ يەگەرلەرى. ونىمەن قوسا, رەكتوردىڭ جانە اكىمدىكتىڭ ارنايى گرانتتارى دا بار.
– ال اقىلى بولىمدە وقيتىندار ءۇشىن وقۋدىڭ جىلدىق باعاسى قانشا؟
– شامامەن 2 ميلليون تەڭگەدەي.
– ۋنيۆەرسيتەت قانداي ماماندىقتار بويىنشا ستۋدەنتتەردى قابىلدايدى؟
– Computer Science (كومپيۋتەرلىك عىلىمدار), Software Engineering (باعدارلامالىق ينجەنەريا), BigData Analysis (ۇلكەن دەرەكتەر ءاناليزى), Industrial Automation (ونەركاسىپتىك اۆتوماتيزاتسيا), Cyber Security (كيبەرقاۋىپسىزدىك), Telecommunication Systems (تەلەكوممۋنيكاتسيالىق جۇيەلەر), IT Management (IT-مەنەدجمەنت), Media Technologies (مەدياتەحنولوگيالار) دەگەن سەگىز ماماندىق بار.
– كۇنى كەشە عانا پرەزيدەنت قاسىم-جومارت توقاەۆ وسى ۋنيۆەرسيتەتكە ارنايى ات باسىن بۇرىپ, ونىڭ بەدەلدى ءارى بىلىكتى ماماندار دايارلايتىن وقۋ ورنىنا اينالاتىنىنا سەنىم ارتا سويلەدى. وسى ورايدا ونداعى ءبىلىم باعدارلاماسىنىڭ ەرەكشەلىكتەرىن ايتىپ بەرشى.
– بىرىنشىدەن, ءبىزدىڭ ۋنيۆەرسيتەت باكالاۆريات ماماندارىن ءۇش جىلدا دايارلايدى. ءبىر جاعىنان, بۇل جايت ستۋدەنتتىڭ ۋاقىتىن ۇنەمدەۋگە كومەكتەسسە, ەكىنشى جاعىنان, وقۋعا بارىنشا بەل شەشە كىرىسۋگە يتەرمەلەيدى. ويتكەنى وقۋ باعدارلاماسى ءۇش جىلعا سىعىمدالىپ بەرىلەتىندىكتەن, دەدلايندار وتە تىعىز ورنالاسقان. سونداي-اق مۇندا بىلىكتى مۇعالىمدەر ساباق بەرەدى. ولاردىڭ بىرقاتارى «بولاشاق» باعدارلاماسىنىڭ تۇلەكتەرى بولسا, بىرقاتارى – شەتەلدەن شاقىرىلعان ماماندار. تاعى ءبىر ايتا كەتەرلىگى, Astana IT ۋنيۆەرسيتەتى Astana Hub-پەن ءبىر ەكوجۇيەدە جۇمىس ىستەيدى. بۇل – ەگەر ستۋدەنتتەر قانداي دا ءبىر ستارتاپ باستاسا, ونى اكسەلەراتسيالاۋدى وسى حابتا جۇزەگە اسىرا الادى دەگەن ءسوز.
– بىلۋىمشە, ساباقتاردىڭ كوبى تەوريادان گورى پراكتيكاعا نەگىزدەلگەن سەكىلدى…
– ءيا. پراكتيكا بارىسىندا ءار باعىت بويىنشا ءبىلىم الاتىن ستۋدەنتتەر ءبىر توپقا بىرىكتىرىلەدى. سوندا, ماسەلەن, بىرەۋى كيبەرشابۋىلدان قورعايتىن جۇيەنى قۇراستىرسا, بىرەۋى باعدارلامالارىن جازادى, ەندى ءبىرى سولارعا باسشىلىق ەتەدى. بۇل, بىرىنشىدەن, ستۋدەنتتەردىڭ ۇيرەنگەن نارسەلەرىن پراكتيكادا قولدانۋعا مۇمكىندىك بەرسە, ەكىنشىدەن, ولاردىڭ ءبىر-بىرىمەن قارىم-قاتىناس قۇرۋ, توپتى باسقارا الۋ, تايم-مەنەدج­مەنتتى يگەرۋ سياقتى قابىلەتتەرىن (اعىلشىنشا ايتساق, soft skills) دامىتادى.
– IT قازىردە سۇرانىسقا يە ماماندىقتاردىڭ ءبىرى ەكەنى بەلگىلى. ستۋدەنتتەردىڭ اراسىندا ساباقپەن قاتار جۇمىس تا ىستەپ, كاسىبي مامان رەتىندە ىسىلىپ ۇلگەرگەندەر بار ما؟
– ءيا, وندايلار دا بار. مەكتەپ كەزىنەن ءتۇرلى وليمپيادالارعا قاتىسىپ, وسى سالانىڭ قىر-سىرىنا كادىمگىدەي قانىققان كۋرس­تاستارىمنىڭ كەيبىرى ساباققا قوسىمشا ءتۇرلى جوبالارمەن دە اينالىسادى. ولاردىڭ الدى وسى قابىلەتتەرىنىڭ ارقاسىندا ايىنا شامامەن 400-500 مىڭ تەڭگەگە دەيىن تابىس تاۋىپ ءجۇر. سۇرانىسقا يە ماماندىق ەكەنى وسىدان-اق كورىنەدى.
– جاتاقحانا ماسەلەسى قالاي شەشىلگەن؟ بارلىق ستۋدەنتتەر ونىمەن قامتىلعان با؟
– ستۋدەنتتەر رەسپۋبليكانىڭ تۇكپىر-تۇكپىرىنەن بولعاندىقتان, ۋنيۆەرسيتەت «ەكسپو پلازا» تۇرعىن ءۇي كەشەنىندەگى ەكى اپارتامەنتتى جالعا الۋدا. ونىڭ وقۋ ورنىنا جاقىندىعى, اسىرەسە, ەلوردانىڭ قاتال قىسىندا ىڭعايلى. جالعا الۋ قۇنى دا ونشا قىمبات ەمەس, ايىنا شامامەن 20-25 مىڭ تەڭگەنىڭ كولەمىندە.
– ستۋدەنتتەردىڭ ساباقتان تىس قوعامدىق ءومىرى قالاي وتەدى؟
– بۇل تۇرعىدا دا ءبىزدىڭ ءىشىمىز پىسپايدى دەسەك بولادى. بۇگىندە ۋنيۆەرسيتەتىمىزدە شەشەندىك ونەر, روبوتوتەحنيكا, بي, سپورت ءتارىزدى ءارتۇرلى سالاعا باعىتتالعان وتىز شاقتى كلۋب جۇمىس ىستەيدى. مەن سونىڭ ىشىندەگى Media Club جەتەكشىسىمىن. وندا ءبىز ۋنيۆەرسيتەت ءومىرى تۋرالى مەديا كونتەنت جاساپ, ونى الەۋمەتتىك جەلىلەردە ورنالاستىرامىز. كەيدە مۇعالىمدەرىمىزبەن بىرگە تەاتر قويىلىمدارىنا بارىپ تۇرامىز. ۆولونتەرلىكپەن دە اينالىسامىز. اسىرەسە, «استانا ارەنا» ستاديونىندا بولاتىن فۋتبول ماتچتارى كەزىندە ءبىزدىڭ ستۋدەنتتەر كومەكتەسىپ جۇرەدى.
– اڭگىمەڭە راقمەت! وقۋدا ساتتىلىك!

 

تاعىدا

ۇقساس جاڭالىقتار

پىكىر ۇستەۋ

Back to top button