دەنساۋلىق

ماقساتىمىز – مەديتسينالىق كومەك ساپاسىن جاقسارتۋ

1 بولنيتسا

استانا قالاسى اكىمدىگىنىڭ شارۋاشىلىق جۇرگىزۋ قۇقىعىنداعى «№1 قالالىق بالالار اۋرۋحاناسى» مەملەكەتتىك كوممۋنالدىق كاسىپورنى – سوماتيكالىق پاتولوگياسى بار بالالارعا, جاڭا تۋعان نارەستەلەرگە جانە 15 جاسقا دەيىنگى جاسوسپىرىمدەرگە بىلىكتى مامانداندىرىلعان ستاتسيونارلىق جانە كەڭەستىك-دياگنوستيكالىق مەديتسينالىق كومەك كورسەتەتىن كوپبەيىندى, ەمدىك-داگنوستيكالىق مەكەمە.

بۇگىنگى تاڭدا مۇندا جاڭا تۋعان نارەستەلەر مەن 15 جاسقا دەيىنگى بالالارعا جوعارى ساناتتى ماماندار ارناۋلى مامانداندىرىلعان كومەك كورسەتەدى. ەمدەۋ مەكەمەسىندەگى دارىگەرلەردىڭ 70 پايىزىنىڭ, ال مەيىربيكەلەردىڭ 60 پايىزىنىڭ بىلىكتىلىك ساناتى بار.

قالاداعى ىلكى جىلدارى قۇرىلعان زاماناۋي ستاتسيوناردىڭ ءبىرى رەتىندە ءبىزدىڭ اۋرۋحانا – يۋنيسەف بالالار قورىنىڭ «بالا جۇرەگىنە جاقىن اۋرۋحانا» اتاعىنا يە بولعان بىردەن-ءبىر مەديتسينالىق مەكەمە. مۇنداي اتاق ومىراۋ سۇتىمەن قورەكتەندىرۋدى بەلسەندى تۇردە ناسيحاتتايتىن مەديتسينالىق ۇيىمدارعا بەرىلەدى. بالا ءۇشىن انا ءسۇتىن ەشقانداي تاماق الماستىرا المايدى. سونىمەن قاتار, بۇل انا ءۇشىن ىڭعايلى جانە ۇنەمدى. نارەستەلەردى ەكى ايىندا ەمشەكتەن شىعارىپ, ءسۇت قوسپاسىن بەرۋ – بالا اسقازانىنداعى ويىق جارانىڭ سەبەپشىسى ەكەنىن 1960-1970 جىلدارى زەرتتەۋ جۇرگىزۋ بارىسىندا  عالىمدار انىقتاعان.

اۋرۋحانامىزدا «قازاقستان رەسپۋبليكاسى دەنساۋلىق ساقتاۋ ءىسىنىڭ ۇزدىگى» توسبەلگىسىمەن ماراپاتتالعان بەس قىزمەتكەر, «استانانىڭ 10 جىلدىعى» مەدالىن العان ەكى قىزمەتكەر, «تاۋەلسىز قازاقستان» مەدالىمەن ماراپاتتالعان ءبىر قىزمەتكەر جۇمىس ىستەيدى.

№1 قالالىق بالالار اۋرۋحاناسىنىڭ تاۋەلسىزدىك داڭعىلى 11/1 مەكەنجايىنا كوشىپ, پەدياتريالىق بولىمشەلەردىڭ ءورىسىن كەڭەيتىپ, كەرەۋەت قورىن 250 كويكاعا دەيىن كوبەيتۋى قىزمەتكەرلەر ءۇشىن دە, ەلوردا تۇرعىندارى ءۇشىن دە ۇلكەن جاڭالىق بولدى.

ستاتسيونار دەڭگەيىندەگى بجاىج باعدارلا­ماسى, ەمشەك سۇتىمەن قورەكتەندىرۋ باعدارلاماسى, وتباسىن جوسپارلاۋ باعدارلاماسى بويىنشا جۇمىس قارقىندى جۇرگىزىلۋدە. وسىعان وراي, بالا كۇتىمىندەگى انالارعا جاسالاتىن جاعداي جاقساردى. ەمدەۋ ساپاسىن ارتتىرۋ نارەستە ءولىمىن تومەندەتۋ, اۋرۋدىڭ اسقىنۋىنىڭ الدىن الۋ ءۇشىن بارلىق جاعدايلار جاسالدى.

