ەلوردا تويىنا وراي 5-6 شىلدە كۇندەرى قالا اكىمدىگىنىڭ الدىنداعى ورتالىق الاڭدا الەمنىڭ ۇزدىك بيشىلەرى جينالادى. ونەرپازدار جەتى جىل قاتارىنان وتكىزىلىپ جۇرگەن «International Street Dance Session in Astana 2016» اتتى حالىقارالىق بي فەستيۆالىندە سايىسقا تۇسپەكشى.
ءداستۇرلى شارانىڭ ۇيىمداستىرۋشىسى – استانا قالاسىنىڭ اكىمدىگى مەن «United 4» پروديۋسەرلىك ورتالىعى. كونكۋرسانتتار حيپ-حوپ, پوپپينگ, دەنسحول, ۆاكينگ, كرامپ جانە حاۋس سەكىلدى ءارتۇرلى ستيلدە ونەر كورسەتپەكشى. ءار جانر بويىنشا قاتىسقانداردىڭ پروفەسسيونالدىق دەڭگەيىنە قاراي جەكە-جەكە اتالىمدار دا قاراستىرىلعان.
بيشىلەردىڭ ونەرىنە الەمگە تانىمال حورەوگرافتار تورەلىك ەتپەك. اتاپ ايتقاندا, فرانتسۋز حيپ-حوپ جانە حاۋس-ءبيشىسى Yugson, امەريكالىق حورەوگراف Adé Willis, تورتكۇل دۇنيەگە تانىمال كورەي پوپپينگ-ورىنداۋشى Dokyun, ۆاكينگ ستيلىندەگى جۇلدىزداردىڭ ءبىرى – تايۆاندىق Chrissy Chou, كوپتەگەن دەنسحول جارىستارىنىڭ جەڭىمپازى – نورا, سونداي-اق, قازاقستان مەن تمد بويىنشا ۇزدىك سانالاتىن كرامپەردىڭ ءبىرى – LIL STAGEKILLA.
كوشە بيلەرىنىڭ جاڭا باعىتتارىن پاش ەتكەن ءدۇبىرلى دودانىڭ قوناقتارى دا وسال ەمەس. ماسەلەن, 2010 جىلدان بەرى سايىستى تاماشالاۋعا «شاگ ۆپەرەد» فيلمىندە ويناعان, «تانتسى» جانە «زۆەزدا تانتسپولا» تەلەدۋمانىنا قاتىسقان, سونداي-اق, مايكل دجەكسون, بەيونسە, اشەر, دجاستين تيمبەرلەيك, دجاستين بيبەر سىندى جۇلدىزدارمەن بىرگە قىزمەتتەس بولعان حورەوگرافتار كەلگەن ەدى.
بيىلعى جارىستىڭ جالپى جۇلدە قورى 2,5 ميلليون تەڭگەدەن اسادى. ال باس بايگەگە 1 ميلليون تەڭگە تىگىلەدى.
ءمادينا جاقىپ
