ەلوردالىقتار ەندى تۇرمىستىق قالدىقتاردى بولەك-بولەك جينايتىن بولدى. بيىلعى 1 ناۋرىزدان باستاپ جۇزەگە اسىرىلا باستاعان قاناتقاقتى جوبا تۇرعىنداردىڭ ەكولوگيالىق مادەنيەتىن ارتتىرىپ, «جاسىل ەكونوميكاعا» بەيىمدەيتىن بولادى.
تۇرمىستىق قاتتى قالدىقتاردى بولەك-بولەك جيناۋ جونىندەگى پيلوتتىق جوبانى استانا قالاسىنىڭ اكىمدىگى, «استانا تازارتۋ» جشس جانە «ەفەس قازاقستان» جك اق بىرىگىپ جۇزەگە اسىرىپ وتىر. جوبا شەڭبەرىڭدە 1 ناۋرىزدان باستاپ 36 تۇرعىن ءۇي مەن 17 پيك اۋماعىندا قاعاز, پلاستيك, شىنى جانە ارالاس قالدىقتاردى بولەك-بولەك جيناۋعا ارنالعان ارنايى قوقىس جاشىكتەرى ورناتىلدى.
كوشەسى تازانىڭ – كوڭىلى تازا. ال كوشەنىڭ تازالىعى قوقىستى شاشپاي-توكپەي, ارنايى جاشىكتەرگە سالۋدان باستالادى. قورشاعان ورتانىڭ ەكولوگيالىق تازالىعىن ارتتىرۋ ماقساتىندا قولعا الىنعان جوبا بويىنشا استانا اۋلالارىنا قىزىل, جاسىل, سارى جانە كوك ءتۇستى ءتورت كونتەينەرلەر ورناتىلدى. ولاردىڭ بەتىنە جازىلعان جازۋعا قاراپ, قانداي قالدىققا ارنالعانىن بىلۋگە بولادى. مۇندا شىنى, ورگانيكا, پلاستيك بۇيىمدار مەن قاعازدار جەكە-جەكە سالىنۋى ءتيىس. استانا قالاسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى باسشىسىنىڭ ورىنباسارى ميراس گايسيننىڭ ايتۋىنشا, بۇگىندە قالا اۋماعىندا تۇرمىستىق قاتتى قالدىقتاردى بولەك-بولەك جيناۋعا ارنالعان 160 ارنايى ءتۇرلى-ءتۇستى كونتەينەر ورناتىلىپ وتىر. تۇرمىستىق قاتتى قالدىقتاردى تاسىمالداۋمەن «استانا تازارتۋ» جشس اينالىسادى. جينالعان قوقىستاردىڭ كادەگە جارايتىندارى قايتالاما شيكىزات دايىنداۋ ءۇشىن قوقىستى وڭدەۋ زاۋىتىنا جونەلتىلسە, ىسكە اسپايتىنى بىردەن قالا سىرتىنداعى پوليگونعا جىبەرىلىپ, جويىلادى.
بۇعان قوسا, ەلوردادا بىلتىرعى قاراشا ايىنان بەرى جەر ۇيلەردە تۇراتىن تۇرعىندار ءۇشىن كۇلسالعىش جاشىكتەر دە پايدا بولدى. «استانا تازارتۋ» جشس باس ديرەكتورى يۆان لاۆرينەنكونىڭ ايتۋىنشا, بۇرىن قوقىس كونتەينەرلەرىنە توگىلىپ جۇرگەن كومىردىڭ كۇلى كەيدە وتتىڭ تۇتانۋ قاۋپىن تۋعىزعان. ال قازىر كۇلگە ارنالعان جەكە جاشىكتىڭ پايدا بولۋى بۇل قاۋىپتى سەيىلتكەن كورىنەدى.
كۇل شىعارۋ جوباسى ىسكە اسىرىلعالى قالادا 75 كونتەينەر ورناتىلىپ, 600 توننادان استام كۇل پوليگونعا شىعارىلعان. بۇگىندە كۇل – سالعىش جاشىكتەر قالانىڭ شۇبار, كوكتال, لەسوزاۆود, ۇركەر سىندى جەر ۇيلەر شوعىرلانعان اۋماقتارعا ورناتىلعان.
سونداي-اق قالانىڭ بىرنەشە ساۋدا ورتالىقتارىندا ىستەن شىققان ەلەكتروندىق قۇرالداردى تاستايتىن 10 ەكوبوكس قويىلعان.
جالپى تۇرمىستىق قالدىقتارعا ارنالعان ارنايى جاشىكتەر ورناتۋ تاجىريبەسى ەلوردادا 2013 جىلدان بەرى جۇزەگە اسىرىلىپ كەلەدى. ايتالىق, بۇگىندە جارىق ديودتى شامدارعا ارنالعان سارعىش ءتۇستى جاشىكتەرگە جۇرتشىلىقتىڭ كوزى ۇيرەنىپ قالدى. ۋلى جارىقشامداردى سول جاشىكتەرگە تاستاۋدى ەلوردالىقتار ادەتكە اينالدىرعان كورىنەدى. سونىڭ ءبىر كورىنىسى, سوڭعى ءبىر جارىم جىلدىڭ ىشىندە جاشىكتەرگە تاستالعان ميلليوننان استام ديودتى شام كادەگە جاراتىلعان ەكەن.
قىمبات توقتامۇرات
