جۋىردا ەركەعالي راحماديەۆ اتىنداعى مەملەكەتتىك اكادەميالىق فيلارمونيا ساحناسىندا «Alem» زاماناۋي حورەوگرافيا بالەتى «Solo» پلاستيكالىق ديۆەرتيسمەنت قويىلىمىنىڭ پرەمەراسىن ۇسىندى.
«Solo» زاماناۋي ەكسپەريمەنتالدى پلاستيكالىق ديۆەرتيسمەنت قويىلىمىنىڭ فيلوسوفيالىق نەگىزى, ونىڭ يدەيالىق مازمۇنى مەن رەجيسسەرلىك ىسكە اسىرىلۋى – «Alem» زاماناۋي حورەوگرافيا بالەتىنىڭ كوركەمدىك جەتەكشىسى باقىت تاجينوۆتىڭ ەڭبەگى. ەكسپەريمەنتتىك حورەوگرافيا ستيلىندەگى بي نومىرلەرى زاماناۋي كومپوزيتورلاردىڭ مۋزىكاسىمەن سۇيەمەلدەنەدى. «Alem» زاماناۋي حورەوگرافيا بالەتىنىڭ ارتىستەرى پلاستيكا, يكەمدىلىك, تونۋس جانە مۋزىكانىڭ ەرەكشە سەزىنۋدى تالاپ ەتەتىن «ىشتەي سەزىنۋ ارقىلى» بيلەي الاتىن بىرەگەي تەحنيكانى مەڭگەرگەنىن كورسەتەدى. قويىلىمنىڭ ەرەكشەلىگى – وعان فيلارمونيانىڭ باسقا شىعارماشىلىق ۇجىمدارىنىڭ اسپاپشى-مۋزىكانتتارى مەن شاقىرىلعان بالەت ارتىستەرىنىڭ قاتىسۋى. سولاردىڭ ءبىرى – پەتروپاۆل قالاسىنان كەلگەن ەرەكشە قاجەتتىلىكتەرى بار ادامدارعا ارنالعان «Sensitive» بي تەاترىنىڭ ءسوليسى دانيال كانگوجين. وسىنداي بىرلەسكەن قويىلىم ەركەعالي راحماديەۆ اتىنداعى مەملەكەتتىك اكادەميالىق فيلارمونيا بالەت ارتىستەرى ءۇشىن العاشقى ينكليۋزيۆتى تاجىريبە بولدى. قويىلىمنىڭ قويۋشى-بالەتمەيستەرلەرى – ۇلان يزەناەۆ پەن جاننا سەيىتوۆا, بالەتتەن رەپەتيتور – جانات سارسەمباەۆ, شاقىرىلعان قويۋشى-بالەتمەيستەرلەر – «Sensitive» بي تەاترىنىڭ باس بالەتمەيستەرى ولگا روستوۆششيكوۆا (پەتروپاۆل), قر ۇلتتىق ۇلانى ءان جانە بي ءانسامبلىنىڭ كوركەمدىك جەتەكشىسى جانە قويۋشى-حورەوگرافى گۇلميرا راشەۆا (استانا).
استاناداعى پرەمەرادان كەيىن پلاستيكالىق ديۆەرتيسمەنت قويىلىمى گاسترولدىك ساپارعا شىقتى. 30 ناۋرىزدا ۇكىلى ىبىراي اتىنداعى اقمولا وبلىستىق فيلارمونياسىنىڭ كونتسەرت زالىنىڭ ساحناسىندا «Solo» قويىلىمىن كوكشەتاۋ حالقى تاماشالادى. 31 ناۋرىزدا ونەرپازدار اق قايىڭدار ولكەسىندە – پەتروپاۆلداعى اقان سەرى اتىنداعى سولتۇستىك قازاقستان وبلىستىق فيلارمونياسىندا ونەر كورسەتەدى.
«Alem» زاماناۋي حورەگرافيا بالەتىنىڭ قۇرامىندا كۇردەلى حورەوگرافيالىق تاپسىرمالاردى ورىنداي الاتىن كاسىبي بيشىلەر جۇمىس ىستەيدى. ولاردىڭ شەبەرلىگى اكتەرلىك دارىن مەن ورىنداۋداعى زور مازمۇنمەن تولىعا تۇسەدى. ارتىستەر ءوز كونتسەرتىندە حورەوگرافيالىق ونەردىڭ بايلىعى مەن سۇلۋلىعىن كورسەتە وتىرىپ, كلاسسيكادان مودەرنگە دەيىنگى سان الۋان بي ءستيلىن كورەرمەنگە پاش ەتەدى.
استانادا ەرەكشە كونتسەرت بەرىپ, ەلوردالىقتاردى قۋانتقان تالانتتى ونەرپازدارعا ارقاشان ساتتىلىك تىلەيمىز!
