اعىمداعى جىلدىڭ 20 قازانىنان باستاپ ەلىمىزدە اۆتوموبيلدەردىڭ ەرەكشە نومىرلەرى ساتىلا باستايدى. ويتكەنى, وتكەن جىلى قازاقستاننىڭ سالىق كودەكسىنە كەيبىر وزگەرىستەر ەنگىزىلىپ, بۇل نورمالار رەسمي تۇردە زاڭداستىرىلدى.
ىنى كەرەك, ايىرىقشا تاڭبالى «كرۋتوي» نومىرلەر بىزدە بۇعان دەيىن دە جوعارى باعالانىپ كەلدى. سوندىقتان, ولار شەندىلەردىڭ سەيفتەرىندە ساقتالىپ, تامىر-تانىستىقپەن نەمەسە جوعارىدان تۇسكەن قوڭىراۋلار بويىنشا بەرىلەتىن ەدى. كەي جاعدايلاردا «بارماق باستى, كوز قىستىمەن» بەلگىلى ءبىر باعاعا ساتىلاتىن دا. الايدا, ودان تۇسكەن قارجى جەكەلەگەن ادامداردىڭ قالتاسىندا كەتەتىن. قازىر مەملەكەت سىبايلاس جەمقورلىققا قارسى بىتىسپەس كۇرەس اشىپ, وسىنداي كولەڭكەلى جايلاردىڭ الدىن الۋ ماقساتىندا ارناۋلى زاڭ قابىلداپ وتىر.
قازاقستان رەسپۋبليكاسى ىشكى ىستەر مينيسترلىگى اكىمشىلىك كوميتەتىنىڭ ءبولىم باستىعى قانات سادۋاقاسوۆتىڭ ايتۋىنشا, مۇنداي تاجىريبە تاجىكستان مەن گرۋزيادا كەڭىنەن قولدانىلىپ جۇرگەن كورىنەدى. ءبىزدىڭ ماماندار مۇنى ومىرگە ەنگىزبەس بۇرىن گرۋزيندەردىڭ وسى تۇرعىداعى ءادىس-تاسىلدەرىن جەتە زەرتتەگەن ەكەن. ماسەلەن, «جىلىنا «2000» نەمەسە «5000» عانا «مارتەبەلى ءنومىر» بەرىلۋى كەرەك» دەپ شەكتەۋ قويۋ سولاردان الىنعان. سونىمەن, قازىرگى سالىق كودەكسىنە سايكەس 100, 111, 200, 222, 300, 333, 400, 444, 500, 555, 600, 666, 700, 800, 888, 900, 999 تاڭبالى نومىرلەر – 253724 تەڭگەگە, ال, 001, 002, 003, 004, 005, 006, 007, 008, 009, 777 ساندى نومىرلەر – 422256 تەڭگەگە ساتىلادى.
– مۇنداعى ماقسات جەڭ ۇشىنان جالعاسۋدى بولدىرماۋ جانە جۇرگىزۋشىلەردىڭ تەڭ قۇقىلىعىن قامتاماسىز ەتۋ. ەندىگى جەردە اقشاسى بار ادام قانداي تاڭبالى ءنومىر الامىن دەسە دە, ءوز ەركى. ءوتىنىش بىلدىرسە بولدى, ساتىپ الا بەرەدى. ءارى ودان تۇسكەن قارجى دا بيۋدجەتكە ءتۇسىپ, ادامداردىڭ ءال-اۋقاتىن جاقسارتۋعا جۇمسالادى, – دەيدى قانات سۋشىۇلى.
جاقسى ساتۇلى
