تراۆماتولوگيا جانە ورتوپەديا عىلىمي-زەرتتەۋ ينستيتۋتى – تىرەك-قيمىل اپپاراتى اۋرۋلارىن ەمدەۋدىڭ جاڭا تاسىلدەرىن ازىرلەپ, تراۆماتيزم جانە ورتوپەديالىق اۋرۋلاردىڭ الدىن الۋ, ناۋقاستارعا جوعارى مامانداندىرىلعان مەديتسينالىق جاردەم كورسەتەتىن مەديتسينا ورتالىعى.
اتالمىش ينستيتۋت 10-12 جاستاعى جاسوسپىرىمدەردىڭ ءتۇرلى ومىرتقا اۋرۋلارىن ەمدەيتىن بىرەگەي ورتالىق رەتىندە دە بەلگىلى بولىپ وتىر. بىلىكتى دارىگەرلەرى تۋا-ءبىتتى سكوليوز اۋرۋىن اۋىزدىقتاۋعا مۇمكىندىك اشتى. بۇل -سانكت-پەتەربۋرگ قالاسىنداعى گ.تۋرنەر اتىنداعى بالالار ورتوپەدياسى عىلىمي-زەرتتەۋ ينستيتۋتى ماماندارىمەن ىنتىماقتاستىعى ناتيجەسىندە جۇزەگە استى. الداعى ۋاقىتتا ءبىر جارىم جاستان باستاپ ءۇش جاس ارالىعىنداعى ناۋقاس بالالارعا وتا جاسالىپ, ءتۋابىتتى دەرتىنەن قۇتقاراتىن بولادى. ءتۋابىتتى سكوليوز دەپ جەكەلەگەن ومىرتقا سۇيەكتەرىنىڭ دۇرىس قالىپتاسپاعانىنان بولاتىن ومىرتقا جوتاسىنىڭ قيسىق ءوسۋىن اتايدى. ناۋقاستىڭ پايدا بولۋىنىڭ ناقتى سەبەبى انىقتالماسا دا, مۇنداي اۋرۋمەن تۋعاندار ومىرلىك مۇگەدەك بولىپ, 20 جاستان ارتىق ءومىر سۇرمەيتىنى ءمالىم بولىپ وتىر. وتكەن اپتادا وسى ورتالىققا گ.تۋرنەر اتىنداعى بالالار ورتوپەدياسى عىلىمي-زەرتتەۋ ينستيتۋتىنىڭ پروفەسسورى سەرگەي ۆيسساريونوۆ كەلىپ, استانالىق ارىپتەستەرىمەن بىرگە ءۇش جاسار بالاعا كۇردەلى وتا جاسادى. كەز كەلگەن وتاشىلاردىڭ باتىلى بارا بەرمەيتىن وپەراتسيالاردى ءساتتى جاساپ, بىلىكتىلىگى باعالانعان پروفەسسورمەن كەزدەسىپ, سويلەسكەن ەدىك. «استانالىق ورتوپەد دارىگەرلەرمەن تاجىريبە الماسۋدىڭ ناتيجەسىندە, مەديتسينا سالاسىنداعى جاڭا تەحنولوگيالاردى قولدانا وتىرىپ, وسىنداي كۇردەلى وتا جاساۋدى جولعا قويىپ وتىرمىز. قۇرىلعانىنا ون جىلدان اسقان ينستيتۋت ءۇشىن بۇل ۇلكەن جەتىستىك. سالىستىرا ايتساق, ءبىزدىڭ گ.تۋرنەر اتىنداعى بالالار ورتوپەدياسى عىلىمي-زەرتتەۋ ينستيتۋتى ءبىر عاسىردان استام ۋاقىت بويىنا جۇمىس ىستەپ كەلەدى. الداعى ۋاقىتتا جىلدار بويىنا جيناقتاعان مول تاجىريبەمەن ءبولىسىپ, وسى سالانىڭ ماماندارىن دايارلاۋدى ماقسات ەتىپ قويدىق»-دەدى التىن قولدى وتاشى.
ايگۇل ۋايسوۆا
