استانادا 1951 جىلدان قالالىق زاعيپتار قوعامى تولىققاندى جۇمىس ىستەي باستادى. بۇگىندە بۇل قوعامعا مۇشە بولىپ كوزدەرى كورمەيتىن جانە ناشار كورەتىن بەس جۇزگە جۋىق مۇگەدەكتەر تىركەلگەن. ولاردىڭ قاتارىندا عىلىمدار كانديداتى كەزىندە تانىمال بولعان ءانشى-كۇيشىلەر, سپورت شەبەرلەرى, مۇعالىمدەر مەن دارىگەرلەر, جۇرگىزۋشىلەر جانە باسقا دا ماماندىق يەلەرى بار.
ءبىر ەرەكشە قۋانارلىق ءسات ۇيىمدا كوز جانارىنان ايىرىلعان ازاماتتار ءۇشىن برايل ادىسىمەن وقيتىن (بەدەرلى نۇكتەلى قارىپتەر ارقىلى) ارنايى كىتاپحانا اشىلعان. دەگەنمەن قازاق تىلىندەگى بەدەرلى قارىپتەگى وقۋلىق كىتاپتار جوقتىڭ قاسى.
سونداي-اق قوعامدا مۇمكىندىگى شەكتەۋلى ازاماتتارعا ارنالعان وندىرىستىك كاسىپورىن, تىگىن تسەحتار, ءارتۇرلى ماماندىققا دايىنداپ ۇيرەتەتىن ۇيىرمەلەر جۇمىس ىستەيدى. اسىرەسە, كوركەمونەرپازدار ۇيىرمەسىنىڭ يگى ىستەرىن اتاپ وتكەن ءجون. بىرنەشە بايقاۋلارعا قاتىسىپ, جۇلدەلى ورىنداردى جەڭىپ العان ەكى داۋىستى ۇلكەن حور ۇجىمى «حالىق حورى» دەگەن قۇرمەتتى اتاققا يە بولدى.
الايدا قوعام مۇشەلەرىنىڭ پىكىرىنە قاراعاندا قالالىق زاعيپتار قوعامى ولاردىڭ سۇرانىستارىن قاناعاتتاندىرا الماي وتىرعان سياقتى.
– بۇرىندارى كوپشىلىك باعىتتاعى تانىمدىق مادەني شارالار ءجيى وتەتىن. ناۋرىز, باسقا دا مەرەكەلەردە جينالىپ, ءبىر-ءبىرىمىزدى قۇتتىقتاپ, كونتسەرت تىڭداپ, ءبىر قۋانىپ قالاتىنبىز. ارىپتەستەرىمىزدىڭ 50-60-70 جاسقا تولعان تۋعان كۇندەرى دە ەلەۋسىز قالمايتىن. ال سوڭعى جىلدارى ناۋرىز تۇگىلى, قازان ايىنداعى مۇگەدەكتەر كۇنى اتاۋسىز قالدى, – دەيدى توپ جەتەكشىسى بولعان باقىت تەلجانوۆا.
– مەن 2003 جىلدان قوعام مۇشەسىمىن. جىل سايىن مۇشەلىك جارناسىن تولەيمىن. ءار جىلدا ونىڭ دا قۇنى وسەدى. بىراق, قوعام جۇمىسىندا ەشقانداي وڭ وزگەرىستەر بايقالمايدى. جينالىپ دايىندالاتىن, رەپەتيتسيا وتكىزەتىن ورىن جوق. كەزىندە قوعامنىڭ جەكە عيماراتى, جينالىس, كونتسەرت وتكىزەتىن ۇلكەن اكت زالى دا بولعان. قازىر قوعام قىزمەتكەرلەرى ءوندىرىس كاسىپورنىنا كوشىپ الىپ, اكىمشىلىك عيماراتىن جالعا بەرگەن بە, بىلمەيمىز. ءبىر قىزىعى, بىلتىردان بەرى قوعام مۇشەلەرىن جاڭادان قايتا تىركەيمىز, سول ءۇشىن 1200 تەڭگەدەن تولەڭدەر دەگەندى شىعاردى, – دەپ تاعى ءبىر قوعام مۇشەسى رەنىشىن ءبىلدىردى.
