كەشە ەلوردادا 12 قازانعا دەيىن سوزىلاتىن جىلدىڭ نەگىزگى اۆتو ۋاقيعاسى – «Astana International Auto Salon – 2014» (AIAS-2014) ەكىنشى حالىقارالىق كولىك كورمەسى باستالدى.
بۇگىنگى تاڭدا پرەزيدەنت اپپاراتىنىڭ وڭ باعاسىنا يە بولعان كورمە ينۆەستيتسيالار جانە دامۋ مينيسترلىگىنىڭ, استانا قالاسى اكىمدىگىنىڭ جانە قازاقستاندىق اۆتوموبيل بيزنەسى قاۋىمداستىعىنىڭ رەسمي قولداۋىمەن وتۋدە. ال, باستى ۇيىمداستىرۋشى – «ExpoGroup» حالىقارالىق كورمە كومپانياسى.
كورمەدە «MITSUBISHI», «RENAULT», «JEEP», «Volkswagen», «Maserati», «SsangYong», «Peugeot», «IVECO», «Hyundai», «Lada», «SKODA», «KIA», «CHEVROLET» سەكىلدى برەندتەر كورسەتىلىپ, قوناقتارعا الەمدىك جانە وتاندىق اۆتوموبيل وندىرىسىندەگى جەتىستىكتەر تۋرالى ماعلۇماتتار بەرىلدى. سونداي-اق, اۆتوبۇيىمدار, قوسالقى بولشەكتەر, اۆتوحيميا جانە اۆتوكوسمەتيكا, تيۋنينگ, اۆتوەلەكترونيكا, اۆتونەسيەلەندىرۋ جانە اۆتوساقتاندىرۋ جايى دا نازاردان تىس قالعان جوق.
ەلەكتر كولىگىن ەلىمىزدە العاش رەت تانىستىرعان حالىقارالىق اۆتوسالون وسى جىلى ءوز قاتارىنا گيبريدتى اۆتوموبيلدەردى قوسىپ وتىر. «جاسىل تەحنولوگيا» تاقىرىبىمەن قولعا الىنعان بۇل شارا قورشاعان ورتاعا نەعۇرلىم از زيان كەلتىرەتىن يننوۆاتسيالىق تەحنولوگيالاردى ەنگىزۋ جولىنداعى ماڭىزدى قادام بولعالى تۇر. اسىرەسە, بۇنى 2017 جىلى استانادا وتەتىن «EXPO» بۇكىل الەمدىك كورمەسىن وتكىزۋ قارساڭىنداعى ماڭىزدى ءىس دەپ ءبىلۋ كەرەك.
كورمە باعدارلاماسى بويىنشا قاتىسۋشى كومپانيالاردىڭ جانە ۇيىمداستىرۋشىلاردىڭ ءتۇرلى تۇساۋكەسەرلەرى, اكتسيالارى, شوۋلارى جانە بايقاۋلارى وتكىزىلدى.
نۇريسلام قۇسپانعالي
