اباي ەسكەرتكىشىنىڭ جانىندا استانانىڭ 16 جىلدىعىنا ارنالعان «ماڭگىلىك ەل – قازاق ەلىنىڭ ۇلتتىق بولاشاعى» اتتى كىتاپ جانە پوە-زيا مەرەكەسى ءوتتى. ورتالىقتاندىرىلعان كىتاپحانالار جۇيەسى وسىنداي اتاۋمەن كىتاپ كورمەسىن, ال قالاداعى باسپالار جارمەڭكەسىن ۇيىمداستىردى.
«ماڭگىلىك ەل – ۇرپاقتار ساباقتاستىعى» اتاۋىن العان ادەبي پرومەنانادقا قاتىسقان اقىندار ەلدىكتىڭ رۋحىنداعى ولەڭدەردى وقىدى.
«بالدىرعان», «اق جەلكەن», «ۇلان», «درۋجنىە رەبياتا» باسىلىمدارىنىڭ باسىن بىرىكتىرىپ وتىرعان «جاس وركەن»سەرىكتەستىگى بيىلعى جىلدى مۇزافار الىمباەۆ, قادىر مىرزا ءالى, تۇمانباي مولداعاليەۆ – «ءۇش بايتەرەك» جىلى دەپ جاريالاعان ەدى. وسىنداي اتاۋمەن زياتكەرلىك كوركەمسوز سايىسىنا رەسپۋبليكالىق, قالالىق وقۋلاردىڭ جەڭىمپازدارى, مۇمكىندىگى شەكتەۋلى بالالار, مەكتەپ وقۋشىلارى قاتىستى.
وسى جىلدىڭ ءساۋىر ايىندا 10-16 جاس شاماسىنداعى مەكتەپ وقۋشىلارى ءۇشىن «استانا – بولاشاقتىڭ قالاسى» تاقىرىبىنا ءمۇشايرا جاريالانعان. ونىڭ جەڭىمپازدارى پوەتيكالىق مارافون ارقىلى ءوز تۋىندىلارىن ەلوردانىڭ تۋعان كۇنىنە تارتۋ ەتىپ, قالا اكىمدىگىنىڭ ارنايى سىيلىقتارى, العىس حاتتار جانە باعالى سىيلىقتارىمەن ماراپاتتالدى.
استانا قالاسىنىڭ قۋىرشاق تەاترى كىتاپ جانە پوەزيا مەرەكەسىن تەاترلاندىرىلعان كورىنىستەرىمەن ارلەندىردى. «وقى استانا» اكتسياسىندا قالاداعى كىتاپحانالار تۋرالى اقپاراتتىق بۋكلەتتەر, كىتاپتار تەگىن ۇلەستىرىلدى.
مەرەكەنى ورتالىقتاندىرىلعان كىتاپحانالار جۇيەسىنىڭ قىزمەتكەرلەرى فلەش-موبپەن اياقتادى.
امانعالي قالجانوۆ
