باس قالامىزدا ە.راحماديەۆ اتىنداعى مەملەكەتتىك اكادەميالىق فيلارمونياسىندا «ورتولعاۋ» كونتسەرتى ءوتتى. شاراعا «قورقىت» ەتنو-ءانسامبلى, «Alem» ەسترادالىق بي ءانسامبلى, مۋلتياسپاپشى ەدىل قۇسايىنوۆ جانە «Turan» فولكلورلىق-ەتنوگرافيالىق ءانسامبلى قاتىستى.
فيلارمونيانىڭ كوركەمدىك جەتەكشىسى گۇلميرا قۇتتىباداموۆانىڭ ايتۋىنشا, «ورتولعاۋ» كونتسەرتى ءداستۇرلى مۋزىكانى زاماناۋي قويىلىم جانە بيمەن ارلەندىرەدى.
«Turan» ءانسامبلى, قازاقستاننان باسقا, رەسەي, فرانتسيا, يزرايل, تۇركيا, گەرمانيا, وڭتۇستىك كورەيا, اقش, ازەربايجان, يسپانيا, نورۆەگيا جانە ت. ب. الەمنىڭ 70 ەلىندە 600-دەن استام كونتسەرت بەرگەن. الداعى ۋاقىتتا تۇركيا ەلىنە گاسترولدىك ساپارىن باستايدى. ءانسامبلدىڭ قۇرىلعانىنا 14 جىل بولعان.
– وسىدان 14 جىل بۇرىن قازاقستاندا ءداستۇرلى ونەردى ىلگەرىلەتۋ قيىن بولاتىن. سەبەبى كونتسەرتتەرگە تەك 10-20 ادام كەلەتىن. قازىرگى تاڭدا تەك مۋزىكا جازىپ قانا قويماي, سونىمەن قاتار, قازاق ونەرىن ءتۇرلى ەلدە ناسيحاتتاپ كەلەمىز. ال بۇل كونتسەرتكە كەلگەن كورەرمەندەردىڭ اراسىندا جاستاردىڭ كوپ ەكەنىن بايقاپ, قۋانىپ وتىرمىز, – دەدى انسامبل مۇشەسى سەرىك نۇرمولداەۆ.
«قورقىت» ەتنو-ءانسامبلىنىڭ كوركەمدىك جەتەكشىسى, مادەنيەت قايراتكەرى شولپان قورعانبەك ۇجىمنىڭ ماقساتى ءداستۇرلى مۋزىكانى دارىپتەۋ ەكەنىن اتادى.
– «قورقىت» ەتنو-ءانسامبلى قازاقتىڭ بارلىق حالىق اسپاپتارىندا (قوبىز, قىلقوبىز, نارقوبىز, دومبىرا, سىرناي, ءمۇيىز سىرناي, شاڭقوبىز, جەتىگەن, شەرتەر, داۋىلپاز, سازسىرناي, باس دومبىرا, سىبىزعى, سۋ اعاش, توقىلداق جانە ت. ب.) وينايتىن تالانتتى مۋزىكانتتاردى بىرىكتىرەدى. مۋزىكانتتار بىرنەشە اسپاپتى, سونداي-اق كومەيمەن ءان ايتۋدىڭ سيرەك تەحنيكاسىن مەڭگەرگەن. ۇجىم رەپەرتۋارىنىڭ نەگىزىن اۆتورلىق وڭدەۋدەگى كۇي, تەرمە, جىر قۇرايدى. ولاردىڭ اراسىندا «استانا-بايتەرەك», «بالالىق شاق دوسى», «ەلىم مەنىڭ», «تاۋەلسىزدىك تولعاۋى» جانە ب.مومىشۇلىنىڭ 100 جىلدىعىنا ارنالعان «ەلدىڭ ەرى – باۋىرجان!» تۋىندىلارى بار.
جينالعان كورەرمەن ونەرپازدارعا ءسۇيسىنىپ, ەرەكشە قوشەمەت كورسەتتى. حالىق مۋزىكا ونەرىنىڭ ناعىز مەرەكەسىنە اينالعان بىرەگەي كونتسەرتتىڭ سوڭى ايرىقشا قۋانىشقا اينالدى.
بايان اسىلبەكوۆا
