«جاسىل بەلدەۋگە» قول سالعان اقمولا وبلىسىنىڭ ءبىر تۇرعىنى ۇستالدى. وعان «استانا ورمانى» اۋماعىنان اعاش كوشەتتەرىن زاڭسىز قازىپ العانى ءۇشىن 31 815 تەڭگە مولشەرىندە ايىپپۇل سالىندى.
5 شىلدە كۇنى استانا قالاسىنىڭ ءىىد جەرگىلىكتى پوليتسيا قىزمەتىنىڭ تابيعات قورعاۋ پوليتسياسىنىڭ ينسپەكتورىنا «استانا ورمانى» اۋماعىنان جەلەكتەردى زاڭسىز قازىپ الۋ فاكتىلەرى تۋرالى قوڭىراۋ كەلىپ تۇسكەن. كوپ ۇزاماي پوليتسەيلەر «چينار» ءدامحاناسىنىڭ قاسىنان 12 ءتۇپ قايىڭ اعاشىن قازىپ الىپ كەتكەن ۇرىنى قولعا ءتۇسىردى. تەكسەرۋ بارىسىندا ونىڭ اعاشتاردى ءۇيىنىڭ اۋلاسىنا وتىرعىزباق بولعانى انىقتالدى. وسىعان بايلانىستى «جاسىل جەلەكتەردى كۇتىپ ۇستاۋ مەن قورعاۋ ەرەجەلەرىن بۇزۋ» بويىنشا اكىمشىلىك قۇقىق بۇزۋشىلىق تۋرالى ءىس قوزعالىپ, كۇدىكتىگە قازىپ العان جەلەكتەرىن قايتا ورىندارىنا وتىرعىزۋ جونىندە مىندەتتەمە بەرىلدى.
جالپى, جىل باسىنان بەرى جاسىل جەلەكتەردى كۇتىپ ۇستاۋ مەن قورعاۋ ەرەجەلەرىن بۇزۋ بويىنشا 537 زاڭدى جانە جەكە تۇلعا جالپى سوماسى 1 654 380 تەڭگەنى قۇرايتىن اكىمشىلىك جاۋاپكەرشىلىككە تارتىلدى.
