ەلوردانىڭ بارلىق كوشەلەرى مەن جاياۋ جۇرگىنشىلەرگە ارنالعان جولدارى قار مەن مۇزدان تازارتىلىپ, قالانىڭ كوممۋنالدىق قىزمەتتەرى تاۋلىك بويى, اسىرەسە كەشكى جانە تۇنگى ۋاقىتتا كۇشەيتىلگەن رەجيمدە جۇمىس ىستەۋدە.
استانانىڭ بارلىق اۋدانىندا, اتاپ ايتساق, قوعامدىق ورىنداردا, ورامىشىلىك اۋماقتاردا, تروتۋارلاردا, ايالداما پاۆيلوندارىندا قۇم ارالاسقان تۇز قوسپاسىن قۇيۋ جۇمىسى جۇرگىزىلىپ جاتىر.
قىس مەزگىلىنىڭ باسىنان باستاپ قار پوليگونىنا شامامەن 2,2 ملن تەكشە مەتر قار مەن مۇز شىعارىلدى.
الماتى اۋدانىنىڭ اكىمى ماقسات ساماتۇلىنىڭ ايتۋىنشا, قازىر اۋدان اۋماعىنداعى نەگىزگى كوشەلەر, تروتۋارلار, اۋلالار مەن ورامىشىلىك جولدار قاردان تازارتىلۋدا.
– اسىرەسە حالىق كوپ جۇرەتىن جولدار مەن الەۋمەتتىك نىسانداردىڭ, ماسەلەن, بالاباقشا, مەكتەپ جانە ەمحانالاردىڭ ماڭىن قاردان تازارتۋعا باسىمدىق بەرىلىپ كەلەدى. نەگىزگى ورتالىق كوشەلەر ونسىز دا تاپ-تازا. ەندىگى كۇش بالالار مەن ەگدە جاستاعى ادامدار كوبىرەك جۇرەتىن جولداردى تازارتۋعا سالىنۋدا. مەنىڭ وكىمىم بويىنشا مەردىگەرلىك ۇيىمداردى باقىلاۋ كۇشەيتىلەدى, – دەدى اۋدان اكىمى.
قازىرگى ۋاقىتتا بارلىق اۋلالار قىسقا مەرزىمدە تازارتىلاتىن كوشەلەردى بەلگىلەپ, ارنايى كەستە جاسادى. ەگەر كەلىسىمشارت بويىنشا اتقارىلاتىن جۇمىس ۋاقىتىندا ورىندالماسا, مەردىگەرلەردىڭ قاتاڭ جازالاناتىنى ەسكەرتىلدى. تايعاق جەرلەردە قۇلاپ, جاراقات الماس ءۇشىن ەلوردا تۇرعىندارى مەن قوناقتارى قوزعالىس ەرەجەسىن قاتاڭ ساقتاۋى كەرەك. ال اينالامىزداعى دۇكەندەر, ساۋدا ورتالىقتارى جانە باسقا دا قوعامدىق مەكەمە يەلەرى ءوز اۋماقتارىنداعى قاردى جيناۋ, كىرەبەرىستەگى مۇزدى جانە وزدەرىنە بەكىتىلگەن اۋماقتى ۋاقىتىلى تازارتۋ جۇمىسىن دەر كەزىندە اتقارىپ وتىرسا يگى.
بايقوڭىر اۋدانى اكىمىنىڭ اپپاراتى بولسا جەكە سەكتور تۇرعىندارىن ءوز اۋلالارىنداعى قاردى جول بويىنا شىعارۋعا شاقىردى. جينالعان قار ارنايى تەحنيكانىڭ كومەگىمەن قالا سىرتىنداعى پوليگوندارعا جونەلتىلۋدە. سونىمەن قاتار اۋدان بويىنشا كوكتەمگى سۋ تاسقىنى كەزەڭىنە دايىندىق جۇمىستارى باستالدى.
