بۇگىن استانادا قازاقستان رەسپۋبليكاسى تۇڭعىش پرەزيدەنتى – ەلباسىنىڭ قورى مەن مەملەكەت تاريحى ينستيتۋتى بىرلەسىپ «قازاقستان رەسپۋبليكاسى تاۋەلسىزدىگىنىڭ 25 جىلدىعى: تابىستى مەملەكەت, تابىستى ەل» اتتى حالىقارالىق عىلىمي-تاجىريبەلىك كونفەرەنتسيا وتكىزدى.
كونفەرەنتسيانىڭ اشىلۋىندا قاتىسۋشىلارعا قر تۇڭعىش پرەزيدەنتى – ەلباسى كىتاپحاناسىنىڭ اتقارۋشى ديرەكتورى بەيسەمباي جۇمابەكوۆ جىلى لەبىزىن ءبىلدىردى. جيىن بارىسىندا كوپتەگەن شەت مەملەكەتتەردەن كەلگەن عالىمدار جانە وتاندىق تاريحشىلار تاۋەلسىز ەلىمىزدىڭ 25 جىلدا قول جەتكىزگەن جەتىستىكتەرى مەن «ماڭگىلىك ەل» ۇلتتىق يدەياسىن قالىپتاستىرۋداعى تاريح عىلىمىنىڭ ءرولىن زەرتتەۋ سەكىلدى تاقىرىپتاردى تالقىلادى.
بىلىكتى عالىم ۆلادىسلاۆ سوكولوۆسكي «پولياك عىلىمي زەرتتەۋلەرىندەگى قازاقستان مەملەكەتتىلىگىنىڭ ماسەلەلەرى ء(حىىى-ءححى عع.)» تاقىرىبىندا بايانداما جاسادى. تاريحشىنى ءحىح عاسىردا قازاقتىڭ ونەرى مەن تۇرمىسىن زەرتتەگەن ايگىلى پولياك زەرتتەۋشىسى ا.يانۋشكەۆيچتىڭ لايىقتى ءىزباسارى ەكەنىنە ريزا بولدىق. انكاراداعى گازي ۋنيۆەرسيتەتىندە قىزمەت ىستەيتىن وتانداسىمىز, تاريح عىلىمدارىنىڭ دوكتورى گۇلجانات قۇرمانعاليەۆا دا تۇركياداعى قازاقستان تاريحىنا قاتىستى ەڭبەكتەرگە توقتالدى. ونىڭ ايتۋىنشا, تۇركيادا ءبىزدىڭ ەلدىڭ تاريحىنا بايلانىستى الەۋمەتتىك عىلىمدار بويىنشا 400-دەن استام ديسسەرتاتسيا قورعالعان.
كونفەرەنتسيا اياسىندا قازاقستانداعى پولشانىڭ بۇرىنعى ەلشىسى بولعان ۆلادىسلاۆ سوكولوۆسكيدىڭ عىلىمي رەداكتسياسى دايىنداعان «حاندىقتان رەسپۋبليكاعا دەيىن: قازاقستان مەملەكەتتىلىگىنىڭ تاريحي جانە زاماناۋي شارتتارى» اتتى كىتابىنىڭ تانىستىرىلىمى ءوتتى.
–بۇل كىتاپتا مەملەكەتىمىزدىڭ تابىستى ەل ەكەنى باياندالعان. جيناقتا جەرلەس عالىمداردىڭ دا عىلىمي ماقالالارى ەنگەن. پولشادا وسىنداي تاريحي كىتاپتىڭ جازىلۋى ءبىزدى قۋانتادى, – دەيدى مەملەكەت تاريحى ينستيتۋتىنىڭ ديرەكتورى بۇركىتباي اياعان.
قورىتا كەلگەندە, عىلىمي كونفەرەنتسيادا تانىمال عالىمدار ەلىمىزدىڭ تاريحى مەن تابىستارىن تاعى ءبىر زەردەلەپ, وي سارابىنان وتكىزىپ, ماڭىزدى ماسەلەلەردىڭ مانىنە ءۇڭىلدى.
ازامات ەسەنجول
