كوپپەن جۇگىرگەن كوڭىلدى
استانادا قالا تۇرعىندارىن بۇقارالىق سپورت شارالارىنا تارتۋ, سالاۋاتتى ءومىر سالتىن ناسيحاتتاۋ, سونداي-اق, ءتۋريزمدى دامىتۋ جولعا قويىلىپ كەلەدى. اسىرەسە, ەلوردالىقتاردىڭ ءتيىمدى دەمالىسىن ۇيىمداستىرۋعا بارىنشا كوڭىل بولىنە باستادى. وسى تۋرالى «ۇلتتىق سپورت تۇرلەرى جانە بۇقارالىق ساۋىقتىرۋ – دەنە شىنىقتىرۋ كلۋبى» مكقك ديرەكتورى سايرانبەك ابىلقايىروۆ ايتىپ بەردى.
– بۇقارالىق سپورتتىڭ ءورىسىن ۇزارتۋ ءۇشىن كلۋب تاراپىنان ات-قارىلىپ جاتقان شارۋالاردى ايتىپ بەرسەڭىز...
– ەلوردا باسشىلىعى دەنە شىنىقتىرۋدى اينىماس ادەتكە اينالدىرۋ قاجەت ءارى پايدالى ەكەنىن ءتۇسىندىرۋ ءۇشىن بارىنشا جاعداي جاساپ كەلەدى. ەڭ باستىسى سالالىق بىرنەشە سپورت كەشەندەرى پايدالانۋعا بەرىلدى. كۇندە كەشكىلىك سەرۋەندەپ جۇرگەندەر قالا كوشەلەرى مەن استانالىق ساياباعى, ەسىلدىڭ جاعالاۋىنا ورناتىلعان ترەناجەرلاردىڭ يگىلىگىن كورىپ ءجۇر. سونداي-اق, تەگىن جاتتىعۋ زالدارى جۇمىس ىستەيدى. جاز بويى ءار جەكسەنبى سايىن استانالىق ساياباقتا تاڭعى بۇقارالىق جۇگىرۋگە, سونداي-اق, بۇكىل وتباسىعا ارنالعان كوڭىل كوتەرۋ جانە ساۋىقتىرۋ جاتتىعۋلارىنا قاتىسا الادى. جاپپاي جۇگىرۋ سوڭعى كەزدەرى ءجيى وتكىزىلەدى. قازىرگى كەزدە بەلگىلى ءبىر كوماندا قالىپتاسىپ, ءار جولى جاڭا قاتىسۋشىلار قوسىلىپ جاتادى.
– سپورتتىق شارالارعا قاتىسقىسى كەلەتىندەر قاي جەرگە بارۋ كەرەك؟
– ءار جەكسەنبىدە م.وتەمىسۇلى اتىنداعى وقۋشىلار سارايىنىڭ جانىنا ساعات 9.00-دە جينالۋ كەرەك. ال جۇما سايىن ساعات 19.00-دەن 20.00-گە دەيىن «ءومىر نارىنەن ءلاززات ال!» اتتى اكتسيا اياسىندا كوڭىل كوتەرۋ, ساۋىقتىرۋ جاتتىعۋلارى وتەدى. بۇعان استانانىڭ بارلىق تۇرعىندارى مەن قوناقتارى, بالالار مەن ەرەسەكتەر, ءتىپتى, مەملەكەتتىك قىزمەتكەرلەر مەن كاسىپكەرلەر دە قاتىسا الادى. ءتۇرلى ويىندار مەن ترەنينگتەر ءوتكىزىلەدى. سوندىقتان بارلىق قالا تۇرعىندارىن قولجەتىمدى ءارى قاۋىپسىز مەرەكەگە شاقىرامىز.
– سوندا كەلۋشىلەرگە جاتتىعۋدى كىم جۇرگىزەدى؟
– قالامىزداعى «World Class» فيتنەس كلۋبتار جەلىسى ءىس-شارانى جۇرگىزەتىن فيتنەس جاتتىقتىرۋشىلارىمەن قامتاماسىز ەتىپ وتىر.
ەركەجان ساتىمبەك