«استانا وپەرادا» گ.دونيتسەتتيدىڭ «ماحاببات سۋسىنى» جارقىن كومەديالىق وپەراسىندا تەاتردىڭ تاماشا سوليستەرىنىڭ ايتۋلى دەبيۋتتەرىنە ەلوردالىقتار كۋا بولدى. ادينا مەن نەمورينونىڭ باستى پارتيالارىندا ساحناعا العاش رەت تانىمال وپەرا پريماسى جاننات باقتاي مەن كەرەمەت تەنور ارتۋر گابديەۆ ءوز ونەرلەرىن كورسەتتى. سپەكتاكلدەر قويىلىمنىڭ مۋزىكالىق جەتەكشىسى, تەاتردىڭ باس ديريجەرى, الەمگە ايگىلى ماەسترو الان بورىباەۆتىڭ باسقارۋىمەن ءوتتى.
جەتەكشى سوليست جاننات باقتاي تەاتر ساحناسىندا بىرقاتار ۇمىتىلماس بەينەلەر جاسادى. 15 ناۋرىزدا ايگىلى ءانشى-سوپرانو كوپشىلىكتىڭ الدىنا ادينا سۇلۋدىڭ بەينەسىندە شىقتى.
– «ماحاببات سۋسىنى» وپەراسىمەن كەزدەسكەن ءاربىر جاندى سپەكتاكل ءوزىنىڭ ەنەرگەتيكاسىمەن, ومىرگە دەگەن قۇشتارلىعىمەن, جاستىق جالىنىمەن جىگەرلەندىرەدى, سوندىقتان مەن ونى ەنەرگەتيكاسى مىقتى شىعارما دەپ اتار ەدىم. ساحناداعى جانە وركەسترمەن بىرگە جىلدام ەكپىنمەن ورىندايتىن ارتىستەر ورىنداعان مۋزىكادان كورەرمەندەر تاڭعاجايىپ اسەر, درايۆ الدى, – دەدى جاننات باقتاي.
– سپەكتاكلدىڭ قويۋشى رەجيسسەرى ارنو بەرنار – فرانتسۋز مەكتەبىنىڭ وكىلى. بۇل مەكتەپ باسقالارىنان قاتتى ەرەكشەلەنەدى, ول ۇنەمى قوزعالىستاعى, شىعارماشىل, قىزىقتى سانالادى. بۇگىنگى تاڭدا ماەسترو بەرنار – دۇنيە جۇزىندەگى ەڭ الدىڭعى قاتارلى وپەرا رەجيسسەرى, – دەيدى ءارتىس.
تانىمال ءانشى گاەتانو دونيتسەتتيدىڭ كوزى تىرىسىندە كوپتەگەن وپەرالار جازعانىن, ءوز زامانىنىڭ وتە تابىستى كومپوزيتور بولعانىن ايتتى, ال «ماحاببات سۋسىنىن» ول نەبارى ەكى اپتادا جازىپ شىققان.
– دونيتسەتتي وپەرا كومپوزيتورلارى مەن ورىنداۋشىلارى ءۇشىن ۇلگى بولىپ قالا بەرەدى. كوپتەگەن اۆتورلار ونىڭ سپەكتاكلدەرىن تاماشالاۋعا كەلىپ, تاجىريبە العان, وسى تۋىندىلار ارقىلى شەبەرلىكتەرىن شىڭداعان. دونيتسەتتيدىڭ وپەرالارى بيىك تالعاممەن, جانردىڭ ۇزدىك ەرەجەلەرىمەن جازىلعان, ولاردا بارلىعى وتە ۇعىنىقتى, كوڭىلگە قونىمدى, دۇرىس, ولاردى كلاسسيكا ستاندارتى دەۋگە بولادى. مەن ادينانىڭ پارتياسىن وپەراداعى بەتكەۇستار پارتيا رەتىندە قابىلدايمىن. وسى بەينەدە ساحناعا شىعۋ – مەن ءۇشىن ۇلكەن جەڭىس. البەتتە, دونيتسەتتي سەكىلدى كەمەڭگەر كومپوزيتوردىڭ مۋزىكاسىن ارنو بەرنار سەكىلدى بىرەگەي رەجيسسەردىڭ قويىلىمىندا ايگىلى ماەسترو الان بورىباەۆتىڭ جەتەكشىلىگىمەن ۇزدىك الەمدىك تەاترلاردىڭ بىرىندە ورىنداعانىمدى ماقتانىش ەتەمىن, ءوزىمدى ونەر يەسى رەتىندە شەكسىز باقىتتىمىن دەپ ەسەپتەيمىن. اتاقتى سۋرەتشىلەر ەتسيو فريدجەريو مەن فرانكا سكۋارچاپينونىڭ دەكوراتسيالارى مەن كوستيۋمدەرى دە كەرەمەت, – دەدى جاننات باقتاي.
– مەنىڭ كەيىپكەرىم – وتە مەيىرىمدى, قاراپايىم, اشىق, كوڭىلدى, بىراق سونىمەن بىرگە ول ءوز ماحابباتى ءۇشىن سوڭىنا دەيىن كۇرەسۋگە دايار, باتىل جاس جىگىت. باستاپقىدا ونىڭ كوڭىلى قالسا دا, كەيىن ول قايتكەنمەن ءوز دەگەنىنە جەتەدى. رومانتيكالىق ماحاببات جايلى ارمانداي وتىرا, ول ادەمى, اسقاق سەزىمگە قۇشتار. كەيىپكەردىڭ بەينەسى ليريكالىق قىرلارمەن ءبولىنىپ بەرىلگەن, بۇلار ونى ورىنداۋشىلار ءۇشىن دە, كورەرمەندەر ءۇشىن دە ەرەكشە تارتىمدى ەتەدى, – دەپ پىكىرىمەن ءبولىستى ارتۋر گابديەۆ.
– مەنىڭ ويىمشا, نەمورينو – بۇل ارمانداۋعا تۇرارلىق پارتيا, ول كەز كەلگەن تەنوردىڭ ەڭ سۇيىكتى پارتيالارىنىڭ ءبىرى جانە اربىرەۋى وندا وزىنە جاقىن دۇنيەنى تابادى. سونىمەن قاتار بۇل – وتە كۇردەلى پارتيا, وندا ءتۇرلى انسامبلدەردى كورۋگە بولادى. وپەرانىڭ باسىنان اياعىنا دەيىن ساحنادان تۇسپەي, «دەمالماستان» ءان ايتۋ كەرەك. گاەتانو دونيتسەتتيدىڭ جاۋھارىن ورىنداۋ, ەڭ الدىمەن, ۆوكاليستەر ءۇشىن ماڭىزدى, ءارى پايدالى ەكەنىن اتاپ ءوتۋ قاجەت. سەبەبى دونيتسەتتي مەن بەللينيدىڭ تۋىندىلارىندا عانا ءسوليستىڭ شەبەرلىگى انىقتالادى, ويتكەنى ولار – «بەلكانتونىڭ» داۋلەسكەر تەحنيكاسىن مەكتەبىنەن وتكەندەر.
