استانا مەرەيتويىنا ءبىر اپتا قالعاندا ەلوردا ءتارتىپ ساقشىلارى مەرەكە كۇندەرى قوعامدىق ءتارتىپتى ساقتاۋ ماقساتىندا اتقارىلاتىن شارالار جونىندە بايانداپ, ءباسپاسوز ءماسليحاتىن وتكىزدى. وعان استانا قالاسى جول پوليتسياسى باسقارماسىنىڭ باستىعى باقىتجان مالىباەۆ, اكىمشىلىك پوليتسياسى باسقارماسى باستىعىنىڭ ورىنباسارى عوسمان جاكين جانە وسى باسقارمانىڭ ءبولىم باستىعى قۇرالاي قارينا قاتىستى.
مەرەكە كۇندەرى, ياعني, 4-8 شىلدە ارالىعىندا پوليتسەيلەر كۇشەيتىلگەن رەجيمدە جۇمىس ىستەيتىن بولادى. قوعامدىق ءتارتىپتى قامتاماسىز ەتۋگە بارلىعى 2 مىڭعا جۋىق قىزمەتكەر, 200 قىزمەتتىك اۆتوكولىك, 2 مىڭ تۋرنيكەت, ارناۋلى تەحنيكا جانە ادام ومىرىنە قاۋىپتى جارىلعىش پەن تىيىم سالىنعان زاتتاردىڭ ءوتىپ كەتپەۋىن اۋەدەن باقىلايتىن تىكۇشاق تارتىلادى. سونداي-اق, جول پوليتسياسىنىڭ 450 قىزمەتكەرى مەن 80 پاترۋلدىك كولىگى جول قوزعالىسىنىڭ قاۋىپسىزدىگىن قامتاماسىز ەتۋگە جۇمىلدىرىلادى.
ەلورداعا كىرۋ-شىعۋ جولدارى قاتاڭ باقىلاۋعا الىنادى. مەرەكەلىك شارالاردىڭ وتۋىنە بايلانىستى تاۋەلسىزدىك كوشەسىنەن جۇمەكەن ناجىمەدەنوۆ كوشەسىنە دەيىنگى جول ۋچاسكىسىنە 8 شىلدە كۇنگى ساعات 15.00-گە دەيىن شەكتەۋ قويىلادى. كولىكتەر اينالما جولدار ارقىلى جۇرەتىن بولادى.
«قازاق ەلى» الاڭىندا وتەتىن مەرەكەلىك شارالارعا كەلۋشىلەردىڭ جانە قاتىسۋشىلاردىڭ كولىكتەرى «حازىرەت سۇلتان» مەشىتى جانە «بەيبىتشىلىك جانە كەلىسىم سارايى» اۋماعىنداعى تۇراقتارعا ايالدايدى.
6 شىلدە كۇنى ساعات 10.00-دەن 13.00-گە دەيىن «جاستار» سارايىنان باستاۋ الىپ, «بايتەرەك» مونۋمەنتىنە دەيىن 4-5 مىڭ ادام قاتىساتىن «جۇلدىزدار شەرۋى» وتەدى. سوندىقتان, رەسپۋبليكا داڭعىلىنان دىنمۇحامەد قوناەۆ كوشەسىنە دەيىن كولىك جۇرىسىنە شەكتەۋ قويىلادى. كولىكتەر جاعالاۋدا جەڭىس داڭعىلى, شوقان ءۋاليحانوۆ كوشەسى ارقىلى, سول جاعالاۋدا سارايشىق, دوستىق كوشەلەرى, تۇران داڭعىلى ارقىلى جۇرەدى.
كولىكتەردىڭ ءجۇرۋ كەستەسى قوسىمشا بەرىلىپ وتىر.
امانعالي قالجانوۆ
