جاڭادان تاعايىندالعان مادەنيەت جانە سپورت ءمينيسترى داۋرەن اباەۆ ەلورداداعى اتالمىش ۆەدومستۆوعا قاراستى مادەني وشاقتارىمەن تانىسىپ جاتىر. مينيستر ۇلتتىق مۋزەيگە, «بوزوق» مەملەكەتتىك تاريحي-مادەني مۋزەي-قورىعىنا, ۇلتتىق اكادەميالىق كىتاپحاناعا جانە «استانا وپەرا» مەملەكەتتىك وپەرا جانە بالەت تەاترىنا باردى.
ۇجىمدارمەن كەزدەسۋ بارىسىندا داۋرەن اباەۆ مادەنيەت مەكەمەلەرى قىزمەتىنىڭ نەگىزگى باعىتتارى, تۇيتكىلدى ماسەلەلەرى مەن الداعى جۇمىس جوسپارى تۋرالى سۇرادى.
سونداي-اق مينيستر مادەنيەت جانە ونەر سالاسىنداعى قىزمەتكەرلەرگە جۇكتەلگەن ەلدىڭ رۋحاني مۇراسىن ساقتاۋ جانە كوبەيتۋ, قوعامنىڭ تاريحقا قۇرمەتپەن قاراۋى, وسكەلەڭ ۇرپاقتى پاتريوتتىق رۋحتا تاربيەلەۋ ىسىندەگى ەرەكشە ءرولىن اتاپ ءوتتى.
جيىن بارىسىندا داۋرەن اباەۆ وزەكتى ماسەلەلەردى تالقىلاۋ جانە ولاردى ءتيىمدى تۇردە شەشۋگە ارنالعان ۇسىنىستاردى تەز ارادا جيناپ, لايىقتى دارەجەدە ناتيجەگە جەتۋگە نيەتتى ەكەنىن ناقتىلادى.
بايان اسىلبەكوۆا
