انە-مىنە دەگەنشە تامىز دا باستالىپ كەتتى. بۇل – مەكتەپكە باراتىن جەتكىنشەكتەردىڭ سوڭعى دەمالىس مەزگىلى. ەندى از كۇندەردەن كەيىن ءبىلىم وردالارىندا قوڭىراۋدىڭ سىڭعىرلى داۋىسى ەستىلەدى. وقۋشىلار جۇزدەرىنەن مەيىرىم توگىلگەن ۇستازدارىمەن قاۋىشادى. دەمالىستا بولعان اسەرلەرىمەن بولىسەدى. وقىعان كىتاپتارى جايىندا ايتادى.
كىتاپ دەمەكشى, اسىرەسە, ەلوردالىق بالالاردىڭ دەمالىسى كەزىندە ورتالىقتاندىرىلعان كىتاپحانالار جۇيەسى نە ىستەدى, قانداي شارالار ۇيىمداستىردى دەگەن ويمەن ءسوز قوزعاۋدى ءجون كورىپ وتىرمىز. بۇگىندە اتالعان مەكەمەگە 18 كىتاپحانا قارايدى. سونىڭ ىشىندە التاۋى بالالارعا ارنالعان. بارلىق كىتاپحانادا 700 مىڭعا تارتا كىتاپ قورى ساقتالعان. ونىڭ 200 مىڭعا جۋىعى – قازاق تىلىندە جارىق كورگەن دۇنيەلەر. كىتاپحانالار جۇيەسىنە ەلوردا بويىنشا 70 مىڭنان اسا وقىرمان تىركەلگەن. سونىڭ تەڭ جارىمى – بالالار. كەيىنگى جىلدارى جاسوسپىرىمدەردىڭ كىتاپقا دەگەن قىزىعۋشىلىعى ارتقان. بۇعان اتا-انالاردىڭ دا ىقپالى بار ەكەنى داۋسىز.
كىتاپحانالار جۇيەسى دەمالىس كەزىندە جۇزدەن استام شارالار وتكىزۋدى جوسپارلاعان. بۇگىنگە دەيىن ونىڭ كوبىسى ويداعىداي ءوتتى. سونىڭ بىرەۋىنە عانا توقتالايىق. ماسەلەن, 1 ماۋسىم – حالىقارالىق بالالاردى قورعاۋ كۇنىنە ارناپ قالا اكىمدىگى مەن كىتاپحانالار جۇيەسى بىرلەسىپ «جاز بىزگە باقىت سىيلايدى» اتتى اۋقىمدى شارا وتكىزدى. وندا بالالارعا ارنالعان كىتاپ كورمەسى, ءان مەن كۇيگە تولى كونتسەرت, اۋلالىق وتباسىلىق كلۋبتاردىڭ جارىسى ۇيىمداستىرىلدى. ءدال وسى مەرەكە اياسىندا №12 كوپشىلىك كىتاپحانانىڭ كىشكەنتاي وقىرماندارى اكە-شەشەلەرىمەن «عاجايىپتار الاڭى» ويىنىن وينادى. «رادۋگا» ءانسامبلىنىڭ ونەرپازدارى تامىلجىتىپ ءان سالدى. استانالىق تسيركتىڭ ازىلكەش ارتىستەرى ازىلبەك بولاتوۆ, داۋلەت سەرعازىۇلى, ايسۇلۋ ابدىكارىم جانە اقتوتى تيمۋر كەشتىڭ كورىگىن قىزدىردى.
سونداي-اق, باس شاھاردىڭ 20 جىلدىعىنا ارنالعان شارالاردان كىتاپحانالار جۇيەسى دە تىس قالمادى. ءدال قالا كۇنى حاكىم اباي ەسكەرتكىشى الاڭىندا «اباي رۋحى جاڭعىرعان ۇلى دالا استانا!» اتالعان كىتاپ جانە پوەزيا مەرەكەسى ءوتتى. بۇعان دا جەتكىنشەكتەردىڭ قوسقان ۇلەسى مول بولدى.
قوعامدا بالالار كىتاپ وقىمايدى دەگەن تۇسىنىك بار. مۇنىڭ قاتە ۇعىم ەكەنىن بىزگە №3 بالالار كىتاپحاناسىنىڭ مەڭگەرۋشىسى مارال اقتاەۆا ايتىپ بەردى.
« ءبىز جازعى دەمالىسقا مۇقيات دايىندالامىز. بالالارعا ارناپ وتەتىن شارالاردى ابدەن سۇزگىلەيمىز. ايتالىق, ءبىزدىڭ كىتاپحانادا ماۋسىمنان بەرى «الاقاي, جاز كەلدى, كىتاپ وقيتىن كەز كەلدى» دەگەن كورمە وتۋدە. بيىل كىتاپحانا جۇيەسىنە جاقسى قارجى بولىنگەندىكتەن 5-14 جاس اراسىندا جەتكىنشەكتەرگە ارنالعان كىتاپتار كوپتەپ ساتىپ الىندى. كۇن سايىن بىزگە 5-6 بالا كەلىپ وتىرادى. ناقتىراق ايتقاندا, كىتاپحاناعا سوڭعى ەكى ايدا 500-دەن اسا جەتكىنشەك كەلگەن. كەيبىر اتا-انالار بالالارىن وزدەرى جەتەكتەپ الىپ كەلدى. ءبىز كىتاپحاناعا 5 جاستاعى بالعىنداردى دا شاقىرامىز. ولارعا ارنالعان لوگيكالىق ويىندار بار, سونىمەن ويناپ, ۋاقىتتارىن وتكىزەدى. اسىرەسە, بيىل جاسوسپىرىمدەردىڭ كەلۋى جوعارى بولىپ وتىر» دەدى كىتاپحانا مەڭگەرۋشىسى.
«استانا – كىتاپ وقيتىن قالا» شاراسى اياسىندا بالالار ادەبيەتىنىڭ بەلدى وكىلدەرى – ءمادي ايىمبەتوۆ, تولىمبەك ءابدىرايىم, تىلەۋعازى بەيسەنبەك, ءجادي شاكەن, قالقامان سارين سەكىلدى قالامگەرلەرمەن تاعىلىمدى كەزدەسۋ ۇيىمداستىرىلدى.
وسى تامىز ايىندا دا وتىزعا تارتا ءتۇرلى تارتىمدى كەشتەر, كىتاپ كورمەسىن وتكىزۋ كوزدەلگەن. «سالەم, كىتاپحانا» شاراسى شەڭبەرىندە جەتكىنشەكتەر كىتاپحانالارعا ەكسكۋرسيا جاسايدى. جاسوسپىرىمدەر وزدەرى وقىعان كىتاپتارىن تالقىلايتىن كونفەرەنتسيا ۇيىمداستىرىلادى. ساياباقتا كىتاپ وقۋ مەرەكەسى وتپەك. قىسقاسى, ورتالىقتاندىرىلعان كىتاپحانالار جۇيەسى ەلوردالىق بالالاردىڭ جازعى دەمالىسى قىزىقتى ءوتۋ ءۇشىن بار مۇمكىندىكتى جاساعان.
