لاريسا كراسنيكوۆا, استانا قالاسى ءىىد اكىمشىلىك پوليتسيا باسقارماسىنىڭ ەرەكشە تاپسىرمالار جونىندەگى اعا ينسپەكتورى
– ەلوردادا «ءجاسوسپىرىم» جەدەل پروفيلاكتيكالىق ءىس-شاراسى قولعا الىنىپتى. مۇنىڭ ماڭىزدىلىعى قانداي?
– ءيا, «ءجاسوسپىرىم» جەدەل-پروفيلاكتيكالىق ءىس-شاراسى كەشەگى كۇننەن باستالدى. بۇل شارا 24 جەلتوقسانعا دەيىن جالعاساتىن بولادى. نەگىزگى ماقسات – جاسوسپىرىمدەر اراسىنداعى قىلمىستىڭ الدىن الۋ جانە جولىن كەسۋ, بالالار مەن جاسوسپىرىمدەردىڭ زاڭدى وكىلدەرىنسىز تۇنگى ۋاقىتتا تۇرعىن ۇيدەن تىسقارى ورىنداردا بولۋ فاكتىلەرىن انىقتاۋ, ولاردىڭ قۇقىقتىق ساۋاتتىلىعىن ارتتىرۋ, سونداي-اق جاوسپىرىمدەردى قوعامعا جات ارەكەتكە تارتاتىن ەرەسەك ادامداردى انىقتاۋ.
– بىزدە تۇنگى ۋاقىتتا كوشەدە جۇرەتىن بالالار مەن جاسوسپىرىمدەر قانشالىقتى ءجيى ۇشىراسادى? بۇگىنگە دەيىن قانداي شارا قولدانىلدى؟
– ارينە, قالا بالاسىنىڭ قىدىرىمپاز, كەزبەلەۋ بولاتىنى راس. مىسالى, وسى جىلدىڭ وزىندە قاڭتار ايىنان بەرى كامەلەت جاسقا تولماعاندار زاڭدى وكىلدەرىنسىز بەيمەزگىل ۋاقىتتا ۇيدە وتىرماي, ويىن-ساۋىق ورىندارىندا جۇرگەنى ءۇشىن 2 مىڭنان استام اتا-انا اكىمشىلىك جاۋاپكەرشىلىككە تارتىلدى.
– ال بۇگىنگى «ءجاسوسپىرىم» جەدەل شاراسى بويىنشا قانداي جۇمىس جۇرگىزىلەدى؟
– ءىس-شارا اياسىندا يۋۆەنالدىق پوليتسيا قىزمەتكەرلەرى پروكۋراتۋرا, ءبىلىم باسقارماسى, استانا قالاسى بويىنشا بالالاردىڭ قۇقىقتارىن قورعاۋ دەپارتامەنتى, استانا قالاسى بويىنشا جاستار ساياساتىن قولداۋ مەملەكەتتىك قورى جانە باسقا دا ۇكىمەتتىك ەمەس ۇيىمدارمەن بىرلەسىپ جاستار كوپ جينالاتىن جەرلەردە, مىسالى, باقتار, ويىن-ساۋىق ورتالىقتارىندا, ۇيلەردىڭ اۋلالارى مەن كومپيۋتەرلىك كلۋبتاردا رەيد جۇرگىزەدى.
– ناقتى ايتا كەتەسىز بە, اكىمشىلىك قۇقىق بۇزۋشىلىق زاڭى بويىنشا جاسوسپىرىمدەر ءۇشىن قاي مەزگىل بەيۋاقىت بولىپ سانالادى؟
– ءيا, باسشىلىققا الىنعان قولدانىستاعى اكىمشىلىك قۇقىق بۇزۋشىلىق كودەكسى بويىنشا تۇنگى 23.00 مەن تاڭعى 06.00 ارالىعىندا كامەلەتكە تولماعاندارعا بەيساۋات جۇرۋگە تىيىم سالىنادى. رەيد وسى ۋاقىت ارالىعىن نىساناعا الادى.
ايتا كەتەتىن جايت, رەيدتەن بولەك بۇل كۇندەرى پوليتسيا قىزمەتكەرلەرى مۇددەلى مەملەكەتتىك ورگاندار وكىلدەرىمەن بىرلەسىپ بارلىق قالالىق مەكتەپتەردە وقۋشىلار ءۇشىن قۇقىق تاقىرىبى بويىنشا دارىستەر مەن دوڭگەلەك ۇستەلدەر وتكىزەدى.
دايىنداعان:
ءنازيرا سايلاۋقىزى
