ماقساتىمىز – ەل يگىلىگىنە قىزمەت ەتۋ
تاۋەلسىزدىكپەن تۇستاسىپ دۇنيە ەسىگىن اشقان, بيلىك بۋىنىمەن بىرىگىپ, حالىق قامى ءۇشىن قىزمەت اتقارىپ كەلە جاتقان ماسليحاتتارعا بيىل 20 جىل تولىپ وتىر.
1994 جىلدىڭ ناۋرىز ايىندا ەلىمىزدىڭ جاڭا وكىلەتتى ورگانى بولىپ تابىلاتىن ماسليحاتتارعا دەپۋتاتتار سايلاۋى وتكىزىلدى. مىنە, سودان بەرى ءبىزدىڭ استانا قالالىق ءماسليحاتى دا قازاقستان رەسپۋبليكاسىنىڭ كونستيتۋتسياسىنا جانە قازاقستان رەسپۋبليكاسىنىڭ زاڭنامالارىنا, سونداي-اق «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى» زاڭعا سايكەس ءوز جۇمىسىن جۇرگىزىپ كەلەدى.
قازىرگى ۋاقىتتا قالالىق ءماسليحاتتا 25 سايلاۋ وكرۋگى بويىنشا سايلانعان وسىنشا دەپۋتات بار. ولار ءوز سايلاۋشىلارىمەن ۇنەمى كەزدەسۋ وتكىزىپ, كوممۋنالدىق قىزمەت كورسەتۋلەر, جولداردىڭ جاعدايى, تۇرعىن ءۇي ماسەلەلەرى, ەڭبەكككە ورنالاستىرۋ, مەكتەپكە دەيىنگى تاربيە, مەديتسينالىق كومەك كورسەتۋ, دارىگەرلىك قۇرال-جابدىقتارمەن قامتاماسىز ەتۋ سەكىلدى ومىرلىك ماڭىزدى ماسەلەلەردىڭ جۇزەگە اسىرىلۋىنا ۇلەس قوسىپ, قالا اكىمدىگىمەن بىرلەسە وتىرىپ قىزمەت ەتۋدە.
استانا قالالىق ءماسليحاتىنىڭ ەڭ بايىرعى دەپۋتاتى – نيكولاي يليچ مەششەرياكوۆ. ول ءبىرىنشى شاقىرىلىمنان بەرى بەسىنشى رەت دەپۋتات مانداتىن يەلەنىپ, بۇگىنگى كۇنگە دەيىن سايلاۋشىلار سەنىمىنە يە بولىپ كەلەدى. ال, مەن سوڭعى ءۇش شاقىرىلىمدا جەرگىلىكتى ماسليحاتقا دەپۋتات بولىپ سايلاندىم. سودان كەيىن دەپۋتاتتىق ءتاجىريبەسى كوپ باۋىرجان يساباەۆ, ول وكىلەتتىلىگى توقتاتىلعان دەپۋتاتتىڭ ورنىنا سايلانعان بولاتىن.
ءالى ەسىمدە, 2003 جىلى ءۇشىنشى شاقىرىلىمنىڭ ءبىرىنشى سەسسياسى وتكىزىلدى. ول كەزدە مەن قالاداعى جاستار شاعىن اۋدانىنىڭ تۇرعىندارىن قامتيتىن №18 وكرۋگ بويىنشا دەپۋتات بولىپ سايلانعان بولاتىنمىن, ال ءتورتىنشى جانە بەسىنشى شاقىرىلىمدا №3 وكرۋگ بويىنشا سايلانىپ, سارىارقا اۋدانىنداعى تىلەنديەۆ, جەلتوقسان, اۋەزوۆ, جەڭىس كوشەلەرىنىڭ تۇرعىندارىنا قىزمەت ەتتىم. ارينە, ۋاقىت العا جىلجىعان سايىن ادامداردىڭ ءماسليحاتقا, جەرگىلىكتى بيلىك وكىلدەرىنە دەگەن سەنىمى ارتىپ كەلەدى.
بۇگىنگى تاڭدا دەپۋتاتتىق كورپۋستا ءبىلىم, دەنساۋلىق ساقتاۋ مەكەمەلەرىنىڭ وكىلدەرى, بەلگىلى كاسىپكەرلەر مەن ءىرى كاسىپورىنداردىڭ باسشىلارى, سونىمەن بىرگە اتاقتى عالىمدار دا, قىسقاسى, قاراپايىم حالىقتىڭ مۇڭ-مۇقتاجىن جاقسى بىلەتىن ازاماتتار بار. مىندەتىمىز – وسى سالالارداعى بارلىق كۇرمەۋلى ماسەلەلەردى شەشۋ. سونداي-اق, ءبىز ءتيىستى باعدارلامالاردى بەكىتىپ, جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى زاڭ نەگىزىندە جۇمىس ىستەيمىز. بيىل قىركۇيەك ايىندا الماتى قالاسىندا قر ءماسليحاتىنىڭ 20 جىلدىعىنا وراي ۇيىمداستىرىلعان اۋقىمدى شاراعا استانالىق ءبىر توپ دەپۋتات قاتىسىپ, ەل يگىلىگى جولىندا اتقارعان ەڭبەگى ءۇشىن العىس حاتتارمەن ماراپاتتالدى. بۇل دا بولسا ءبىزدىڭ ەڭبەگىمىزدىڭ ەلەنگەنى دەپ بىلەمىز.
قالاداعى بارلىق ماڭىزدى ماسەلەلەر ءماسليحات جانىنداعى تۇراقتى كوميسسيالاردىڭ وتىرىستارىندا قارالادى, كەلەلى كەڭەستەر دە وسىندا وتەدى. ءوزىم ءماسليحاتتىڭ بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى ءجونىندەگى تۇراقتى كوميسسيانىڭ مۇشەسى رەتىندە بيۋدجەتتىڭ كىرىس-شىعىس بولىگىن قاراپ, قورىتىندى شىعارۋعا قاتىسىپ وتىرامىن.
جالپى, قالالىق ءماسليحات دەپۋتاتتارىنىڭ بارلىعى دا «نۇر وتان» پارتياسىنىڭ مۇشەسى. دەمەك, ولار حالىقتىق پارتيانىڭ دامۋىنا دا ۇلكەن ۇلەس قوسىپ ءجۇر.
مەيرامباي ورالوۆ,
«نۇر وتان» پارتياسى استانا قالالىق فيليالى توراعاسىنىڭ ورىنباسارى, قالالىق ءماسليحاتتىڭ دەپۋتاتى