ءبىز وسى ماسەلەلەر توڭىرەگىندە استانا قالالىق زاعيپتار قوعامىنىڭ توراعاسى ەرعالي بۇقاروۆقا بىرنەشە ساۋال قويدىق.
– قوعام مۇشەلەرىن قايتا تىركەۋ تۋرالى شەشىمدى پرەزيديۋم قابىلدادى. ال مۇقتاج جاندارعا ماتەريالدىق كومەك بەرۋ ازىق-تۇلىكپەن جاردەمدەسۋ نەمەسە ولاردىڭ تۋعان كۇندەرىندە سىيلىق تارتۋ ءبىزدىڭ مىندەت ەمەس. بۇل ۇستانىمىزدى رەسپۋبليكالىق زاعيپتار قوعامى دا قولدايدى, – دەدى قوعام توراعاسى. قوعام مۇشەلەرىن قايتا تىركەۋ (500 مىڭ تەڭگە) سەبەپتەرى تۋرالى تۇسىنىك بەرمەدى.
جازمىشتىڭ جازۋىمەن جارىق دۇنيەنى جانارىمەن كورۋ قابىلەتىنەن شەكتەلگەن مۇگەدەكتەردىڭ رۋحاني سۇرانىستارىن قامتاماسىز ەتۋ, ولاردىڭ ومىرگە دەگەن قۇشتارلىق تالاپ-تىلەكتەرىن قولداۋ – بۇكىل قوعامىمىزدىڭ ابىرويى ءارى ماڭىزدى مىندەتى. پرەزيدەنتىمىز قاسىم-جومارت توقاەۆتىڭ كەزەكتى حالىققا جولداۋىندا الەۋمەتتىك سالاعا ەرەكشە كوڭىل بولىنگەن. بۇگىندە مەملەكەت تاراپىنان دەمەۋشىلەر مەن ەرىكتىلەر ۇيىمدارىنىڭ تۇرمىسى تومەن ادامدارعا جاپپاي كومەكتەسۋى جاقسى ۇردىسكە اينالدى. تەك بۇل يگى ءىستى اشىق ءارى دۇرىس ۇيىمداستىرا بىلگەن ابزال.
نەگىزى قازىرگى تەحنولوگيا دامىعان زاماندا مۇمكىندىگى شەكتەۋلى ازاماتتارعا ارنالعان ورگتەحنيكا, دىبىستى كىتاپ, كۇن ساۋلەسىنىڭ شۋاعىن بىلدىرەتىن اپپاراتتار جانە باسقا دا جاڭا شىققان قۇرالدار مۇگەدەكتەر ءۇشىن قولجەتىمدى بولۋ كەرەك.
جالپى زاعيپتاردىڭ, اسىرەسە كوزدەرى سۋ قاراڭعى كورمەيتىن ادامداردىڭ ءومىر تىنىس-تىرشىلىگى ەرەكشە, ولاردىڭ باسقان ءار قادامى – كۇردەلى قۇبىلىس. ونى تولىق ءتۇسىندىرىپ, جەتكىزۋدىڭ ءوزى قيىن. سوندىقتان, وسىنداي جانداردىڭ ءار ەموتسياسىن سەزىنە ءبىلۋ, قارىم-قاتىناس جاساي الۋ, كوڭىلدەرىنە كىربىڭ تۇسىرمەۋگە تىرىسۋ – بۇل قوعام قىزمەتكەرلەرىنىڭ كاسىبي ميسسياسى, ءارى باستى مىندەتى.
بيمەندە قازانقاپ,
زەينەتكەر
