تاۋەلسىزدىك سارايىنىڭ كورمە زالىندا قازاق حاندىعىنىڭ 550 جىلدىعى جانە قر كونستيتۋتسياسىنىڭ 20 جىلدىعىنا وراي «تاريحقا تاعزىم» اتتى كورمەنىڭ اشىلۋ ءراسىمى ءوتتى. شاراعا ونەر قايراتكەرلەرى, اقپارات قۇرالدارىنىڭ باسشىلارى, ءتۇرلى سالا وكىلدەرى قاتىستى.
كورمەگە قازاقستان سۋرەتشىلەر جانە جۋرناليستەر وداعىنىڭ مۇشەسى, قر كوركەمسۋرەت اكادەمياسىنىڭ اكادەميگى, قر مادەنيەت قايراتكەرى جانۇزاق ءمۇساپىر مەن قازاقستان سۋرەتشىلەر وداعىنىڭ مۇشەسى ماقسات بەكسۇلتاننىڭ جۇمىستارى قويىلدى. كورمە زالىنا كىرە بەرگەندە-اق, قابىرعاعا ىلىنگەن قىلقالام شەبەرلەرىنىڭ ۇلتتىق بوياۋى قانىق سۇلۋ كارتينالارى بىردەن وزىنە باۋراپ, كوز مەيىرىن قاندىرادى. تۇرىكتىڭ ايگىلى جازۋشىسى, نوبەل سىيلىعىنىڭ يەگەرى ورحان پامۋكتىڭ «مەنىڭ اتىم قىزىل» اتتى ايگىلى رومانىندا سۋرەت ونەرىنىڭ قىر-سىرى تۋرالى, ءادىبى مەن ناقىشى جايىندا كوپ ماعلۇمات ۇشىراساتىن. مىنە, ەندى سول قۇدىرەتپەن بەتپە-بەت كەلگەندەي كوڭىلىمىز توعايدى.
قر پارلامەنت ءماجىلىسىنىڭ دەپۋتاتى ومارحان وكسىكباەۆ بيىل اتالىپ ءوتىپ جاتقان مەرەكەلەردىڭ تاريحي ماڭىزىنا توقتالىپ, قىلقالام شەبەرلەرىنە ساتتىلىك تىلەدى. «ەگەمەن قازاقستان» رەسپۋبليكالىق گازەتى» اق-نىڭ پرەزيدەنتى ساۋىتبەك ابدراحمانوۆ تا قوي جىلىنىڭ قازاق ءۇشىن توي جىلى بولعانى تۋرالى ايتا كەلىپ, ۇلكەن مەرەكەلەردىڭ ورتاسىنان ويىپ تۇرىپ ورىن الاتىن قازاق حاندىعىنىڭ 550 جىلدىعىن اتاپ وتكەلى جاتقان شاقتا مۇنداي كورمەنىڭ ماڭىزى زور ەكەنىن اتاپ ءوتتى. كورمەنىڭ تۇساۋى كەسىلگەن ساتتە شاشۋ شاشىلىپ, كوپشىلىك قاۋىم قوس سۋرەتشىنىڭ سۇڭعاتتى شىعارمالارىمەن ەتەنە تانىسۋعا كىرىستى.
ىرىسبەك دابەي
