قالالىق ءماسليحاتتىڭ ءماجىلىس زالىندا وتكەن دەپۋتات كۇنىندە استاناداعى مادەنيەت باسقارماسىنىڭ تاريح جانە مادەنيەت ەسكەرتكىشتەرىن ساقتاۋ مەن ناسيحاتتاۋ بارىسىنداعى جۇمىسى تالقىلاندى.
وسىعان وراي استانا قالاسى مادەنيەت باسقارماسىنىڭ باسشىسى بولات ماجاعۇلوۆ بايانداما جاسادى. ونىڭ ايتۋىنشا, ەلوردا اۋماعىندا بۇگىنگى تاڭدا 46 تاريح جانە مادەنيەت ەسكەرتكىشى بار. ولاردىڭ ەكەۋى – رەسپۋبليكالىق, ال قالعاندارى جەرگىلىكتى ماڭىزعا يە. ونىڭ ىشىندە 34-ءى – قالا قۇرىلىسى جانە ساۋلەت, 12-ءسى ارحەولوگيا ەسكەرتكىشى بولىپ سانالادى.
رەسپۋبليكالىق ماڭىزى بار تاريح جانە مادەنيەت ەسكەرتكىشتەردىڭ ءبىرى – بۇرىن مۇسىلمان مەكتەبى بولعان, قازىرگى تاڭدا وتىرار كوشەسىندەگى 1/2, 1/3-ۇيىندە ورنالاسقان ق.قۋانىشباەۆ اتىنداعى قازاق مۋزىكالىق-دراما تەاترىنىڭ قويىلىمدىق تسەحىنىڭ عيماراتى. وندا بيىل «جۇمىسپەن قامتۋ – 2020 جول كارتاسى» باعدارلاماسى بويىنشا – 50 106 587 تەڭگە, 2015 جىلعا 123 108 407 تەڭگە قارجى ءبولىنىپ, كەستەگە سايكەس عىلىمي-جوندەۋ جۇمىستارى جۇرگىزىلۋدە.
2014 جىلعا بولىنگەن قارجى ۇستىمىزدەگى جىلدىڭ قاراشا ايىنا دەيىن تولىق يگەرىلگەنىن ايتا كەلە, باسقارما باسشىسى ودان ءارى جەرگىلىكتى تاريحي ماڭىزى بار ەسكەرتكىشتەردىڭ جاعدايىنا توقتالدى. بۇل رەتتە ب.ماجاعۇلوۆ م.گوركي اتىنداعى ورىس دراما تەاترىنىڭ اكىمشىلىك عيماراتى مەن ك.بايسەيىتوۆا اتىنداعى وپەرا جانە بالەت تەاترىنىڭ عيماراتىن جوندەۋگە جوبالىق-سمەتالىق قۇجاتتار ازىرلەنگەنىن جەتكىزدى.
ال, استاناداعى «جاستار» سارايى 1974 جىلى سالىنعان. 1100 ورىندىق كورەرمەن زالى, مىنبەرلەرىمەن 400 ورىندىق سپورت زالى, ءجۇزۋ باسسەينى, ۆەستيبيۋل, كۇتۋ زالى جانە باسقا دا بولمەلەرى بار ءتورت قاباتتى عيماراتتىڭ ينجەنەرلىك كوممۋنيكاتسيالارى بۇگىندە ابدەن توزعان. سىرتقى جاعىنىڭ وڭتۇستىك قاپتالىنداعى اسفالتبەتوندى جابىنى, سونداي-اق, سولتۇستىك, شىعىس قاپتالىنداعى قاسبەتتەرى, باتىس جانە وڭتۇستىك قاسبەتتەرىنىڭ گرانيتتى قاپتامالار اۋىستىرۋدى قاجەت ەتىپ تۇر. ىشىندەگى قولاڭسا ءيىس تە كەتەر ەمەس. قىسقاسى, بۇل جەردە استانا مارتەبەسىنە ساي مادەني شارا وتكىزۋ مۇمكىن بولماي وتىرعانىن ەسكەرە كەلە,
بولات باۋىرجانۇلى اتالمىش عيماراتتى ءسۇرۋ جونىندە ۇسىنىس ءبىلدىردى.
دەپۋتاتتار باس قالادا كونتسەرت زالدارىنىڭ جەتىپ ارتىلاتىنىن, باسقا دا تەاترلاردىڭ بارشىلىق ەكەنىن ايتىپ, ماسەلەنى ءالى دە بولسا زەرتتەپ, عيماراتقا كۇردەلى جوندەۋ جانە قايتا قالپىنا كەلتىرۋ جۇمىستارىن جۇرگىزۋ ارقىلى تاريح جانە مادەنيەت ەسكەرتكىشىن ساقتاپ قالۋعا بولاتىندىعىن جەتكىزدى. سوندىقتان, حالىق قالاۋلىلارى بۇل ماسەلەنى ءالى دە بولسا تولىق زەرتتەۋ كەرەك دەگەن ورتاق بايلامعا كەلدى.
