Sport

مادريد ەكىگە بولىنەتىن ءتۇن

final-Ligi-CHempionov

بيىل چەمپيوندار ليگاسىنىڭ تاريحىنا­ تاعى ءبىر ەرەكشە جاعداي تىركەلدى. ىشكى بىرىنشىلىكتە ءبىر قالانىڭ اتىنان ونەر كورسەتەتىن قوس كوماندا تۇڭعىش رەت ەۋروكۋبوكتىڭ اقتىق سىنىنا شىعىپ, ءبىرىنشى ورىن ءۇشىن تالاسادى.­
ءبىر قىزىعى, ول ەكى كلۋب تا بيىل يسپانياداعى ەڭ ءىرى ەكى ءتۋرنيردى ءبىر-بىردەن جەڭىپ العان بولاتىن.

سوڭعى تۋردا «نوۋ كامپ» ستاديونىنا كەلىپ, چەمپيوناتتىڭ تاعدىرىن شەشكەن مادريدتىك «اتلەتيكو» بيىلعى ماۋسىمدا ايگىلى «بارسەلونا» مەن «رەال ءمادريدتى» شاڭ قاپتىرىپ كەتكەن ەدى. وسىلايشا جىل بويىنا كەزەكپە-كەزەك وزىپ كەلگەن ءۇش مىقتىنىڭ ماسەلەسى سوڭعى ساتتە عانا شەشىلگەن بولاتىن. كاتالونيالىقتار – ەكىنشى ورىندا, ال انچەلوتتي شاكىرتتەرى قولاعا قاناعات ەتۋگە ءماجبۇر بولدى. بۇل – «اتلەتيكو» جانكۇيەرلەرى ءۇشىن كوپتەن كۇتكەن توي. ەندى ولاردى تاعى ءبىر بەلەس توسىپ تۇر. ديەگو سيمەونەنىڭ كومانداسى ۋەفا چەمپيوندار ليگاسىنىڭ فينالىندا ءوز جەرلەستەرىمەن كەزدەسەدى. الايدا, اردا تۋران, ديەگو كوستا سەكىلدى شەشۋشى ويىنشىلارىنىڭ جاراقاتى جازىلماسا, اقتىق سىندا ولارعا شىنىمەن قيىن سوعاتىن ءتۇرى بار.

ال ەكىنشى مادريدتىك كوماندا «رەال مادريد» ءۇشىن دە بۇل ماۋسىم ءساتتى بولدى دەۋگە نەگىز بار. ويتكەنى, ولار ىشكى بىرىنشىلىكتە ءۇشىنشى ورىندا قالسا دا, يسپانيا كورولىنىڭ كۋبوگىن جەڭىپ الدى. جارتىلاي فينالدا «اتلەتيكونىڭ» تاس-تالقانىن شىعارعان ولار اقتىق كەزەڭدە «بارسەلونادان» باسىم ءتۇسىپ, وزدەرىنىڭ تۋرا جولدا ەكەندەرىن دالەلدەگەن. ونىڭ ۇستىنە, الەمنىڭ ۇزدىك فۋتبولشىسى كريشتيانۋ رونالدۋ لۋيس سۋارەزپەن بىرگە جاقىندا عانا ەۋروپانىڭ ۇزدىك سۇرمەرگەنى اتاندى. پورتۋگاليالىق فۋتبولشىنىڭ چەمپيوندار ليگاسى تاريحىنداعى تاعى ءبىر رەكوردتى بۇزعانىن ءبارىمىز بىلەمىز. ول فينالعا دەيىن 16 گول سوعىپ, ءوزىنىڭ الدىندا بولعان مىقتىلاردى ءاپ-ساتتە باسىپ وزدى. ءتىپتى فينالدىڭ ليسسابوندا وتەتىنىن ەسكەرسەك, كريشتيانۋدىڭ «ءوز ءۇيىم – ولەڭ-توسەگىمە» سالاتىنىن سەزە بەرۋگە بولاتىن سياقتى. تەك «رەال ءمادريدتىڭ» ءبىر وسال تۇسى «پاستىڭ پروفەسسورى» اتانعان حابي الونسونىڭ فينالدان سىرت قالعانى بولماق. ول سارى قاعازدارىنىڭ كوپتىگى كەسىرىنەن ليسسابوندا ويناۋ قۇقىعىنان ايىرىلعان بولاتىن.

سونىمەن گوللانديالىق قازى بورن كۋيپەرستىڭ تورەلىگىمەن وتەتىن چەمپيوندار ليگاسىنىڭ اقتىق ماتچى 24 مامىر كۇنى استانا ۋاقىتىمەن 00:45-تە باستالماق. ول ءتۇنى مادريد ەكىگە بولىنەدى…

تاعىدا

ۇقساس جاڭالىقتار

پىكىر ۇستەۋ

Back to top button