ساپالى مامانداندىرىلعان جانە الەۋمەتتىك-رەابيليتاتسيالىق كومەك كورسەتۋدەگى باستى مىندەت – دەنساۋلىعىندا كىناراتى بار بالالاردان باس تارتۋدىڭ الدىن الۋ, حالىقارالىق ستاندارتتار دەڭگەيىندە دياگنوستيكالاۋ جانە ەمدەۋ ءۇشىن مۇمكىندىكتەر جاساي وتىرىپ, نارەستە ءولىمىن ازايتۋعا, قازاقستانداعى مۇگەدەكتەر مەن جەتىمدەر سانىن ازايتۋعا كومەكتەسۋ. كەلەشەكتە ءبىزدىڭ ەمدەۋ مەكەمەسى بالالارعا جانە مۇمكىندىگى شەكتەۋلى بالالارعا رەابيليتاتسيالىق جانە سوماتيكالىق كومەك كورسەتۋ سالاسىندا ايماقتىق كوشباسشى بولۋى ءتيىس.

بۇگىنگى تاڭدا اللەرگيالىق, ەندوكرينولوگيالىق, گەموتولوگيالىق, كارديورەۆماتولوگيالىق, گاسترو­ەنتە­رولوگيالىق اۋرۋى بار بالالارعا, سونداي-اق, جاڭا تۋعان نارەستەلەر مەن شالا تۋعان نارەستەلەرگە كومەك كورسەتىلۋدە. مۇمكىندىگى شەكتەۋلى بالالارعا ەرەكشە كوڭىل بولىنەدى. بالا­­لار نەۆرولوگياسى ءبو­لىمشەسى بازاسىندا رەابيليتاتسيالىق كەشەن (لوگوپەد, پسيحوتەراپەۆت, فيزيوتەراپەۆت, ۋقالاۋ, ەدك) جۇرگىزىلەدى. ناۋقاستار تەگىن مەديتسينالىق كومەكتىڭ كەپىل­دەندىرىلگەن كولەمى اياسىندا گوسپيتاليزاتسيالانادى. ستاتسيوناردا تاۋلىك بويى جاتا المايتىن بالالارعا كۇندىزگى ستاتسيونار قىزمەت كورسەتەدى.

ءبىزدىڭ اۋرۋحانادا ميدى تولىق تەكسەرۋدەن وتكىزۋگە بولادى. سونداي-اق, ۋدز, رەنتگەن جانە ت.ب. كابينەتتەر بار. جەدەل جەلى تەلەفوندارى تاۋلىك بويى جۇمىس ىستەيدى. بالا دەنساۋلىعى جانە ولارعا كۇتىم جاساۋ ماسەلەلەرى بويىنشا انالاردىڭ كەز كەلگەن ۋاقىتتا كەڭەس الۋىنا بارلىق مۇمكىندىكتەر قاراستىرىلعان.

2010 جىلدىڭ 1 قاڭتارىنان باستاپ دەنساۋلىق ساقتاۋدىڭ بىرىڭعاي اقپاراتتىق جۇيەسى بويىنشا جۇمىس ىستەپ كەلەمىز. اۋرۋحانامىزدا ستاتسيونارلىق كومەكتى ۇيىمداستىرۋداعى جاڭا ادىستەردىڭ تيىمدىلىگى بايقالادى. دارىگەردىڭ پسيحولوگياسى, جاۋاپكەرشىلىگى مەن تالپىنىسى جاقسى جاعىنا قاراي وزگەرۋدە. باستى ماقساتىمىز – مەديتسينالىق كومەك ساپاسىن جاقسارتۋ. اۋرۋحانا ۇجىمى عىلىم مەن تاجىريبەدەن الىنعان بار جاقسىنى بالالارعا ارناۋدا.

 

اسەل سەيىتقازينا,

استانا قالاسىنداعى №1 بالالار اۋرۋحاناسى باس دارىگەرىنىڭ ورىنباسارى

تاعىدا

admin

«استانا اقشامى» گازەتى

ۇقساس جاڭالىقتار

پىكىر ۇستەۋ

Back to top button