بۇگىنگى تاڭدا اۋدان اكىمدىگىندە سۋ باسۋدىڭ الدىن الۋ ماقساتىندا ارىق-ناۋا جەلىسىن تازارتۋ جۇمىسى جۇرگىزىلۋدە. وسىعان بايلانىستى اۋدان اكىمى ەرلان جاۋلىباەۆ تۇرعىن ءۇي الاپتارىن ارالاپ, سۋ باسۋعا بەيىم ۋچاسكەلەردى كوزىمەن كورىپ قايتتى.
اكىم اپپاراتىنىڭ ءباسپاسوز قىزمەتى اتاپ وتكەندەي, بىلتىر جازدا سۋ تاسقىنىنا قارسى ءىس-شارالار اياسىندا جاۋىن-شاشىن مەن ەرىگەن سۋ كەزەڭىندە سۋ باسۋدى بولدىرماۋ ءۇشىن ارىق-ناۋا جەلىلەرىن ورناتۋ بويىنشا اۋقىمدى جۇمىستار جۇرگىزىلدى. سۋ تاسقىنىنا قارسى ءىس-شارالار كەزەڭىندە 112 كوشە تازارتىلدى. جۇمىسقا 30 بىرلىك مامانداندىرىلعان تەحنيكا جۇمىلدىرىلدى. ناتيجەسىندە 23500 شاقىرىم ارىق-ناۋا جەلىسى تازارتىلىپ, 500 تەكشە مەتر اۋماققا اعاش جانە 1000 قاپ قۇم دايىندالدى.
ەسىل اۋدانى دا قول قۋسىرىپ قاراپ وتىرعان جوق. سوڭعى اپتادا 130 تەكشە مەتردەن استام تۇز ارالاس قۇم قوسپاسىن پايدالانىپ, اۋداننىڭ كوممۋنالدىق قىزمەتتەرى جولداردى, ورامىشىلىك اۋماقتاردى تازارتتى. سونىمەن بىرگە قوعامدىق كەڭىستىكتەردى, ايالداما پاۆيلوندارى ماڭىنداعى اۋماقتاردى مۇزدان تازارتۋ بويىنشا كۇشەيتىلگەن جۇمىستار جۇرگىزىلۋدە. مامانداردىڭ مالىمدەۋىنشە, قازىرگى ۋاقىتتا كوشەلەردى قار مەن مۇزدان تازارتۋعا 600-گە جۋىق جول جۇمىسشىسى جانە 250-دەن استام ارنايى تەحنيكا جۇمىلدىرىلعان.
قار شىعارۋ جۇمىستارى سارىارقا اۋدانىندا دا قىزۋ جۇرگىزىلىپ جاتىر. اۋدان بويىنشا قار تازالاۋ كەستەسى ءىلىنىپ, نەگىزگى جۇمىستار سونىڭ نەگىزىندە جۇرگىزىلە باستادى. بۇل ءوز كەزەگىندە كوممۋنالدىق قىزمەتكەرلەر مەن ارنايى تەحنيكانىڭ جۇمىسىنا كەدەرگى كەلتىرمەيتىن بولدى. ويتكەنى ەندى تۇرعىندار اۋلانى قاي كۇنى تازالايتىنىن الدىن الا ءبىلىپ وتىرادى جانە ارنايى نۇسقاۋلىق بويىنشا ماشينالارىن سول كۇندەرى اۋلادا قالدىرماۋعا تىرىسادى. كەستە ىلىنگەن تاقتالاردا اۋدان اكىمدىگى اپپاراتىنىڭ قار تازالاۋعا جاۋاپتى ماماندارى مەن مەردىگەرلەردىڭ نومىرلەرى كورسەتىلگەن. سوندىقتان جۇمىس ساپاسىنا قانداي دا ءبىر پىكىرىڭىز بولسا, جاۋاپتى تۇلعالارمەن تىكەلەي حابارلاسۋعا مۇمكىندىك قاراستىرىلعان.
