شۋاقتى ناۋرىز مەرەكەسى قارساڭىندا «استانا وپەرادا» كۇلاش بايسەيىتوۆا اتىنداعى كامەرالىق زال ساحناسىندا اڭىزعا اينالعان قازاق كومپوزيتورى, دومبىراشىلىق مەكتەپتىڭ نەگىزىن قالاۋشى, اۆتورلىق ورىنداۋشىلىق مانەردى قالىپتاستىرۋشى, قازاق حالىق مۋزىكا مادەنيەتىنىڭ دامۋىنا زور ىقپال ەتكەن تۇلعا قۇرمانعازى ساعىربايۇلىنىڭ شىعارماشىلىعىنا ارنالعان «قۇرمانعازى – رۋحتى سازدىڭ ساردارى» كونتسەرتى زور تابىسپەن ءوتتى.
اتاقتى كۇيشى, قازاقستاننىڭ ەڭبەك سىڭىرگەن قايراتكەرى جانعالي ءجۇزباي تىڭدارماندارعا ۇلى كومپوزيتور قۇرمانعازىنىڭ شىعارماشىلىعى جايىندا كەڭىنەن اڭگىمەلەپ, دالا دانىشپانىنىڭ قيىنشىلىققا تولى ءومىرى مەن تەرەڭ ادامگەرشىلىك قۇندىلىقتارى تۋرالى جان-جاقتى ايتىپ بەردى.
كونتسەرت شىمىلدىعىن «كۇي اتاسى» اشتى. جىر شاشۋ اقىن, «التىن دومبىرا» رەسپۋبليكالىق اقىندار ايتىسىنىڭ جۇلدەگەرى ەركەبۇلان قاينازاروۆتىڭ ورىنداۋىندا شىرقالدى. زال قۇرمانعازىنىڭ كوپشىلىك ۇناتاتىن «ايدا بۇلبۇل, ايجان-اي» شىعارماسىنا دا قول سوقتى, ونى قازاقستاننىڭ ەڭبەك سىڭىرگەن قايراتكەرى ايتجان توقتاعان سونداي اسەرلى, ءارى جان تەبىرەنتەرلىكتەي ەتىپ ۇسىندى.
جالپى, باعدارلامادا قۇرمانعازىنىڭ «اقباي», «بايجۇمادان» باستاپ, «قايران شەشەم», «كۇرەڭشە», «اربا سوققان» مەن «تەرىسقاقپايعا» دەيىن ءتۇرلى كۇيلەرى جيناقتالدى. ونىڭ كۇيلەرىنىڭ كوبى قازاق حالقىنىڭ ازاتتىق سۇيگىش رۋحىن كوتەرەتىن اقىندىق ۇرانعا, ۇلتتىق تاريحتىڭ اۋەن تىلىمەن جازىلعان ۇلى ەپوپەياسىنا ءتان بولعانى بەلگىلى. حالىقتى ازات ەتۋ جانە جەكە باس بوستاندىعى – ونىڭ شىعارماشىلىعىنداعى وزەكتى تاقىرىپ.
قۇرمانعازىنىڭ كۇيلەرىمەن قاتار, كوپشىلىككە ابىكەن حاسەنوۆتىڭ «قوڭىر» تۋىندىسى ۇسىنىلدى, ونى قازاقستاننىڭ ەڭبەك سىڭىرگەن قايراتكەرى عالىم احمەدياروۆ شەبەر ورىندادى, ونىڭ اسپاپتىق ينتەرپرەتاتسياسى مۋزىكالىق ەرەكشەلىككە, مانەرلىلىككە يە بولىپ, كورەرمەندەر اۋديتورياسىنىڭ قوشەمەتىن تۋعىزدى.
سونداي-اق كامەرالىق زال ساحناسىندا قازاقستاننىڭ ەڭبەك سىڭىرگەن قايراتكەرلەرى ورىنباي دۇيسەن, تۇرار الىپباەۆ, ابىلعازى احماديەۆ, قر مادەنيەت قايراتكەرى مارات نۇكەەۆ, مادەنيەت سالاسىنىڭ ۇزدىگى ەدىل باسىعاراەۆ, باقىتجان دۇيسەنعازينوۆ, قايرات ايتباەۆ, المات سايجان, باتىرلان ابەنوۆ, جۇمابەك قادىرقۇلوۆ پەن رەسپۋبليكالىق بايقاۋلاردىڭ لاۋرەاتتارى اقجۋسان يمانعازىقىزى, باۋىرجان مۇحامەتباي, باۋىرجان بەكمۇحانبەت, ابىلايحان ورمانبەك جانە تاعى باسقالارى جارقىراي ونەر كورسەتتى.
مۋزىكانتتار دومبىراشىلىق ونەر جانكۇيەرلەرىن جانتورە, يسلامبەك ىسقاقوۆ, نۇرعيسا تىلەنديەۆ, احات بايبوسىنوۆ, ماناربەك ەرجانوۆتىڭ جانە تاعى باسقالارىنىڭ شىعارمالارىمەن تانىستىردى. ورىنداۋشىلاردىڭ اسپاپتىق شەبەرلىكتەرى قازاق دالاسىنىڭ اسقاق رۋحىن جەتكىزدى. شىعارمالاردىڭ كوبى شىنايى ليريكالىق سەزىمدەرگە تولى بولدى, ولاردى زالدا وتىرعان ءاربىر ادام سەزىنە الدى.
