مادەنيەت

مادەني مۇرا جاڭعىردى

قازاقستان رەسپۋبليكاسىنىڭ تۇڭعىش پرەزيدەنتى-ەلباسى كىتاپحاناسىنىڭ مۋزەيىندە قازاقستان مەن يندونەزيانىڭ بالالار مەن جاسوسپىرىمدەر اراسىنداعى «مەنىڭ ەلىمنىڭ مادەني مۇراسى» اتتى حالىقارالىق بايقاۋىنىڭ قورىتىندىسى بويىنشا كورمەنىڭ اشىلۋى ءوتتى.
بايقاۋدى ەلباسى كىتاپحاناسى, قازاقستان رەسپۋبليكاسىنىڭ يندونەزيا رەسپۋبليكاسىنداعى ەلشىلىگى, يندونەزيا رەسپۋبليكاسىنىڭ قازاقستان رەسپۋبليكاسىنداعى ەلشىلىگى, يندونەزيا رەسپۋبليكاسىنىڭ ۇلتتىق كىتاپحاناسى جانە نۇر-سۇلتان قالاسىنداعى بالالار كوركەمسۋرەت مەكتەبى – يۋنەسكو كلۋبى ۇيىمداستىردى.

[smartslider3 slider=318]

قاتىسۋشىلاردى ەلباسى كىتاپحاناسىنىڭ ديرەكتورى باقىتجان تەمىربولات قۇتتىقتادى. «بۇل ءىس-شارا قازاقستان رەسپۋبليكاسى تاۋەلسىزدىگىنىڭ 30 جىلدىعىنا جانە يندونەزيا رەسپۋبليكاسى تاۋەلسىزدىگىنىڭ 76 جىلدىعىنا ارنالعان. ەكى ەلدىڭ بالالار مەن جاسوسپىرىمدەر جۇمىستارىنىڭ كورمەسى قازاقستان مەن يندونەزيا اراسىنداعى مادەني ىنتىماقتاستىق پەن قۇندىلىقتى, ادامزات قوعامداستىعىنىڭ بولىگى سانالاتىن دوستىق قارىم-قاتىناستى كورسەتەدى. بايقاۋعا قاتىسقان قوس ەلدىڭ تالانتتى جاس بۋىنىن قۇتتىقتاي وتىرىپ, جاڭا شىعارماشىلىق تابىستار تىلەيمىن!» دەدى باقىتجان تەمىربولات.
جوبانىڭ نەگىزگى ماقساتى – بالالاردى قازاقستان مەن يندونەزيانىڭ مادەنيەتى مەن شىعارماشىلىعىمەن تانىستىرۋ, سونداي-اق ولاردىڭ جەكە ءارى شىعارماشىلىق الەۋەتىن اشۋعا جاعداي جاساۋ. بايقاۋ قورىتىندىسى بويىنشا 60 ۇزدىك جۇمىس ىرىكتەلىپ, كورمەگە قويىلدى.
ءوز كەزەگىندە يندونەزيا رەسپۋبليكاسىنىڭ قازاقستان رەسپۋبليكاسىنداعى ەكس-ەلشىسى راحمات پرامونو بالالار ءوز شىعارماشىلىعى ارقىلى وتانعا, بەيبىتشىلىك پەن دوستىققا دەگەن سۇيىسپەنشىلىكتى دارىپتەيتىن الەمنىڭ ەلشىلەرى ەكەنىن اتاپ ءوتتى. «ونەرگە دەگەن سۇيىسپەنشىلىكتى دامىتاتىن شىعارماشىلىق باعدارلامالار  بالالارعا باسقا ۇلتتاردى تانىپ-ءبىلۋدى, قۇرمەتتەۋدى ۇيرەتەدى. سونداي-اق الەمدەگى مادەنيەتتەر مەن داستۇرلەردى باعالايتىن بولادى. ەكىنشى جاعىنان, ەكى ەلدىڭ بالالارى مەن جاستارىنىڭ ادەمى سۋرەتتەرى – ولاردىڭ تۋعان جەرگە دەگەن ماقتانىشى مەن ماحابباتىنىڭ ادال كورىنىسى. دوستىقتى تۋ ەتكەن ءار ەلدىڭ جاس ەلشىلەرى سانالاتىن بارشا جەڭىمپازداردى قۇتتىقتايمىن. يندونەزيا مەن قازاقستان اراسىنداعى دوستىقتى نىعايتۋعا ءوز ۇلەستەرىن قوسقان بارلىق قاتىسۋشىلارعا ريزاشىلىعىمدى بىلدىرەمىن» دەدى ەلشى مىرزا.
يندونەزيالىق قاتىسۋشىلار مەن جەڭىمپازدار, سونداي-اق يندونەزيانىڭ دجاكارتاداعى ۇلتتىق كىتاپحاناسى ءىس-شاراعا Zoom بەينەبايلانىس ارقىلى ونلاين قاتىستى. قازاقستان مەن يندونەزيانىڭ بالالار مەن جاسوسپىرىمدەر اراسىنداعى «مەنىڭ ەلىمنىڭ مادەني مۇراسى» اتتى حالىقارالىق كونكۋرس ماۋسىم ايىنىڭ باسىندا جاريالانعان ەدى. ەكى ەلدىڭ 400-گە جۋىق بالالارى مەن جاسوسپىرىمدەرى جوباعا قاتىستى. كورمە اياقتالعاننان كەيىن بالالاردىڭ بارلىق جۇمىستارى 2021 جىلدىڭ جەلتوقسان ايىندا يندونەزيانىڭ دجاكارتا قالاسىنداعى ۇلتتىق كىتاپحاناسىندا كوپشىلىك نازارىنا ۇسىنىلاتىن بولادى.
 
 

تاعىدا

ۇقساس جاڭالىقتار

پىكىر ۇستەۋ

Back to top button