استانانىڭ يندۋستريالدىق پارك اۋماعىندا «ماز» ماركالى ارناۋلى تەحنيكا شىعاراتىن زاۋىت بوي كوتەرمەك. سەيسەنبى كۇنى كاسىپورىن قۇرىلىسىنىڭ ىرگەتاسىنا كاپسۋلا قويۋ ءراسىمى ءوتىپ, وعان استانا قالاسى اكىمىنىڭ ورىنباسارى ءنۇرالي اليەۆ قاتىستى.
بەلارۋستىڭ «بەلاۆتوماز» حولدينگى قۇرامىنداعى مينسك اۆتوموبيل زاۋىتى ەۆرو-3, ەۆرو-4, ەۆرو-5 ەكولوگيالىق ستاندارتتارىنا سايكەس كەلەتىن تەحنيكا شىعارۋىمەن تانىمال. بۇل كاسىپورىننىڭ «ماز» ماركالى كوممۋنالدىق, ارناۋلى كولىكتەرى باياعىدان الەمدىك برەند رەتىندە قالىپتاسقان. سالتاناتتى راسىمگە ارنايى كەلگەن بەلارۋس رەسپۋبليكاسى ۇلتتىق جينالىستار وكىلدەرى پالاتاسىنىڭ توراعاسى ۆلاديمير اندرەيچەنكونىڭ ايتۋىنشا, بۇگىندە الەمنىڭ 40 ەلىنە مينسك كولىكتەرى جەتكىزىلەدى ەكەن. «زاۋىت اشۋ – مەملەكەتكە دە, كاسىپورىنعا دا, حالىققا دا پايدالى ءىس. سەبەبى, ونىڭ اشىلۋىمەن جاڭا جۇمىس ورىندارى پايدا بولادى, ەلدىڭ الەۋمەتتىك-ەكونوميكالىق كورسەتكىشى ارتادى. وسى زاۋىتتىڭ اشىلۋى قازاقستان مەن بەلارۋس اراسىنداعى ىنتىماقتاستىقتى ارتتىرا تۇسەتىنى ءسوزسىز» دەدى ول.
«استانامازتسەنتر» كاسىپورنىنىڭ باس ديرەكتورى ەرجان ابەنوۆتىڭ مالىمەتىنشە, زاۋىتتىڭ قۇرىلىسى 1 شىلدەدە باستالادى. كەلەسى جىلى وندىرىستىك بازانىڭ ءبىر بولىگىن پايدالانۋعا بەرۋ جوسپارلانىپ وتىر. زاۋىت تولىق قۋاتىنا ەنگەندە, جىلىنا 100 ساموسۆال, 15 توننالىق جۇك كوتەرۋگە قاۋقارى بار 100 تىركەمە, 60 كوممۋنالدىق تەحنيكا شىعارۋدى جوسپارلاپ وتىر. بۇل تەحنيكالاردىڭ ءبارى امەريكالىق, يتاليالىق, باسقا دا شەتەلدىك وزىق تەحنولوگيالارمەن جاسالاتىن بولادى. كاسىپورىن ىسكە قوسىلعان ساتتە 200 جاڭا جۇمىس ورنى اشىلماقشى.
قازاقستان-بەلارۋس بىرلەسكەن كاسىپورنى ەلىمىزدىڭ وندىرىستىك الەۋەتىنىڭ ارتۋىنا ۇلەسىن قوسىپ, ەۋرازيالىق ەكونوميكالىق وداق اۋماعىندا باسەكەگە قابىلەتتى مىقتى زاۋىتقا اينالاتىنىنا سەنىم بار.
زاۋىت قۇرىلىسىنىڭ ىرگەتاسىنا كاپسۋلا قويۋ راسىمىنە قر ينۆەستيتسيا جانە دامۋ ۆيتسە-ءمينيسترى البەرت راۋ, بەلارۋس رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى اناتولي نيچكاسوۆ جانە «استانا – جاڭا قالا» ارنايى ەكونوميكالىق ايماعىن اكىمشىلەندىرۋ باسقارماسىنىڭ باسشىسى ءىلياس جانگاسكين قاتىستى.
قىمبات نۇرعالي
